Éxodo 26 - Bible in Tzeltal de Oxchuc y Tenejapa

Ch'ul Nailpac' Templo

¹ “Pasa Nailpac' Templo ta lajunlijc' lino-pac' te lec ts'otbile, jalbil me ta stsotsil chij bonbil ta morada, púrpura soc tsaj. T'ujbil me xch'alil ta ts'isel sloc'ombail tey a te querubinetique.

² Pajal me sp'isol juju-jlijc' pac': Lajchayeb metro soc olil te snajt'ile, cheb metro te sjamalule.

³ Tsaca ta ts'isel yo'lijq'uil, ya me sjel sba juju-jtebuc te sti'ile. Ja' ni me jich ya apas te yan jo'lijq'ue.

⁴ Ya me anajc'anbey bayal xchiquin ta sti'il te sba lijq'uil pac' ta lijq'ue. Ts'otbil me te xchiquine, morada me te sbonile. Ja' ni me jich ya apas te yan lijq'ue.

⁵ Te sbabial soc te xchebale, ya me anajc'anbey lajuneb yoxwinic (50) xchiquin. Nujp'ulnujp' me ya yil sbaic te xchiquine.

⁶ Ya me alucanlabey lajuneb yoxwinic (50) staq'uinal te pasbil ta oro, swenta yu'un ya me syac sba ta xchebal. Jich me jun nax ya xc'ot ta swolol a te ch'ul awilale.

⁷ “Ya me apas bulucheb ta jlijc' jalbil stsotsil tentsun ta swenta smujq'uil ta sba te Nailpac' Templo.

⁸ Te juju-jlijq'ue pajal me te sp'isole: Oxlajuneb metro soc olil te snajt'ile, soc cheb metro te sjamalule.

⁹ Tsaca ta ts'isel yo'lijq'uil. Jich nix me xapas te yan waclijc' xane. Te swaquebale ya me apux tel ta yelaw te Nailpaq'ue.

¹⁰ Pasbeya lajuneb yoxwinic (50) xchiquin, najc'anbeya ta sti'il te jlijc' ta slajibale. Jich nix me lajuneb yoxwinic (50) xchiquin ya apasbey ta sti'il te xcha'lijq'uile.

¹¹ Ya me alucanlabey lajuneb yoxwinic (50) staq'uinal pasbil ta bronce. Tey me ya awac' soc a te xchiquin te yane, swenta yu'un jun nax me ya xc'ot ta swolol a te Nailpac' Temploe.

¹² Te bit'il najt'ic te juju-jlijq'ue, te olil ya spas jilel sobraile, ya me xlijc'ajic coel ta spat te Nailpac' Templo.

¹³ Jich me ya smucbey coel a ta xchebal spat te sobraile. Jo'eb yoxwinic (45) centímetro ya xjil te jun spate, soc ja' nix jich jo'eb yoxwinic (45) centímetro ya xjil te yane.

¹⁴ “Pasbeya smujq'uil te Nailpac' Templo ta snujc'ulel tat chijetic te bonbil ta tsaje, soc muca xan ta t'ujbil nujc'uletic ta mero sba.

¹⁵ “Pasa marcoetic ta acacia yu'un te Nailpac' Templo te toj ya atejc'anlaye.

¹⁶ Te jujun marco chanchaneb metro soc olil te snajt'ile, jo'eb xchanwinic (65) centímetro stuquel te sjamalule.

¹⁷ Che'cheb me ya apasbey loq'uel slawux-te'el te jujun marco, yu'un me ya snup' sba ta lec soc a te yane. Jich me xapasbey spisil te yantic marcoetic yu'un te ch'ul awilal.

¹⁸ Te c'alal ya apase, jtab me marcoetic ya awac' ta stojol sur.

¹⁹ Ya me awac'bey cha'winic (40) snactijib ta plata ta yet'al te marcoetique. Te jujun marco cheb me snactijib ya yich' ta swenta te cheb slawux-te'ele.

²⁰ “Jich me xapas ta yan spat te Nailpac' Templo ta stojol norte. Ja' ni me jich jtab marcoetic tey a.

²¹ Jich nix me cha'winic (40) snactijib plata ya awac'bey, swenta yu'un ta yet'al jujun marco ay me cheb snactijib tey a.

²² Ta spat te Nailpac' Templo ta stojol smalib c'aal, waqueb me marcoetic ya apasbey stuquel.

²³ Cheb xan me marcoetic ya apasbey ta swenta jujun xujc' ta spat.

²⁴ Che'cheb me ya awac' sjoin sbaic c'alal to ta cajal ta bay sbabial te xch'ocowile. Jich nix me ya achajban te cheb marcoetic ta swenta te jujun xujq'ue.

²⁵ Ay me waxaqueb marcoetic, soc waclajuneb snactijib pasbil ta plata, melel cheb snactijib ya yich' ta yet'al te jujun marcoe.

²⁶ “Ya me apasbey jo'ch'ix ste'el ta acacia ta swenta te marcoetic ta yan spat te Nailpac' Templo.

²⁷ Ja' nix jich jo'ch'ix ta yan spat, soc jo'ch'ix ta spat ta stojol smalib te c'aale.

²⁸ Ay me ste'el ya xc'ax ta olilal ja' to me ya xc'ot ta loq'uel ta jujun spat te sti'ile. Mero olil me ya awac' c'axel ta spat te marcoetique.

²⁹ Ja'uc me to, ya me apac'bey ta potsel ta oro te marcoetic soc pasbeya ch'ocowiletic ta oro. Jich me xapac'bey ta potsel ta oro te ste'ele. Ya me axij c'axel ta bay te ch'ocowiletique.

³⁰ Pasa me te ch'ul awilal jich bit'il ac'botat awil seña sp'isol ta wits.

³¹ “Ya me apas pac' te ya atsal ta maquel a te yutil ch'ul awilal. Jalbil me ta naubil stsotsil chij te bonbil ta morada, púrpura soc tsaj, soc ta ts'otbil lino. T'ujbil me ya yich' ch'alel ta ts'isel ta pasel sloc'ombail tey a te querubinetique.

³² Ya me alucanlabey staq'uinal te pasbil ta oro, tey me ya ajojc'an a. Chaneb me yoyal ya apasbey ta acacia. Ya me yich' paq'uel ta potsel ta oro, soc ay me snactijib ta plata.

³³ Jojc'ana tey a soc te staq'uinale. Jich yu'un te scajonil trato tey me ya awac' ochel ta yutil te tsalbil ta paq'ue. Jich tsalbil ya xjil te Ch'ul Awilale, soc jtsal me ya xc'ot te Mero Ch'ul Awilale.

³⁴ Cajana ta sba te smajq'uil sti' scajonil trato, ta bay te Mero Ch'ul Awilal.

³⁵ Ac'a te mesa ta spat te paq'ue ta stojol norte yu'un te Ch'ul Awilale. Te scajtijib c'ajq'ue ac'a ta stojol sur ta bay stojol te mesae.

³⁶ “Ya me apasbey smajq'uil pac' ta yochibal te Nailpac', jalbil me ta stsotsil chij bonbil ta morada, púrpura soc tsaj, soc te lequil ts'otbil linoe. Buen lec me ya yich' ch'alel ta ts'isel.

³⁷ Ya me apasbey jo'eb yoyal ta acacia. Ya me apac' ta potsel ta oro, soc ya me alucanlabey staq'uinal te pasbil ta oro, soc ya me apasbey jo'eb snactijib ta bronce te oyetique.