Éxodo 30 - Bible in Tzeltal de Oxchuc y Tenejapa

Scajtijib ta chiq'uel pom

¹ “Pasbon jun scajtijib jmajt'an ta acacia, yu'un ya yich' chiq'uel pom a.

² Pajal me xchiquin ta xchanxujc'ul, jo'eb me yoxwinic (45) centímetro te snajt'il, soc ja' nix jich jo'eb yoxwinic (45) centímetro te sjamalule. Ja' me lajuneb yo'winic (90) centímetro stuquel te stoylejale. Te xulubiletic tey nix me ya xloc' ta pasel awu'un a.

³ Pac'beya ta potsel ta oro ta bay sba, soc ta xchanxujc'ul, soc te xulubiletique. Ya me abech'bey pimil oro ta sjoyobal.

⁴ Pasbeya ch'ocowiletic ta oro. Tey me ya awac' ta yet'al te pimil oro te bech'bil a, jujun me ya awac'bey ta jujun xchiquin. Tey me ya yich' xijel c'axel te sq'uechjibale.

⁵ Pasbeya sq'uechjibal ta acacia, pac'beya ta potsel ta oro.

⁶ Ac'a ta bay yelaw te pac' macal a te scajonil trato, ta stojol te yawil perdón te bay ya jta jbajtic ta c'ope.

⁷ Spisil ora ta jujun c'aal ta sab, te c'alal ya yich' chajbanel te c'ajq'uetique, te Aarón ya me xchic' pom te bujts'an yiq'ue, tey me a ta sba te scajtijibe.

⁸ Ta xmal c'aal ja' ni me jich ya xchic' te c'alal ya stsum te c'ajq'uetique. Ja' me jich ya yich' pasel ta stojol Cajwaltic ta spisil ora bael yu'un te patil alnich'anetique.

⁹ Ma me ayuc yan pom ya yich' aq'uel ta chiq'uel tey a, soc ma me ayuc milbil jmajt'an te ya yich' chiq'uel tey a, soc ma me xawac'bon te majt'anil harina, soc ma me xyich' malel vino tey a.

¹⁰ Ja' in scajtijib jmajt'an to ja' nax me cu'un jtuquel te Ajwalilone. Te Aarón jun me buelta jujun ja'wil ya yac'bey ch'ich' te xulubiletic yu'un te scajtijib jmajt'ane, ja' me xch'ich'el te milbil jmajt'an te ya yich' tael perdón yu'un a te amulique. Jun me buelta jujun ja'wil, pero spisil me ja'wil ya yich' ac'ulayel te xch'ich'el milbil jmajt'an, swenta yu'un ya ataic perdón yu'un a te amulique —xi' te Cajwaltique.

Stojol xcuxlejal ya yaq'uic israeletic

¹¹ Te Cajwaltic la sc'opon te Moisés, jich la yalbey:

¹² —Te c'alal ya awac' ta censo te israeletic, juju-jtul me ya yac'bonic taq'uin swenta stojol xcuxlejal ta jtojol jo'on te Ajwalilon, swenta yu'un jich me ma xlajic. Jich me ma'yuc tulan chamel swenta lajel ya xtal ta stojolic ta scaj te censoe.

¹³ Spisil mach'atic ochemiquix ta jun ya me yaq'uic taq'uin ta jtojol. Jo'eb me gramo yalal te plata ya yaq'uic, olil c'oem yu'un a te yalal te taq'uin albil sc'oplal ta ch'ul awilal.

¹⁴ Spisil te mach'atic ochemic ta jun te jtab ya'wilalic baele, ya me yaq'uic taq'uin ta jtojol te Ajwalilone.

¹⁵ Ja' me ya yaq'uic ta jtojol yu'un te xcuxlejalique. Ma me ja'uc c'axem ta jo'eb gramo plata ya yac' te jc'ulejetic, soc ni ma ja'uc peq'uel ya yac' te me'baetique.

¹⁶ Tsobeya te plata ya yaq'uic yu'un xcuxlejalic te alumal israeletique. Ya me awac' te ya xtuun yu'un te bila ay ta pasel a te Nailpac' te bay ya quich' c'oponele. Jo'on Ajwalilon, jich me ya jna' a te israeletic, soc tey me ya jna' a te la yac' te taq'uin yu'un te xcuxlejalique —xi' te Cajwaltique.

Yawil ja' pasbil ta bronce

¹⁷ Te Cajwaltic la sc'opon te Moisés, jich la yalbey:

¹⁸ —Pasa yawil ja' ta bronce, soc scajtijib. Ja' me ya xtuun ta swenta pocjibal. Tey me ya awac' ta yelaw te Nailpac' te bay ya quich' c'oponele, c'axel bael jtebuc ta bay scajtijib ta chiq'uel milbil jmajt'an. Nojesa ta ja'.

¹⁹ Tey me ya sloq'uesic ja' a te Aarón soc te snich'nab te ya spoc sc'abic soc te yacanique.

²⁰ Ya me spoc sbaic ochel ta Nailpac' te bay ya quich' c'oponele. Ja' ni me jich te c'alal ya xtalic ta bay scajtijib milbil jmajt'an te ya xba spas yat'el ta xchiq'uel milbil jmajt'an ta jtojol jo'on te Ajwalilone. Jich me ma xlajic.

²¹ Ac'a me spoc sc'abic soc yacanic swenta yu'un ma xlajic. Ja' jmandal ta sbajt'el q'uinal ta stojol Aarón soc sts'umbal ta cajalcaj bael —xi' te Cajwaltique.

Aceite swenta ch'ultesel

²² Te Cajwaltic la sc'opon xan te Moisés, jich la yalbey:

²³ —Lea atuquel ta bay mero lequic te bitic bujts'an yiq'ue: waqueb me kilo mero lequil mirra, oxeb kilo canela, oxeb kilo jalal yilel te ay yiq'ue,

²⁴ soc waqueb kilo spat te' te casia sbiile. P'isbil me yalal jich bit'il albil sc'oplal ta ch'ul awilal. Soc ich'a olil xchaneb litro te yaceiteil olivo.

²⁵ Pasa spisil te aceite swenta ch'ultesele. Jich me ya xc'ot ta chajbanel awu'un te bit'il mach'a ya sna' spasel perfume. Ja' me ch'ul aceite te ya xtuun ta swenta ch'ultesele.

²⁶ Ya me amal ta Nailpac' te bay ya quich' c'oponel, ta sba te scajonil trato,

²⁷ ta mesa soc spisil te bitic ay tey a, ta scajtijib ch'in c'ajq'uetic soc bitic ya xtuun tey a, ta bay xchic'jibal pom,

²⁸ ta scajtijib ta chiq'uel milbil jmajt'an soc spisil te bitic ya xtuun tey a, soc ta yawil ja' soc te snactijibe.

²⁹ Jich me ya awac'bon cu'unin, soc mero muc' ch'ultesbil ta jtojol ya xc'ot awu'un. Jich yu'un biluc a soc mach'auc a te ya xtal spic, ch'ultesbil me cu'un ya xjil.

³⁰ “Te aceite, malbeya ta sjol Aarón soc te snich'nab, yu'un ja' xch'ultesjibal ta sacerdoteil cu'un.

³¹ Albeya te israeletic, te ch'ul aceite cu'un ja' me ya xtuun yu'un te ya jch'ultes spisil a te bitic cu'une.

³² Ma me mach'auc nax ya amalbey ta sjol. Ma me mach'a ya sc'ain xchajbanel aceite jich bit'il to, ch'ul aceite me stuquel. Ja' yu'un jichuc c'otuc ta awo'tan te bit'il ch'ultesbil cu'un.

³³ Teme ay mach'a ya xchajban aceite te pajal soque, soc teme mach'auc nax ya smalbey ta sjole, jc'axel me ya yich' loq'uesel ta yolil te lume —xi' te Cajwaltique.

Sc'oplal pom

³⁴ Te Cajwaltic, jich la yalbey te Moisés: —Tsaca me te bitic bujts'an yic' te xch'ailele. Pajal me sp'isol ya awac' te juju-jchajbe: ja' te xuch'il te', te uña te bujts'an yiq'ue, te pom soc te gálbano.

³⁵ Chajbana ta spisil te ch'ul lequil pome. Ya me acap ta lec ta spisil, jich bit'il mach'a ya sna' spasel perfume.

³⁶ Buen lec me ya ajuch' oliluc. Ac'a me ta stojol scajonil trato ta Nailpac' te bay ya quich' c'oponele. Ja' te pom, mero cu'un me ya awaiy ta awo'tanic te ja'exe.

³⁷ Ma me xachajbanic yan pom te pajal soc te ya ac'an atuuntesic te bit'il la achajbanique. Ja' me cu'un jo'on Ajwalilon, soc ja' mero ch'ultesbil cu'un ya awaiy ta awo'tan.

³⁸ Te mach'a ya xchajban yan pom te pajal soc te ya sc'an smulanbey te sbujts'e, jc'axel me ya yich' loq'uesel ta yolil te lume —xi' te Cajwaltique.