Éxodo 3 - Bible in Tzeltal de Oxchuc y Tenejapa

Dios la yic' ta at'el Moisés

¹ Te Moisés ya scanantaybey xchij te snialmamal Jetro, te sacerdote yu'unic te madianetique. Ay la yic' c'axel te chijetic ta muc'ul jochol taquin q'uinal. C'ot c'alal ta nopol wits yu'un Dios te Horeb sbiile.

² Tey chicnaj ta stojol a te ch'ul abat yu'un te Cajwaltique, yac ta tilel c'ajc' ta yolil jpejt' ch'ix. La yil Moisés te yac ta tilel te ch'ixe; ja'uc me to, ma xlaj ta c'ajq'uel la yil.

³ Jich la yal ta yo'tan te Moisés: “Jchajp ya quil a. Ya xba quil bi yu'un te ma xc'ajc' te ch'ixe”, xi'.

⁴ Te Cajwaltic la yil te ya xtalix te Moisés. C'opoj Cajwaltic ta yolil te ch'ix te yac ta tilele, jich la yal: —¡Moisés! ¡Moisés! —xi' te Cajwaltique. —Li' ayon to —xi' te Moisés.

⁵ Jich yu'un Dios la yalbey: —Ma me xnoptsajat tel. Loq'uesa te axanab, melel te banti ayate, ch'ultesbil te q'uinale —xi' sc'oplal.

⁶ Soc la yal xan te Diose: —Jo'on Dioson yu'un te antiguo ame'-atate, Dioson yu'un Abraham, Isaac soc Jacob —xi'. Te Moisés la smac yelaw, yu'un la xi' sc'abuyel te Diose.

⁷ Te Cajwaltic jich la yal xan: —Mero chican ta jsit te bit'il ay swocol te lum cu'un ta Egipto. La caiybeyix stojol sc'opic ta scaj uts'inel yu'un te jwolwanejetic yu'un te tulan at'ele. Jna'ojbey ta lec te swocolique.

⁸ Jich yu'un coon tel ta scoltayel ta sc'ab te egipcioetique. Ya me jloq'ues bael, ya quic' bael ta bay jamal q'uinal ta leque, te banti ya staic te ya x'oquin leche soc chab c'oeme. Ja' te slumalinejic te cananeoetic, hititaetic, amorreoetic, ferezeoetic, heveoetic soc te jebuseoetique.

⁹ Ya calbat awaiy, caiyojbeyix stojol sc'opic te alumale, soc quiloj te bayal ayic ta uts'inel yu'un te egipcioetique.

¹⁰ Jich yu'un ya me xbeenat te ja'ate, ya me jticunat bael ta stojol te faraón, ya me aloq'uesbon tel ta Egipto te lum cu'un, ja' te alumal Israele —xi' te Diose.

¹¹ Te Moisés la yalbey te Diose: —¿Mach'aon ta ac'op a, Cajwal, te ya xboon ta stojol faraón te ya jloq'ues tel ta Egipto te jlumale? —xi'.

¹² La sjac' te Diose: —Ya me joinat te bit'il jo'on ya jticunate. Jich me ya ana' stojol a, te c'alal loq'uix tel ta Egipto awu'un a te lum cu'une, apisilic li' me ya xtal aquejan abaic ta jtojol ta bay wits to —xi'.

¹³ Te Moisés la sjac': —Te banti chujc'ul ya caiy ta co'tan, ja' teme ya xc'o calbey te jlumal: “Te Dios yu'un te antiguo jme'-jtatique ja' la sticunonix tel”, teme ya xc'o cute, teme ya sjojc'obonic, “¿Bi sbiil?”, teme xiique, ¿Bi ya calbey? —xi'.

¹⁴ La sjac' te Diose: —Albeya: “JO'ON TE JTALEL AYONE”, xi' te sbiile, uta me. Soc albeya te alumale: “TE STALEL AY, xi' te sbiile, ja' la sticunon tel ta atojolic”, uta me —xi'.

¹⁵ Te Dios la yalbey xan te Moisés: —Albeya xan te alumale: “Te Cajwaltic te Dios yu'un te antiguo jme'-jtatique, ja' te Dios yu'un Abraham, Isaac soc te Jacob, ja' la sticunon tel ta atojolic”, uta me. Ja' me te jbiile. Sbajt'el q'uinal ay, ma ba ya xch'ay sbajt'el q'uinal te jbiile.

¹⁶ Baan, tsoba te mamaletic ich'bilic ta muc' yu'un te alumal, albeya yaiyic: “Te Cajwaltic Dios yu'un te antiguo jme'-jtatique, te Dios yu'un Abraham, Isaac soc Jacob, la yac' sba ta ilel ta jtojol. La yalbon te stsacojbeyexix te ac'opique. Yiloj lajix te bila ya spasbeyex te egipcioetique.

¹⁷ Soc la yalbon te ya scoltayex loq'uel ta woclajel yu'unic. Ya me yiq'uex bael ta slumal cananeoetic, heveoetic soc te jebuseoetic, ta bay lumq'uinal te banti ya ataic te ya x'oquin leche soc chab c'oeme, xi' te Cajwaltique”, uta me.

¹⁸ Jich te mamaletic ya me yich'bat ta muc' te ac'ope. Ya me awalbey te ya xba ac'oponic soc te muc' ajwalil yu'un Egipto, jich me ya xc'o awalbey: “Te Cajwaltic te Dios cu'untic jo'otic te hebreootic tal sc'oponotiquix. Jich yu'un ya me awac'otic loq'uel te ya xbootic ta muc'ul jochol taquin q'uinal. Ya me xbeenotic ochel oxeb c'aal tey a. Yu'un ya xba cac'beytic smajt'an te Cajwaltic te Dios cu'untique”, ya me awut.

¹⁹ Ya jna' ta lec te ma xyac'at loq'uel te ajwalil yu'un Egipto ja' to teme ya yich' sujel.

²⁰ Ja'uc me to, ya me cac' ta ilel cu'el ta stojolic, ya me quejch'entes yu'un lajel te egipcioetic ta spisil ta jchajp at'eliletic ya cac'bey yil ta slumalic, jich to me ya yaq'uex loq'uel te faraón.

²¹ Soc ya me cac' te ayuc sc'oplal ta yo'tanic te egipcioetic te alumale, swenta yu'un te c'alal ya xloq'uic baele, ma me jocholuc sc'abic ya xbajt'ic.

²² Juju-jtul ants ya me sc'anbey te mach'a slac'oj sba soc sna, mach'auc me antsiluc a te pajal ay soque. Ac'a me sc'anbey loq'uel plata soc oro soc c'u'iletic. Ja' me ya awac'beyic sc'u'in te awal-anich'anique. Jich me ya apojbeyic loq'uel spisil te bitic ay yu'un te egipcioetique —xi' te Diose.