Éxodo 37 - Bible in Tzeltal de Oxchuc y Tenejapa

La yich' pasel scajonil trato

¹ Te Bezaleel la spas te scajonil trato ta acacia. Jun metro soc lajuneb centímetro sp'isol te snajt'ile. Jo'eb xchanwinic (65) centímetro te sjamalule, soc jo'eb xchanwinic (65) centímetro te stoylejale.

² La spac'bey ta potsel ta lequil oro ta yutil soc ta spat. La sbech'bey pimil oro ta sjoyobal ta xch'ujt'.

³ La spasbey chaneb xch'ocowil ta oro ta xchanebal te yacane. Che'cheb la yac'bey ta juju-jejch'.

⁴ La spasbey sq'uechjibal ta acacia, la spac'bey ta potsel ta oro.

⁵ La xij c'axel ta ch'ocowetic ta juju-jejch' te cajón, swenta yu'un ya sq'uechic bael a.

⁶ La spasbey smajq'uil ta mero lequil oro ta bay ya jtatic perdón. Jun metro soc lajuneb centímetro sp'isol te snajt'il, jo'eb xchanwinic (65) centímetro te sjamalule.

⁷ La spas cheb sloc'ombail querubinetic ta oro, la sten ta martillo, jujun la yac' ta juju-jejch' ta sba sti'il te yawil perdón.

⁸ Te yawil perdón jun nax la spas loq'uel soc te cheb sloc'ombail querubinetic. Jun la stejc'an loq'uel ta jejch' sti'il, soc jun ta yan sti'il te yawil perdone.

⁹ Jich la yil sbaic jujun; ja'uc me to, la yac'bey stinan sbaic coel ta yilel te yawil perdone. Te xiq'uique la yac'bey slich' sbaic, yu'un yac ta yac'beyel yaxinal yilel te yawil perdone.

La yich' pasel mesa yu'un ch'ul waj

¹⁰ Te Bezaleel la spas jun mesa ta acacia. Lajuneb yo'winic (90) centímetro sp'isol te snajt'il, jo'eb yoxwinic (45) centímetro te sjamalul, soc jo'eb xchanwinic (65) centímetro te stoylejale.

¹¹ La spac'bey ta potsel ta oro te mesa, la sbech'bey pimil oro ta sjoyobal.

¹² La spasbey xch'ujte'al, juqueb centímetro te sjamalule. La sbech'bey pimil oro ta sjoyobal te sti'ile.

¹³ La spasbey chaneb xch'ocowil ta oro, jujun la yac'bey te juju-jejch' xchiquin te stojol ay soc yacan te xchanebale.

¹⁴ Te bit'il pajal la yac' soc te sti'il, jich lec c'ax bael te sq'uechjibal te ya xju' ya yich' q'uechel bael a te mesae.

¹⁵ Te sq'uechjibal mesa la spas ta acacia, soc la spac'bey ta potsel ta oro.

¹⁶ Spisil te bitic ya xtuun ta sba te mesa, la spas ta lequil oro, ja' te platoetic, te muc'ul cucharaetic, oxometic soc te tazaetic te ya xtuun yu'un te majt'anil te ay ya'lel ya xtale.

La yich' pasel scajtijib c'ajq'uetic pasbil ta oro

¹⁷ Te Bezaleel la spas te scajtijib c'ajq'uetic ta lequil oro. La spas ta martillo te snactijib, te ste'el, te swolwolil soc te xyaxal spat nichim ta yolil yilele. Jun nax loc' ta pasel yu'un spisil a.

¹⁸ La sloq'uesbey waqueb sc'ab ta bay xch'ujt', oxeb ta juju-jejch'.

¹⁹ Te juju-jch'ix sc'ab ta swaquebalic te loq'uemic ta xch'ujt' te ste'el, ay swolwolil la yac'bey te pajal yilel soc te snich almendro, te xyaxal spat soc te snichimal ta yolile.

²⁰ Te ste'el ay chaneb swolwolil. Ja' nix pajal yilel soc te snich almendro, te xyaxal spat soc te snichimal ta yolile.

²¹ Te yoxebal sc'ab te pajal yiloj sbaic loq'uel ta ste'el te scajtijib c'ajq'ue, juju-jch'ix la yac'bey xyaxal spat nichim yilel ta bay yet'al.

²² Te xyaxal spat nichim yilel soc te sc'abc'abe, jun nax a c'ot ta loq'uel yu'un te scajtijib c'ajq'ue. Ta lequil oro la spas ta martillo.

²³ La spasbey juqueb ch'in c'ajq'uetic soc te stup'jibal te smechail c'ajq'ue, soc te xch'in splatoile.

²⁴ Te bit'il pastaj te scajtijib c'ajq'uetic soc te bitic ya xtuun yu'une, oxlajuneb xcha'winic (33) kilo te oro te tuun yu'une.

La yich' pasel scajtijib ta chiq'uel pom

²⁵ Te Bezaleel la spasbey scajtijib ta chiq'uel pom ta acacia. Pajal xchiquin ta xchanxujc'ul la yac', jo'eb yoxwinic (45) centímetro te snajt'il, jo'eb yoxwinic (45) centímetro te sjamalul, soc lajuneb yo'winic (90) centímetro te stoylejale. Te xulubil te la yac'bey te juju-jejch' xchiquin, jun nax a loc' ta pasel yu'un.

²⁶ La spac'bey ta potsel ta oro ta sba, ta xchanjejch'el, soc xulubil. La sbech'bey pimil oro ta sjoyobal ta xch'ujt'.

²⁷ La yac'bey xch'ocowil ta oro ta yet'al te sbejch'ile. Jujun la yac'bey ta jujun xchiquin swenta yu'un ya sc'asesbey te sq'uechjibale, yu'un ya xju' ya yich' q'uechel bael a.

²⁸ Te sq'uechjibal la spas ta acacia, soc la spac'bey ta potsel ta oro.

Chajbaj aceite yu'un ch'ultesel, soc te pome

²⁹ Te Bezaleel la spas te aceite swenta ch'ultesel, soc te pom te capal soc lequil perfume. Jich la spas te bit'il mach'a ya sna' spasel perfumeetic.