Ezequiel 12 - Bible in Tzeltal de Oxchuc y Tenejapa

Ezequiel la yalbey sc'oplal iq'uel loq'uel

¹ Te Cajwaltic la sc'oponon, jich la yalbon:

² —Te ja'at winic, nainemat ta yolil te lum tulan yo'tanique. Ay sitic yu'un ya yilic q'uinal sc'oplal a, pero ma ba ya yilic q'uinal. Ay xchiquinic yu'un ya yaiyic c'op sc'oplal a, pero ma ba ya yaiyic c'op. Melel ja'ic te lum te tulan yo'tanique.

³ Ja' yu'un, chajbana abiluc, jich yilel te bit'il ya xbaatix, yu'un ya x'ic'otat bael ta mosoile. Ta c'aaleltic me ya apas, jich me ya yilic spisilic. Ya me xloc'at jajch'el ta ana, ya me xbaat ta yan q'uinal. Jich wan ya sna'ic te ja'ic te lum te tulan yo'tanique.

⁴ Ta c'aaleltic soc ta comonsitil, ich'a loq'uel abiluc, jich yilel te bit'il ya xbaatix ta scaj te ya x'ic'otat bael ta mosoile. Te c'alal ya xmal bael c'aal, loc'an bael jich bit'il ya x'ic'otatix bael ta mosoile.

⁵ Ta patil juta te ts'ajc' ta comonsitil, tey ya xloc'at bael soc a te abiluque.

⁶ Te bi ora ya x'ijc'ub te q'uinale, ta comonsitil ta spisilic, ac'a ta anejq'uel te abiluque, loc'an bael. Ya me amac awelaw, swenta yu'un jich ma ba ya awil a te lumq'uinale. Melel te bila ya cac'bat apase, seña wocol ta stojol te lum Israel —xi' te Cajwaltique.

⁷ Jich nix la jpas a te bit'il la yac'bon jpas te Cajwaltique. La jchajban te jbiluque. Ta c'aaleltic la quich' loq'uel te jbiluque, jich yilel te bit'il ya xboonix ta scaj ac'botonix quijq'uitay te jlumale. Ta mal c'aal la jut loq'uel ta jc'ab te ts'ajq'ue. C'alal ijc'ub q'uinal, ta comonsitil ta spisilic la jtsac te jbiluque, la cac' ta jnejq'uel, loc'on bael.

⁸ C'alal sacub q'uinal ta xchebal c'aal, te Cajwaltic tal sc'op ta jtojol, jich la yalbon:

⁹ —Te israeletic tulan yo'tanic, puersa wan ay bi ya sjojc'obatix: “¿Bi ya apas?” xiic wan.

¹⁰ Teme jiche, jich xawalbey ta jwenta: “Ja' in to ja' ya x'ac'bot sna'ic yu'un Dios te muc' ajwalil ta Jerusalén, soc ta spisil te mach'atic nainemic tey a te bila ya xc'ot ta stojolique”, uta me.

¹¹ Albeya te ja' seña wocol ta stojolic te bitic ya apase, soc jich to me ya spasic te bit'il ya apase, melel ya me x'ic'otic bael ta mosoile.

¹² Te ajwalil yu'unique, c'alal ya x'ijc'ub q'uinal, ya me yac' ta snejq'uel sbiluc, ya xloc' ta banti ya sjutic te ts'ajq'ue. Smacoj me yelaw a ya xloc' bael, swenta yu'un jich me ma'yuc mach'a ya x'ilot yu'un a, soc ni ja'uc ya yil te q'uinale.

¹³ Ya me jmuc coel ta jchojac', ya me jpots a. Ya me quic' bael ta Babilonia, ta slum-sq'uinal caldeoetic, ja' me te lumq'uinal te ma xju' ya yile, soc tey me ya xlaj a.

¹⁴ Ya me jpuc bael ta xchanxujc'ul q'uinal te soldadoetic joyolic ta canantayel yu'une, soc te ya xcoltayot yu'une. Ja' nix te yantic soldadoetic yu'une, ya me jnuts soc puñal ta jc'ab.

¹⁵ Te c'alal la jpuquix bael ta yantic lumq'uinale, soc teme la jpuquix bael ta yantic nacione, ya me sna'onic te jo'on Ajwalilon.

¹⁶ Pero ya me cac' te ya xcolic jilel cha'oxtul ta guerra, ta wi'nal, soc ta chamel, swenta yu'un ta nacionetic te banti ya xbajt'ic, ya me yalic spisil te bitic ilaybil sba la spasique, soc ya me sna'ic te jo'on Ajwalilon —xi'.

Yan buelta la yich' alel te ya xtal castigo ta stojolic

¹⁷ Te Cajwaltic cha'c'opoj xan ta jtojol, jich la yal:

¹⁸ —Ja'at winic, nijc'an yu'un xiwel te c'alal ya xwe'ate. Jich xapas aba ta ilel te bit'il ayat ta wocol a te c'alal ya xwe'ate.

¹⁹ Albeya te yajwal te lumq'uinal, soc te yajwal Jerusalén, soc ta spisil te israeletique: “Jich ya yalbeyex te Cajwaltique: ‘Ay me awocolic ta xiwel a ya xwe'-uch'ex. Te lumq'uinal ya me yich' jinel, soc jochol me ya xjil ta swenta smuc'ul sc'ajc'al te yajwale.

²⁰ Spisil te lumetic ay yajwal, ya me yich'ic lajinel. Te lumq'uinal ya me xc'atp'uj ta jochol taquin q'uinal. Jich me ya ana'ic te jo'on Ajwalilone’, xi' te Cajwaltic”, uta me —xi'.

²¹ Te Cajwaltic c'opoj xan jich la yalbon:

²² —¿Bit'il ay a te sc'opic te israeletic te ya yalic: “Yac ta c'axel c'aal, pero ma xc'ot ta pasel te bila ac'bot yil te j'alwanej yu'un Dios,” te xiique?

²³ Pero albeya yaiyic: “Jich ya yal te Cajwaltique: ‘Jo'on ma ba ya cac' te ya yich' xan alel ta Israel te c'opetic la yich'ix alel. Mero nopolix ya sta sc'aalelal te ya xc'ot ta pasel spisil te bitic ac'botix yil te j'alwanej yu'un te Diose.

²⁴ Ma'yuquix bi ora ya xc'ot ta pasel ta Israel te ya xchicnaj lotil c'op swenta te bila ya x'ac'bot yil te j'alwaneje, soc ma'yuquix bi ora ya xchicnaj lotil j'alwanej ta Israel.

²⁵ Melel jo'on te Ajwalilon ya me xc'opojon jtuquel. Te bi ya cale, ya me xc'ot ta pasel ta yorail. Ja'ex lumex, ya awilic te tulan awo'tanique. Jo'on me te ya xc'opojone, soc ya me cac' te ya xc'ot ta pasel te bila ya cale. Jo'on Ajwalilon, te jich caloje’, xi' te Cajwaltic”, uta me —xi'.

²⁶ Te Cajwaltic c'opoj ta jtojol, jich la yalbon:

²⁷ —Te israeletic yacalic ta yalel, te ma orauc ya xc'ot ta pasel te bila la awalix ta swenta te bila ac'botat awile.

²⁸ Ja' yu'un jich xawalbey yaiyic: “Jich la yal te Cajwaltique: ‘Te jc'ope nopol meix ya xc'ot ta pasel. Jo'on Ajwalilon, te jich caloje’, xi' te Cajwaltique”, uta me —xi'.