Ezequiel 10 - Bible in Tzeltal de Oxchuc y Tenejapa

Xojobil yutsilal Cajwaltic la yijq'uitay templo

¹ La quil xan te ay bila joyol tey a, te ay ta yajc'olal sjolic te querubínetic. Jich la quil te pajal soc muc'ul nactijibal yilel pasbil ta zafiro-ton.

² Te Cajwaltic la sc'opon te winic sc'u'inej lino-paq'ue, jich la yalbey: —Ochan ta yolil te ruedaetic yu'un carretaetic ta ye'tal te querubínetique. Jopa jojpuc ac'al te ay sc'aal te ay ta yolilic te querubínetique. Lilinbeya coel ta sba te lume —la yut. La quil bit'il och te winique.

³ Ja' nix ta yorail a, te querubínetic ayic ta stojol sur yu'un templo, soc nojel ta tocal te yamac'ul yelawe.

⁴ Te xojobil yutsilal te Cajwaltic toy moel ta sbaic te querubínetique, toj bael ta yochibal templo. Te tocal la snojes te templo, te yamac'ule sacub q'uinal yu'un te xojobil yutsilal te Cajwaltique.

⁵ Te sc'op te xic' te querubínetic chican to ta aiyel ta amac'. Jich yaiyel te bit'il yac ta c'op te Dios te Spisil ya xju' yu'une.

⁶ Jich ora te Cajwaltic la spas ta mandal te winic sc'u'inej lino-paq'ue. La yalbey te ya yich' te c'ajc' ay ta yolil te ruedaetique, tey ay ta yolil te querubínetic. Te winique bajt' te banti ay te jun rueda.

^7-8 Ta ye'tal te xiq'uic te querubínetique ay bila chicanic ta ilel, jich yilel te bit'il sc'ab winique. Te jtule la yac' bael sc'ab ta stojol te c'ajc' ay ta olile. La stsac jtebuc c'ajc', la yac'bey ta sc'ab te winic sc'u'inej lino-paq'ue. Te winique la stsac te c'ajq'ue, c'alal la stsac, bajt' ta ora.

⁹ Ta sts'eel te querubínetic la quil ay chaneb ruedaetic tey a, jujun ay ta swentaic. Te ruedaetic mero xlemlajan, pajal soc t'ujbil c'anal tonetic.

¹⁰ Pajal ta xchanebal te ruedaetic, jich yilel te bit'il xojol ta yutil te yane.

¹¹ Te c'alal ya xbeenic te querubínetic, te ya xbajt'ic ta beel ta juju-jxujc', ma ba ya sujt'es sba ta spatic. Tey ya xbajt'ic ta banti ya xbajt' te neel aye.

¹² Ay sitiletic ta scojt'ol, ta spatic, ta sc'abic, soc ta xiq'uic, mero xlemlajanic ta spisilic ta bayuc. Ja' nix jich ta xchanebal te ruedaetique.

¹³ Jo'onix la caiy stojol te ay mach'atic “Carreta” la yac'beyic sbiil te ruedaetique.

¹⁴ Ta jujun te querubínetique ay chaneb yelawic: Te june yelaw toro yilel, te xchebale yelaw winic, te yoxebale yelaw león-choj, te xchanebale sni' águila yilel.

¹⁵ Ja'ic te bila cuxajtic in to, ja'ic te la quil ta muc'ja' Quebar. Te querubínetic jajch'ic,

¹⁶ te c'alal ya xjajch'ic baele, ya xjajch'ic bael uuc te ruedaetique. Te c'alal ya slich' te xiq'uique, ya xjajch'ic moel ta lum, te ruedaetic ma ba ya sjits sbaic ta stojolic.

¹⁷ Teme la stejc'an sbaique, ya scom sbaic uuc te ruedaetique. Teme jajch'ic moel, ya xjajch'ic uuc te ruedaetique, melel te ruedaetic yich'ojbeyic xcuxlejalic.

¹⁸ Jich te yutsilal xojobil te Cajwaltic toy jachel ta sba templo, c'o yac' sba ta sba te querubínetic.

¹⁹ Jich la sjach te xiq'uique, jajch'ic moel ta lum. Jo'on la quil bit'il jajch'ic moel. Ay ta xujc' te ruedaetic, soc jalajic ta sti' templo yu'un Cajwaltic, ja' te puerta ay ta stojol sloq'uib c'aale. Te yutsilal xojobil te Dios yu'un Israel, ay ta sbaic.

²⁰ Ja' nix te bila cuxajtic te la quil ta ye'tal te Dios yu'un Israel ta muc'ja' Quebar. Jich ora la jna' te ja' querubínetic.

²¹ Ta jujun ay chaneb yelawic soc chaneb xiq'uic, ta ye'tal te xiq'uic chican ta ilel te bila pajal soc sc'ab winic yilele.

²² Te yelawic pajal nix soc te yelawic te bila cuxajtic ay xiq'uic la quil ta muc'ja' Quebar. Ta jujun ya xbeenic ta neel.