Éxodo 36 - Bible in Tzeltal de Oxchuc y Tenejapa

¹ “Ja' yu'un te Bezaleel soc te Aholiab ja' me ya sju'tesic ta pasel spisil te bila mandal la yal te Cajwaltique. Ja' me ya sjoin sbaic ta at'el soc spisil mach'atic ay smajt'anic yu'un spasel bitic t'ujbil te ac'bilic sp'ijil yo'tanic yu'un Cajwaltic ta sna'el spasel ta lec spisil te bitic ya xtuun ta na'el Dios a ta bay te Nailpac' Templo —xi' te Moisese.

Te lum la yich'ic tel bayal majt'anil

² Te Moisés la yic' tel te Bezaleel soc te Aholiab, soc spisil te mach'atic ac'bil smajt'anic ta spasel te bila t'ujbil, te ja' ac'biliquix yu'un te Cajwaltique. Spisil talic ta coltaywanej ta spasemal yo'tanic yu'un te at'ele.

³ Ja'ic la stsac ta sc'abic te majt'aniletic la sc'ases te Moisés, te la yaq'uic israeletic, swenta yu'un ya xjajch' ta pasel a te Nailpac' Templo te tey ya yich' na'el a te Diose. Ja'uc me to, te israeletic, swenta jujun c'aal la yich'ic tel majt'anil te yacalic ta yaq'uel ta spasemal yo'tanique.

⁴ Jich yu'un te mach'atic ay sp'ijilic ta at'ele, yacaliquix ta spasel te Nailpac' Templo, la scom te yat'elique.

⁵ Ba yalbeyic te Moisés: —Te lume jelawix ta aq'uel yu'unic te bila ya xtuun yu'un te at'el te la yal mandal ta pasel te Cajwaltique —xiic.

⁶ Jich yu'un te Moisés la sticun bael c'op ta spamal te campamento yu'un te lume: “Spisil winiquetic antsetic ma me bi ya xchajbaniquix te ya yich'ic tel ta majt'anil yu'un spasel te Nailpac' Templo,

⁷ melel te bitic ya xtuun yu'un te at'ele, bayal la spasix sobrail”, xi' bael sc'op.

Jajch' ta pasel Nailpac' Templo

⁸ Te mach'atic ay smajt'anic ta spasel te bila t'ujbile, c'ax jich te bit'il te yantic j'at'eletic, la spasic te Nailpac' Templo. La sjalic lajunlijc' pac' ta ts'otbil lino soc ta naubil stsotsil chij bonbil ta morada, púrpura soc tsaj. Buen t'ujbil la xch'alic ta ts'isel soc sloc'ombail te querubinetique.

⁹ Te juju-jlijc' pac' ay lajchayeb metro soc olil te snajt'il, ja' cheb metro stuquel te sjamalule. Pajal nax sp'isol ta spisilic.

¹⁰ La snup' ta ts'isel yo'lijq'uil, la yac' sjel sba te sti'ile. Jich nix la spas te yan xan jo'lijq'ue.

¹¹ La yac'bey xchiquin ta sti'il te sbabiale, bonbil ta morada. Ja' nix jich la spasbey te xchebale.

¹² Te sbabial soc te xchebale la spasbey lajuneb yoxwinic (50) xchiquin. Nujp'ulnujp' la yac'bey yil sbaic te xchiquine.

¹³ Ja' nix jich la slucanlabey staq'uinal pasbil ta oro. Jich la syac ta xcha'lijq'uil a, jich jun nax a c'ot te nailpaq'ue.

¹⁴ Te Bezaleel la sjal buluchlijc' stsotsil tentsun ta swenta smujq'uil te Nailpaq'ue.

¹⁵ Te juju-jlijq'ue oxlajuneb metro soc olil te snajt'il, ja' cheb metro te sjamalule. Jich jun nax sp'isol c'ot ta spisilic.

¹⁶ La snup' ta ts'isel yo'lijq'uil. Jich nix la spas te yan waclijq'ue.

¹⁷ La spasbey lajuneb yoxwinic (50) xchiquin ta sti'il slajibal te sbabiale. Ja' nix jich lajuneb yoxwinic (50) xchiquin la spasbey ta sti'il slajibal te xchebale.

¹⁸ Jich nix la slucanlabey lajuneb yoxwinic (50) staq'uinal ta bronce, swenta yu'un jich jun nax ya xc'ot a te nailpaq'ue.

¹⁹ Te Bezaleel la spasbey smujq'uil te Nailpac' Templo te pasbil ta snujc'ulel tat chij te bonbil ta tsaje. Soc la spasbey xan smujq'uil ta slajibal ta sba, la yac'bey t'ujbil nujc'uletic stuquel.

²⁰ La spasbey marcoetic ta acacia yu'un te Nailpac' Templo te toj la stejc'anlay.

²¹ Te juju-jlejch' marco chaneb metro soc olil te snajt'ile, jo'eb xchanwinic (65) centímetro te sjamalule.

²² La spasbey loq'uel slawux-te'el te ya snup' sba lec soc a te yane. Jich a c'ot ta pasel spisil te marcoetic yu'un te Nailpac' Temploe.

²³ La spas jtab ta lejch' marcoetic ta swenta stojol sur.

²⁴ La xchajbanbey cha'winic (40) yiptajib ta plata te ya yac' ta yet'ale. Te juju-jlejch' marco la xchajbanbey che'cheb yiptajib te bay cheb slawux-te'ele.

²⁵ Ja' nix jich ta bay yan jejch' te Nailpac' Templo ta stojol norte, la spasbey jtab ta lejch' marcoetic.

²⁶ La spasbey cha'winic (40) yiptajib ta plata, swenta yu'un te juju-jlejch' marco ta yet'al, ay me che'cheb yiptajib ya yac'bey.

²⁷ Ta bay spat ta smalib c'aal te Nailpac' Temploe, la spasbey waclejch' marcoetic.

²⁸ Soc la spasbey xan cha'lejch' marco ta swenta jujun xujc' ta smalib c'aal.

²⁹ Che'cheb la sjoin sbaic, c'alal to ta cajal ta bay sbabial te xch'ocowile, jich la xchajban te cheb marco ta swenta te jujun xujq'ue.

³⁰ Ja' yu'un ay waxaqueb marcoetic soc ay waclajuneb yiptajib ta plata. Te juju-jlejch' marco ay che'cheb yiptajib ta yet'al.

³¹ Te Bezaleel la spasbey jo'ch'ix ste'el ta acacia ta bay jejch' marcoetic ta spat te Nailpac' Temploe.

³² Jich nix la spasbey jo'eb ste'el te yan jejch'e. Ja' nix jich jo'eb la spasbey ste'el te marcoetic ta bay spat ta smalib c'aale.

³³ La spasbey jch'ix ste'el te ya xtuun ta olilal te ya xc'ot ta loq'uel te juju-jejch' te xujq'ue. Mero olil la yac'bey c'axel ta spat te marcoetique.

³⁴ La spac'bey ta potsel ta oro te marcoetique, la spasbey xch'ocowil ta bay ya xc'ax te ste'el pac'bilix ta oroe.

³⁵ La spas te pac' te ya stsal ta maquel ta olil te Nailpac' Temploe. La sjal ta naubil stsotsil chij te bonbil ta morada, púrpura soc tsaj, soc ta ts'otbil lino. Buen t'ujbil c'ot ta ch'alel soc sloc'ombail te querubinetique.

³⁶ La slucanlabey staq'uinal ta oro, la sjoc'an tey a. La yac'bey chaneb yoyal ta acacia. La spac' ta potsel ta oro, soc la yac'bey chaneb yiptajib ta plata.

³⁷ Ta yochibal te Nailpac' Templo la spasbey spac'ul ta jalbil naubil stsotsil chij te bonbil ta morada, púrpura soc tsaj, soc ts'otbil lino. T'ujbil la xch'al ta ts'isel.

³⁸ La spasbey jo'eb yoyal, soc la slucanlabey staq'uinal, soc la spasbey jo'eb yiptajib ta bronce. La spac'bey ta potsel ta oro te oy ta bay sba moel soc te ch'ocowetic yu'une.