Éxodo 38 - Bible in Tzeltal de Oxchuc y Tenejapa

La yich' pasel scajtijib ta chiq'uel milbil majt'anil ta bronce

¹ Te Bezaleel la spas ta acacia te scajtijib ta chiq'uel te milbil majt'aniletic, pajal xchanxujc'ul. La yac' cheb metro soc jo'eb xcha'winic centímetro (2.25 m) te jujun xujc', soc jun metro soc jo'eb xcha'winic centímetro (1.25 m) te stoylejale.

² Ta xchanxujc'ul la spasbey loq'uel jujun xulub tey a, jun nax a loc' ta pasel soc te scajtijibe. La smac ta bronce.

³ Te bitic ya xtuun ta scajtijib ta chiq'uel majt'anil, spisil la spas ta bronce: ja' te yawil stanul, te spalail, te tazaetic, te trincheetic soc te yawil ac'ale.

⁴ La spasbey srejail ta bronce. Tey la yac' ta yet'al sti'il ta olil stoylejal.

⁵ La spasbey chaneb xch'ocowil ta bronce te rejae. Jujun la yac'bey te jujun xujc' swenta yu'un tey ya xij c'axel a te sq'uechjibale.

⁶ La spasbey sq'uechjibal te scajtijib milbil majt'anil ta acacia, la spac'bey ta potsel ta bronce.

⁷ Jich la xij c'axel ta xch'ocowil spasojbey loq'uel ta xch'ujt' te scajtijib ta chiq'uel milbil majt'anile, jich ya xju' ta q'uechel bael a. Te scajtijib majt'anile pujul te yutile, ta te' la spas.

La yich' pasel yawil ja' ta bronce

⁸ Te Bezaleel la spas ta bronce te yawil ja' soc te scajtijibe. Ja' tuun yu'un te espejo-taq'uinetic yu'un te antsetic te yac'oj sbaic ta abatinel ta yochibal te Nailpac' te bay ya yich' c'oponel te Cajwaltique.

La yich' pasel scorralil Nailpac' Templo

⁹ Te Bezaleel la spas te scorralil Nailpac' Templo. Ta stojol sur jo'eb yoxwinic (45) metro te spac'al te jalbil ta ts'otbil lino la yac'beye.

¹⁰ La yac'bey jtab yoyal soc jtab yiptajib pasbil ta bronce. La slucanlabey staq'uinal soc xch'ocowil ta plata.

¹¹ Ta stojol norte te spac'al, la yac'bey jo'eb yoxwinic (45) metro te snajt'ile. La yac'bey jtab yoyal soc jtab yiptajib pasbil ta bronce. La slucanlabey staq'uinal soc xch'ocowil ta plata.

¹² Ta bay stojol smalib c'aal cheb xcha'winic metro soc olil (22.5) te spac'ale. Lajuneb yoyal soc lajuneb yiptajib la yac'bey. La slucanlabey staq'uinal soc xch'ocowil ta plata.

¹³ Ta stojol sloq'uib c'aal cheb xcha'winic metro soc olil (22.5) te spac'ale.

¹⁴ Ta jejch' ta bay yochibal la yac'bey juqueb metro te spac'ale, la yac'bey oxeb yoyal soc oxeb yiptajib.

¹⁵ Ja' nix jich te yan jejch'e juqueb metro te spac'al la yac'beye, oxeb yoyal soc oxeb yiptajib la yac'bey.

¹⁶ Spisil te paq'uetic ta sjoyobal te corral pasbil ta ts'otbil lino.

¹⁷ Te yiptajib oyetic la spasbey ta bronce. Te staq'uinal la slucanlabey ta yoyal soc te ch'ocowiletic la spasbey ta plata. Ta sjol te oyetic la spac'bey ta potsel ta plata. Spisil te oyetic yu'un te scorralil la spasbey ta plata te ch'ocowetic yu'une.

¹⁸ Te pac' ta yochibal te corral mero t'ujbil ch'albil ta ts'isel ta naubil stsotsil chij te bonbil ta morada, púrpura soc tsaj, soc ts'otbil linoe. Ay baluneb metro te snajt'ile, cheb metro soc jo'eb xcha'winic centímetro (2.25) te stoylejale, ja' pajal soc spac'al te corrale.

¹⁹ La yac'bey chaneb yoyal soc chaneb yiptajib ta bronce. La slucanlabey staq'uinal soc xch'ocowil ta plata. Te sjol oyetic la spac' ta potsel ta plata.

²⁰ Spisil te estacaetic yu'un te Nailpac' Templo soc ta sjoyobal te scorralil pasbil ta bronce.

Taq'uinetic tuun ta spasel te Nailpac' Templo

²¹ Ta swenta smandal te Moisés soc te jtsobwanej Itamar snich'an te sacerdote Aarón, te levitaetic la yich' ajtayel te jaychajp taq'uinetic te pastaj a te Nailpac' yu'un trato.

²² Te Bezaleel snich'an Urí, te smam Hur, ja' te sts'umbal Judá, ja' la spas spisil te bila mandal la yal Moisés te la yich' pasele.

²³ Ja' coltayot yu'un te Aholiab snich'an Ahisamac te sts'umbal Dan. Ja' la sna' stenel taq'uin, jalab, soc xch'alil ta ts'isel naubil stsotsil chij te bonbil ta morada, púrpura soc tsaj, soc t'ujbil lino.

²⁴ Spisil te oro te tuun ta pasel a te Nailpac' Templo, ja' te majt'anil oro la yaq'uic te lum ta stojol Cajwaltic, loc' ta spisil jteb ma loq'uemuc jmil kilo te yalale, (965 kilo soc 30 gramo), jich bit'il albil sc'oplal te sp'isol yalal ta ch'ul awilal.

²⁵ Te plata te la yich' tsobel te c'alal la yich' pasel te censo ta stsojbolic, loc' ta spisil oxmil soc balunlajuneb swaclajunwinic kilo soc jo'eb sjucwinic xcha'bajc' gramo te yalale, (3,319 kilo soc 525 gramo), jich te bit'il albil sc'oplal te sp'isol yalal ta ch'ul awilal.

²⁶ Spisilic la yac' sbaic ta censo te mach'atic c'axem ta jtab ya'wilal, loc' olil xcha'bajc' ta jmil soc oxmil soc lajuneb swaxacwinic xcha'bajc' (603,550) ta jtul. Juju-jtul la yaq'uic jo'eb soc olil gramo plata, jich bit'il albil sc'oplal sp'isol yalal ta ch'ul awilal.

²⁷ Ay oxmil soc jo'lajunwinic (3,300) kilo plata te la yich' ultesel yu'un yiptajib te Nailpac' Templo, soc yiptajib spac'al te la yich' tsalel ta olilal a. Spisil te plata ja' tuun yu'un te jo'winic yiptajibe, ja' oxlajuneb xcha'winic (33) kilo plata la yich' te jujun yiptajibe.

²⁸ Te plata la stsobic ta spisilic, ja' la spas Bezaleel a te staq'uinal la slucanbey ta oyetic, soc la spac'bey sjol a te oyetic, soc la spasbey a te ch'ocowetique.

²⁹ Te bronce la yaq'uic smajt'anin Cajwaltic te lume, loc' cha'mil soc waclajuneb sjuclajunwinic kilo soc jbajc' gramo, ta spisil (2,336 kilo soc 400 gramo).

³⁰ Ja' te bronce te la yich' pasel a te yiptajibic ta sti'il te Nailpac' te bay ya yich' c'oponel te Cajwaltic, te scajtijib ta chiq'uel milbil majt'anil soc srejail, spisil te bitic ya xtuun ta scajtijib te milbil majt'anil,

³¹ te yiptajibic te scorralil te Nailpac' Templo, te estacaetic yu'un, soc te yiptajibic ta sti'il te scorralile.