Ezequiel 2 - Bible in Tzeltal de Oxchuc y Tenejapa

Ic'ot ta at'el Ezequiel

¹ Ay la caiy c'op te jich yac ta yalele: —Ja'at winic, tejc'ana aba, yu'un ay bila ya calbat awaiy —xi'.

² Te c'alal jich yacon ta yaiyel a te c'ope, la yu'uninon ta yu'el te Diose, la yac' tejc'ajucon. Jich la caiy xan te c'ope,

³ jich la yalbon: —Ja'at winic, ya me jticunat bael ta stojol israeletic, ja'ic te lum te stoyoj sbaic ta jtojole, soc te ma xyich'onic ta muq'ue. Ja'ic soc te antiguo sme'-static te stoyoj sbaic ta jtojol c'alal ora.

⁴ Ja' nix jichic te yal-snich'anique, mero tulan te yo'tanic soc mero tulan te sjolique. Ya me jticunat bael ta stojolic, jich me ya xc'o awalbey: “Jich ya yal te Cajwaltique”, ya me awut.

⁵ Teme la yich'at ta wentae, o teme ma ba la yich'at ta wentae, melel tulan ya yac' sbaic ta jtojol, pero ya me sna'ic te ay jtul j'alwanej yu'un Dios ta yolilique.

⁶ Ja'at winic, ma me xtal xiwel ta awo'tan ta stojolic, soc ma me x'axi' te bila ya yalic ta atojole, manchuc me jich ta awo'tan te bit'il sjoyintayejat bayal ch'ixe, manchuc me ayat ta yolil tsequetic ya awaiy. Ma me xiwat yu'un teme ay bila ya yalbate, soc ma me xnijc' awo'tan yu'un teme ya xyanaj sitique, manchuc me mero tulan ya yac' sbaic ta jtojol.

⁷ Pero te ja'ate ya me awalbey yaiyic te jc'ope, manchuc me ya yich'ic ta muc', o ma ba ya yich'ic ta muc', melel mero tulan ya yac' sbaic ta jtojol.

⁸ Aiya me awaiy ta lec te bila ya calbate: Ma me ja'uc te mero tulan ya awac' aba ta jtojol uuque, jich te bit'il ya spasic te yantique. Jama te awee, we'a te bila ya cac'bate —xi'.

⁹ Jich la quilbey sc'ab winic, te sc'abe jich talem ta banti ayon, stsacoj jun ts'ibubil balbil jun.

¹⁰ Ta sc'ab la sjambon ta jtojol te june, ts'ibubil ta xcha'mejch'el: Ya yalbey sc'oplal woclajel, aw yu'un xc'uxul, soc oq'uel yu'un mel-o'tan.