Ezequiel 11 - Bible in Tzeltal de Oxchuc y Tenejapa

Castigo ta stojol Jerusalén

¹ Te yip yu'el Dios, la slicon, la yic'on bael yaiyel ta yochibal templo yu'un Cajwaltic ta stojol sloq'uib c'aal. Ta sti' templo tey ayic jo'eb xcha'winic (25) winiquetic a. Tey ay ta yolilic a te Jaazanías, te snich'an Azur, soc te Pelatías, te snich'an Benaías, ja'ic te jwentainwanejetic yu'un te lume.

² Te Cajwaltic jich la yalbon: —Ja'at winic, te winiquetic in to yacalic ta spasel te bila mero amen ta pasele, soc te ya yaq'uic ta nopel te bila ma lecuc ta pasel ta stojol te lume.

³ Jich ya yalic: “Ma to ba namey te la jcha'pastic te nanatique. Li' me ya xcolotic, jich me c'oemotic te bit'il ti'bal ta oxom”, xiic.

⁴ Ja' yu'un c'opojan ta jwenta —xi'.

⁵ La swentainon te espíritu yu'un te Cajwaltique, la spason ta mandal ta yalel: —Jich ya yal te Cajwaltic: “Ya jna' te bi ya awal ta awo'tanic, israeletic. Jna'oj te bi ya yal te awo'tanique.

⁶ Te ja'exe mero bayal awaiyojic milaw li' ta lum. La anojesic ta sbaq'uetal mach'atic milbilic ta calleetic.

⁷ Ja' yu'un jo'on Ajwalilon te jich ya cale: Te Jerusalén jich me ya xc'ot te bit'il oxom, pero ma ja'uquex te ti'bal ya xc'oexe, ja'ic me stuquel te sbaq'uetalic te mach'atic la amilique. Melel te ja'exe ya me jloq'uesex ta oxom c'oem.

⁸ ¿Ya bal axi'ic te guerra? Melel ya me cac' taluc guerra ta atojolic. Jo'on Ajwalilon te jich caloje.

⁹ Ya me cac' c'otuc ta atojolic castigo: Ya me jloq'uesex bael ta aq'uinalic, ya me caq'uex ta sc'ab jyanlumetic.

¹⁰ Ya me xlajex ta milel ta puñal. Jo'on me ya cac'beyex castigo yu'un amulic ta sjoylejal sti'il sq'uinal Israel. Jich ya ana'ic te jo'on te Ajwalilone.

¹¹ Te lume ma ba ya xtuun awu'un ta oxom c'oem, soc ni ja'uquex te ti'balex ya xc'oexe. Jo'on me ya cac'beyex castigo yu'un amulic ta sjoylejal sti'il sq'uinal Israel.

¹² Jich ya ana'ic te jo'on te Ajwalilone. Te ja'exe ma ja'uc la ach'uunbonic spasel te mandaliletic cu'une, soc ma ba la at'unbonic ta pasel te bitic la cale. Ja' la apasic te bila ya spasic te nacionetic sjoyintayejexe”, xi' me —xoon.

¹³ Te c'alal yacon ta yalel ta stojolic a te bila la yalbon te Cajwaltique, t'uxaj bael te Pelatías te snich'an Benaías, toj lajel. La jtinan jba coel c'alal ta lum, awunon ta tulan, jich la cal: —¡Ay, Cajwal! ¿Ya bal alajin jiche te jteb xan israeletic jileme? —xoon ta aw.

Dios la yalbey sc'oplal yach'il trato

¹⁴ Te Cajwaltic la sc'oponon, jich la yalbon:

¹⁵ —Ja'at winic, te mach'atic nainemic ta Jerusalén yacalic ta yalel ac'oplal soc te israeletic te ajoinej aba soque: “C'ubul ticunotic loq'uel ta stojol te Cajwaltic te yantic jlumaltique. Jo'otic la yac'botiquix cu'uninbeytic te slum-sq'uinalique”, xiic.

¹⁶ Ja' yu'un jich me xawalbey yaiyic: “Te Cajwaltic jich la yal: ‘Jo'on la cac'bey yijq'uitay slumalic, la jpuc bael ta yantic nacionetic, la jpuc ta yolil yantic lumetic, pero ma ba mero bayal c'aal baemic cu'un. Yo'tic jo'on ni me ch'ul temploon yu'unic tey a ta banti lumq'uinal baemic cu'une’, xi' te Cajwaltic”, uta me.

¹⁷ Soc jich xawalbey xan yaiyic: “Jich la yal xan te Cajwaltique: ‘Jo'on me ya quic' xan tel ta lumq'uinal soc ta nacionetic te banti la jpuc baele. Ya me jtsob xan, soc ya me cac'beyic xan te slum-sq'uinal Israel’, xi' te Cajwaltic”, uta me.

¹⁸ Ya me xcha'sujt'ic xan tel ta slum-sq'uinalic, ya me xc'o slajinic te bitic xiweltic sba soc te mero ilaybil sba ay ta pasel yu'unique.

¹⁹ Jo'on me ya jloq'uesbey ta yo'tanic te bila tulan jichuc ton. Ya me cac'bey yach'il yo'tanic soc yach'il xcuxlejalic.

²⁰ Jich me ya xju'ix yu'unic a te ya xch'uunbonic te mandaliletic cu'une, soc te bitic chapal cu'une. Jich me ya spasiquix bael spisil ora. Ja'ic me lum cu'un, soc jo'on me Dioson yu'unic.

²¹ Pero te mach'atic ja' st'unojic ta pasel te bitic xiweltic sba soc ilaybil sbae, ya me quich'bey ta wenta yu'un te yat'ele. Jo'on Ajwalilon te jich caloje —xi'.

Ijq'uitayot yu'un xojobil Cajwaltic te Jerusalene

²² Te querubínetic jajch'ic ta wilel, bajt'ic uuc te ruedaetique. Jich bajt' te xojobil yutsilal Dios yu'un Israel te ay ta yajc'olal.

²³ Jajch' bael ta wilel, c'ub bael ta stojol te lume, ba yac' sba ta yajc'olal te wits ay ta stojol sloq'uib c'aal yu'un te lume.

²⁴ Ta ora, la slicon jajch'el la caiy te yip yu'el te Diose, la yic'on xan bael ta Babilonia, tey ta banti ayic te yantic mach'atic ic'otic bael ta mosoile. Ja' in to, ja' c'ot ta pasel a te c'alal la yac'bon quil la caiy te espíritu yu'un te Diose. Ta patil, ch'ay ta jsit te bila yacon ta yilel la caiye.

²⁵ Ora la jcholbey yaiyic spisil te bitic la yac'bon quil Cajwaltic te mach'atic ic'otic bael ta mosoile.