Éxodo 35 - Bible in Tzeltal de Oxchuc y Tenejapa

Mandalil yu'un cux-o'tanil

¹ Te Moisés la stsob spisil te slumal israeletic, jich la yalbey: —Te Cajwaltic la yalbon mandal te bila ya sc'an ya yich' pasel, jich la yal:

² “Waqueb me c'aal ya x'at'ejex. Yan ta sjuquebal c'aal ja' me cux-o'tan awu'unic. Ch'ultesbil cu'un swenta me quich'jibal ta muc' awu'unic. Te mach'atic ya spas yat'elic a, ya me x'ac'otic ta lajel.

³ Bayuc ya x'ainex, te bi c'aalil yu'un cux-o'tan, ma me ayuc bila ya apasic ni jtebuc c'ajc'”, la yut —xi' te Moisese.

Majt'anil yu'un Nailpac' Templo

⁴ Te Moisés la sc'opon xan ta spisil te slumal israeletic, jich la yalbey: —Ja' mandal yu'un Cajwaltic te ya sc'an ya yich' pasele:

⁵ Tsobaic laj majt'anil yu'un te Cajwaltique. Spisil te majt'anil ya cac'beytic Cajwaltic, spasemaluc laj me co'tantic ta jyalel. Ya me quich'tic tel oro; plata; bronce;

⁶ naubil stsotsil chij bonbil ta morada, púrpura soc tsaj; ts'otbil lino; stsotsil tentsun;

⁷ snujc'ulel chij te bonbil ta tsaj; t'ujbil nujc'uletic; acacia;

⁸ aceite yu'un te c'ajq'uetic; perfumeetic yu'un te aceite swenta ch'ulteswanej; pom;

⁹ tonetic te cornalina sbiile; soc yantic t'ujbil tonetic te ya xtuun ta efod, soc ta bolsa ay ta stan te muc' sacerdotee.

Bitic ya xtuun ta Nailpac' Templo

¹⁰ “Spisil te mach'atic ay sp'ijil yo'tanic ac'a taluc ta spasel spisil te bila mandal yaloj te Cajwaltique:

¹¹ Ja' te Nailpac' Templo soc te snailpac'al, te smujq'uil te snailpac'al, te staq'uinal te lucajtique, te marcoetic, te sq'uechjibal, te oyetic, te yiptajibic,

¹² te scajonil trato soc te sq'uechjibal, te yawil perdón, te pac' ya smac a te cajone,

¹³ te mesa soc te sq'uechjibal soc spisil te bitic ya xtuun yu'une, te ch'ul waj ya x'ac'ot ta stojol te Cajwaltique,

¹⁴ te scajtijib c'ajq'uetic te bay ya yich'ic tilesel soc te bitic ya xtuun yu'une, te ch'in yawil c'ajq'uetic te ya x'ainic ta scajtijibe, te aceite yu'un te c'ajq'uetique,

¹⁵ te scajtijib ta chiq'uel pom ta bay ya yich' chiq'uel soc te sq'uechjibale, te aceite swenta ch'ultesel, te pom ay sbujts' yiq'ue, te smajq'uil pac' ta swenta yochibal te Nailpac' Templo,

¹⁶ te scajtijib ta chiq'uel milbil majt'anil, te reja yu'un te pasbil ta bronce soc te sq'uechjibal soc spisil te bitic ya xtuun yu'une, te yawil ja' soc te yiptajibe,

¹⁷ te paq'uetic yu'un te scorralil, soc te oyetic yu'un soc te snactijibique, te smajq'uil pac' ta yochibal te scorralile,

¹⁸ te estacaetic yu'un te Nailpac' Templo soc te scorralile, te xch'ajnulique,

¹⁹ te jalbil pac' te ya slap ta spasel yat'el a te sacerdoteetic ta ch'ul awilal, ja' te ch'ul sc'u'-spac' te sacerdote Aarón soc te sc'u'-spaq'uic ta sacerdoteil te snich'nabe —xi' te Moisese.

Te lum la yich' tel majt'anil

²⁰ Spisil te israeletic sujt'ic loq'uel ta stojol Moisés.

²¹ Ja'uc me to, ta spisilic te mach'atic te tijbot yo'tanic, mero spasemal yo'tanic la yich'ic tel majt'anil yu'un Cajwaltic, yu'un ya yich' pasel a te Nailpac' te bay ya yich' c'oponel, soc spisil te bitic ya xtuun tey a, soc te ch'ul c'u'iletique.

²² Talic te winiquetic soc te antsetic, spisilic la yich'ic tel, mero ta spasemal yo'tan la yaq'uic. La yich'ic tel slut'jibal sc'u'ic, yualil xchiquinic, xch'ocowic, staq'uinal snuc' sc'abic, soc spisil yantic te bitic t'ujbil ay yu'unic te pasbil ta oro. Juju-jtul la yich'ic tel t'ujbil majt'anil la yac'beyic te Cajwaltique.

²³ Te mach'a ay yu'unic te naubil stsotsil chij te bonbil ta morada, púrpura soc tsaj; te ts'otbil lino; te stsotsil tentsun; te snujc'ulel chij te bonbil ta tsaj; soc te t'ujbil nujc'uletic, la yich'ic tel ta spisilic.

²⁴ Te mach'atic la yaq'uic majt'anil ta plata soc bronce la yich'ic tel ta stojol te Cajwaltique. Te mach'atic ay yu'unic acacia la yich'ic tel, yu'un jich ya xmelts'aj spisil a te bitic ya sc'an pasele.

²⁵ Spisil te antsetic te ay sp'ijil yo'tanic ta spasel, la snauyic ta sc'abic te stsotsil chije. Jich la yich'ic tel te bila naubil yu'unic, ja' te bonbil ta morada, púrpura soc tsaj, soc te ts'otbil linoe.

²⁶ Te antsetic te tijbot yo'tanic la snauyic stsotsil tentsun.

²⁷ Te winiquetic te jtsobwanejetic la yich'ic tel t'ujbil tonetic te cornalina sbiile soc yantic t'ujbil tonetic te ya xtuun yu'un te efod, soc te ya xtuun yu'un te bolsa ay ta stan te muc' sacerdote.

²⁸ La yich'ic tel perfume, soc aceite yu'un te c'ajq'uetic, soc te aceite te ya x'och scap ta swenta ch'ultesele, soc te pom te ay sbujts' yiq'ue.

²⁹ Spisil te israeletic, winiquetic soc antsetic, la yich'beyic tel smajt'an Dios yu'unic ta swenta spasemal yo'tanic, ja' te jayeb mach'atic te tijbot yo'tanic yu'un te ya yaiyic coltaywanej ta at'el, yu'un jich ya yich' pasel spisil te bila albil mandal yu'un Cajwaltic te Moisese.

Mach'atic ya sna'ic spasel Nailpac' Templo

³⁰ Te Moisés, jich la yalbey te israeletic: —Aiya awaiyic stojol, ta yolil spisil te winiquetic yu'un Judá, ja' tsabilix yu'un te Cajwaltic te Bezaleel snich'an Urí, te ja' smam te Hur.

³¹ Nojesbilix ta yo'tan te espíritu yu'un Dios te ya sna'bey swentail ta lec te at'ele. Ay ta yo'tan te bila ya spase, soc yilojix ta spasel. Ay smajt'an yu'un xchicnantesel ta spisil.

³² Ya sna' snopel te bila ya sc'an ya spase, soc ya xju' ya xchicnantes te bitic ay ta pasel ta oro, o plata, o bronce.

³³ Ya sna' xch'ulel te' soc ya sna' snajc'anel te t'ujbil tonetique, ya sna' swaluyel te'etic, soc ya sna' spasel biluc t'ujbil ya sc'an ya yich' pasel.

³⁴ Ac'bil smajt'an yu'un p'ijteswanej. Ja' ya sjoin sba soc te Aholiab snich'an Ahisamac te sts'umbal Dan.

³⁵ Nojesbil ta yo'tanic sna'el spasel biluc at'elil ta swaluyel; soc ta snopel; soc te ya xch'al ta ts'isel soc naubil stsotsil chij te bonbil ta morada, púrpura soc tsaj, soc ta t'ujbil lino; soc ya sna' sjalel biluc paq'uil te yich'oj te bila t'ujbil ta ilel soque.