Éxodo 33 - Bible in Tzeltal de Oxchuc y Tenejapa

Cajwaltic la yal mandal te ya xbeenic xan

¹ Te Cajwaltic, jich la yalbey te Moisese: —Baan, loc'an bael soc te lum te la aloq'ues tel ta Egipto. Tey xbaex ta bay q'uinal calojbey te Abraham, Isaac soc Jacob, te ja' te ya cac'bey yu'uninic soc ja'ex te sts'umbalexe.

² Ya me jticun tel te ch'ul abat cu'une, ja' me ya yic'at bael. Ya me jticun loq'uel te cananeoetic, amorreoetic, hititaetic, ferezeoetic, heveoetic soc te jebuseoetique.

³ Tey xbaex a ta bay ya x'oquin leche soc chab c'oem. Te jo'one ma ba ya joinex bael teme repente ya jlajinex jilel ta be, melel ma xapejc'an abaic ta jyalel, ma xach'uunic mandal —xi'.

⁴ C'alal la yaiy stojol te lum te tulan c'op, bayal la smel yo'tanic yu'un. Jich te winiquetic antsetic ma ba la xch'al sbaiquix soc te xch'alilique,

⁵ yu'un yalojix Cajwaltic ta stojol te Moisese: —Albeya te alumal israeletic: “Jich la yal te Diose: ‘Te ja'ex mero tulan awo'tanic, ma xapejc'an abaic ta jyalel. Jich yu'un teme ayon ta awolilique, ajc' nax ya xlajex cu'un. Ja' yu'un loq'uesa te ach'alilique. Jich me ya jna' te bila ya jpas ta atojolique’, xi' te Diose,” uta me —xi' te Cajwaltique.

⁶ Jich yu'un te c'alal loq'uic bael ta wits Horeb te israeletic, ma ba la xch'al sbaiquix.

Nailpac' te bay ya yich' c'oponel Dios

⁷ Te Moisés la stsac jajch'el te Nailpac', la sloq'ues bael ta spat campamento, c'ub bael jtebuc. “Nailpac' te bay ya yich' c'oponel Dios”, xi' c'ot te sbiil yu'une. Te mach'a ay bila ya sc'an sjac' ta stojol te Cajwaltic, toj ya xbajt' ta Nailpac' Templo te loq'uemix bael ta yolilique.

⁸ Te c'alal ya xbajt' ta Nailpac' Templo te Moisés, spisil te lum ya stejc'an sbaic. Tejc'ajic ta bay sti' snailpaq'uic, yacalic ta yilel te Moisés ja' to c'alal ya x'och bael ta Nailpac' Templo.

⁹ Te c'alal nax ya x'och bael, ya xcoj tel te tocale. Tey mero ya yac' sba ta yochibal te Nailpac' Templo, te c'alal ya xc'opoj soc Cajwaltic te Moisese.

¹⁰ C'alal la yilic te tocal te lume, juju-jtul la squejan sbaic ta yalel wocol ta bay sti'il te snailpaq'uique.

¹¹ Te Dios la yilbey sba sit soc Moisés te c'alal c'opoj soque, jich bit'il ya xc'opojic te mach'a jun yo'tan sbaique. Patil te Moisés sujt' bael ta campamento. Yan te sjoy ta at'ele, ja' te Josué sbiil, te snich'an Nun, xujt' ma ba jil yu'un te Nailpaq'ue.

Cajwaltic la yac' ta ilel yutsil xojobil ta stojol Moisés

¹² Te Moisés jich la yalbey te Cajwaltique: —Ya calbat ta atojol, ja'at nix la awalbon te jo'on jtsobwanejon yu'un te lume; ja'uc me to, ma ba ya awalbon caiy te mach'a ya awac' sjoinon baele. Soc awalojbon te jun awo'tan ta jtojol: “Ya jna'bat aba ta lec soc lec c'oemat ta jsit”, te xaate.

¹³ Ja' yu'un, teme melele, ac'bon jna'bat te bila ay ta awo'tane, swenta yu'un jich me jun co'tan ta atojol te bit'il ya jna'bat aba ta leque. Jich me ya jna' te lec ya awilone. Na'a me te ja' lum awu'un in ants-winiquetic to —xi' te Moisese.

¹⁴ La yal te Cajwaltic: —Jo'onix me ya joinat bael, soc ya me cac'bat te bay ya acux awo'tan —xi'.

¹⁵ Te Moisés la sjac': —Teme ma ja'ucat nix ya ajoinotic baele, ma me xaloq'uesotic bael.

¹⁶ Melel teme ma la ajoinotic baele, ¿bit'il ya xna'ot te lec c'oemon ta asit te jo'one soc te lum awu'une? Melel ja' nax jich ya xchicnaj ta ilel jo'on soc te lum awu'un, te ma pajalucon soc te jyanlumetique —xi' te Moisese.

¹⁷ La yal te Cajwaltique: —Te bila la awalbone, jich nix ya jpasbat, melel jun co'tan ta atojol scaj te ya jna'bat aba ta lec soc te lec c'oemat ta jsite —xi'.

¹⁸ —¡Wocoluc, ac'bon quilbat yutsilal te axojobile! —xi' te Moisés.

¹⁹ Te Cajwaltic la sjac': —Ya jpas te ya jc'asesbat ta asit spisil te cutsilale, soc ya cal jilel ta atojol te jbiile. Chican co'tan jtuquel te mach'a ya jc'uxtaye, soc chican co'tan te mach'a ya jna'bey yo'bolil sbae.

²⁰ Ja'uc me to, jamal ya calbat, ma xju' ya awilbon te quelawe. Ma'yuc jtuluc winic ya xju' ya yilbon jsit te stalel cuxul ya xjile —xi'.

²¹ La yal te Cajwaltique: —Ya calbat awaiy, ay jochol ta jts'eel. Tejc'ana aba ta sba te p'ijom tone.

²² Te c'alal ya xc'ax yutsilal te jxojobile, ya cac'at ochel ta bay lomol ochel te tone. Ya me jmacat ta jc'ab, ja' to me te c'alal ya xc'axone.

²³ Ta patil ya me jq'uej bael te jc'ab te ya jmacat a. Ja' nax me ya awilbon c'axel te jpate; yan te quelawe ma xju' ta ilel —xi' te Diose.