Ezequiel 21 - Bible in Tzeltal de Oxchuc y Tenejapa

Puñal yu'un Cajwaltic

¹ Te Cajwaltic la sc'oponon, jich la yalbon:

² —Ja'at winic, sujt'es aba ta stojol Jerusalén, albeya c'op ta swenta te templo yu'une. C'opojan ta jwenta, albeya te ilinemon ta stojol te lum Israele.

³ Jich xawalbey: “Jich ya yal te Cajwaltique: ‘Yo'tic ya calbeyex ta jamal: Jo'on ya jcontroinex. Ya me jloq'ues jpuñal, ya me jmil ta pajal spisil mach'atic ma'yuc smulic soc mach'atic ay smulic.

⁴ Jc'axel me ya jloq'ues jpuñal, pajal me ya jlajin ta spisilic; manchuc me ma'yuc smulic, pajal me ya xlaj soc te mach'atic ay smulique. Ya xjajch' tel ta norte c'alal ta sur.

⁵ Ta spisil yajwal lum ya sna'ic te jo'on Ajwalilon te jich ya jpase. Ya jloq'ues te jpuñale, ma ba ya cac' ochel ta sna’, xi' te Cajwaltic”, uta me.

⁶ “Te ja'at winic, oc'an, pero soc xc'uxul mel-o'tan te mero ya yejch'entesbat awo'tane, oc'an ta stojol te alumale.

⁷ Teme ay ya sjojc'obat bi yu'un te ya x'oc'ate, albeya te yu'un ay bila awaiyoj sc'oplal te nopol ya xc'ot ta pasele. Ta spisil yajwal lum ya me xch'ay q'uinal ya yaiyic yu'un. Ya me saybuj yoc sc'abic, ma'yuc mach'a ma xtal xiwel ta yo'tan. Ta spisilic me ya xnijc' yacanic yu'un xiwel. Ya xc'otix yorail, ya xjajch'ix ta pasel. Jo'on Ajwalilon te jich caloje —xi'.

⁸ Te Cajwaltic la sc'oponon, jich la yalbon:

⁹ —Ja'at winic, c'opojan ta jwenta, ala te jo'on te Ajwalilon te ya calbat mandal te ya awale: “¡Te puñal, te puñal! La yich'ix juxel ta lec, la yich'ix juxel ye.

¹⁰ Juxbilix ye, yu'un ya xjajch'ix ta milaw, juxbilix ta lec, xlemet nax.

¹¹ La yich' juxel, yu'un ya yich' tuchel, te puñale, juxbilix ta lec; ya me yich' aq'uel ta sc'ab te jmilawale.

¹² Ja'at winic, awunan, queletan ta aw. Melel chapalix, yu'un ya yich' milel te lum cu'un, ta spisilic te mach'atic yich'oj yat'elic ta Israel. Chapal te ya xlajic soc te lum cu'une, ja' yu'un majulaya awo'tan yu'un xc'uxul.

¹³ Jo'on Ajwalilon, yacon ta yalel.

¹⁴ “Ja'at winic, c'opojan ta jwenta. Tija jajch'el te puñale, ac'a yaq'uix ejch'en ta mero spisil sc'ajc'al yo'tan. Ja' te puñal yu'un milawe, ja' te xiweltic sba jmilawal puñale, te ya yal smilel te yajwal lum ta bayuque.

¹⁵ Ya me x'ac'bot bayal xiwelic yu'un, ya me yac' bayal milaw. Ta spisil te nanatic yu'un la caq'uix ochel te jmilawal puñale. Ja' te puñal la yich' juxel ta leque, xlemet me xojobil ya yac' tey a, yich'oj juxel ye yu'un milaw.

¹⁶ Ya jc'an juxbil awe, ya jc'an ya xbojawanat ta xcha'mejch'el, ta awa'el soc ta aq'uexen.

¹⁷ Te jo'one ya me jtij jajch'el, asta ja' to teme lamaj te quilimbae. Jo'on Ajwalilon, yacon ta yalel”, uta me —xi'.

¹⁸ Te Cajwaltic la sc'oponon, jich la yalbon:

¹⁹ —Pasbeya seña cheb be, swenta yu'un ya xc'ax soc spuñal te muc' ajwalil yu'un Babilonia. Te cheb bee, ya me sc'an te ya xloc' xchebal ta jun nax lumq'uinal. Ta xjajch'ibal te beetic ya me awac'bey seña te ya yac' ta na'el banti lumil yac ta baele.

²⁰ Ya me apasbey seña jun be te banti ya xc'ax soc spuñal te muc' ajwalile. Te lumetic ja' me te Rabá-yu'un-amonetic soc Jerusalén, ja' te lum ay sts'ajc'ul ta sjoyobal te ay ta Judá.

²¹ Te muc' ajwalil yu'un Babilonia tey la yaq'uix sba ta banti ya xjetin jajch'el te cheb be. La spasbey snúmero ta na'el te bila ya to xtal ta stojole. Jich la xchajulay te yat'ejibalul t'imalte'e, soc la sjojc'obey te bila cuybil ta diosetic yu'une, soc ta sejc'ub chambalametic.

²² Ta swa'elc'ab loc' te yat'ejibalul t'imalte' te ya yac' ta na'el te ja' tsabil c'ot te Jerusalén, soc te ya spas na'el te ya yich' ac'beyel guerra soc at'ejibaletic yu'un yochintayel, soc te ya yac' mandal te ya xjajch' miltomba: “¡Guerra!”, xiic me ta aw. Ya me stop'beyic sti' te lume, ya me sjachic spasel smoibalul te sts'ajc'ule, soc ya me sjoyintayic ta jc'axel.

²³ Pero te ants-winiquetic ta Jerusalén ya me scuyic ta lotil c'op te ya yich' alele, ta scaj te tratoetic spasojique. Pero ta mero melel, ja' ya x'albotic ta jamal te smulique, ja' yac ta alel sc'oplal te bit'il ya x'ochic ta c'abale.

²⁴ Ja' yu'un jo'on Ajwalilon te jich ya cal ta jamal: Te bitic amen apasojic, soc awaiyojic milaw, chican ta asitic. Ja' yu'un ya awich'ic chuquel.

²⁵ Ja'at muc' ajwalil yu'un Israel, c'ax amenat soc ma'yucat ta stojol Dios, nopolix ya sta yorail te ya awich' te castigo swenta slajibale.

²⁶ Jo'on Ajwalilon ya calbat: Ya yich' loq'uesel te sbejch'il ajole, soc ya yich' ch'ojel coel te acorona. Spisil me ya yich' jeltayel. Te bila ay ta ye'tale, ya me yich' mojt'esel ta sba; te bila ay ta sbae, ja' me ya xco ta ye'tal.

²⁷ Spisil jinbil ya xjil cu'un ta jyalel. Jich me ya xc'ot ta pasel teme tal te mach'a jo'on cac'ojbey ta swenta te chajbanwaneje.

Castigo ta stojol amonetic

²⁸ “Ja'at winic, c'opojan ta jwenta, albeya te bila ya cal ta stojol amonetic, te ja'ic te ya yuts'inic ta c'op te Israel soc te loq'uemix ta sna te puñale. Chapalix yu'un te milawe, juxbilix ta lec swenta yu'un xlemet ya yac' xojobil a te ya xlajinwane.

²⁹ Te bila ya yil ta sc'opique, lotil me, soc te bila yac ta yalel sc'oplale, puro lotil stuquel. Te puñal ya me xyal ta snuq'uic te bol j'uts'inwanejetique. Nopolix ya sta yorail te slajibal castigo ta stojolique.

³⁰ “Puñal, cha'ochan xan ta ana. Jo'on me ya jchajbanat tey ta banti la jpasate, tey ta lumq'uinal banti ayinate.

³¹ Ya me jt'omes bael quilimba ta atojol, jich me te bit'il tulan tocal mero xiweltic sbae. Ya me cac'at ta sc'ab te mach'atic mero j'uts'inwanejetic te jc'axel ya xlajinwanique.

³² Ya me awich' chiq'uel, soc ya me awich' lajinel. Ya me x'oquin ach'ich'el ta lumq'uinal ta bayuc; ma'yuc mach'a ya xcha'na'at xan. Jo'on Ajwalilon te jich caloje —xi' te Cajwaltique.