Éxodo 25 - Bible in Tzeltal de Oxchuc y Tenejapa

Majt'anil swenta spasel Nailpac' Templo

¹ Te Cajwaltic, jich la yalbey te Moisese:

² —Albeya te israeletic, ac'a stsobonic jmajt'an. Ya me stsobonic te jayeb ya sc'an yo'tanic spisil te mach'atic mero spasemal yo'tan ya yaq'uique.

³ Te majt'anil ya yich' tsobele: ja' te oro; plata; cobre;

⁴ naubil stsotsil chij bonbil ta morada, ta púrpura soc ta tsaj; t'ujbil lino; stsotsil tentsun;

⁵ snujc'ulel chij te bonbil ta tsaj; t'ujbil nujc'uletic; acacia;

⁶ yaceiteil sit olivo yu'un ch'in c'ajq'uetic; perfumeetic te ya yich' capel soc aceite te ya xtuun cu'un ta ch'ulteswanej soc te ya yich' capel soc pom te bujts'an yiq'ue;

⁷ cornalina; soc yantic t'ujbil tonetic te ya xtuun ta swenta te efod soc ta swenta te bolsa ay ta stan te muc' sacerdote.

⁸ Ya me apasbonic ch'ul awilal, yu'un tey me ya x'ainon ta awolilic.

⁹ Jich me xapas ta spisil te bit'il ya cac'bat awile. Te bi yilel sp'isol te Nailpac' Templo soc spisil te bitic ya xtuun tey a, jich me xapas te bit'il seña ya cac'bat awile.

Scajonil trato

¹⁰ “Pasa jun cajón ta acacia. Te sp'isole jun metro soc lajuneb centímetro te snajt'ile, jo'eb xchanwinic (65) centímetro te sjamalule, soc jo'eb xchanwinic (65) centímetro te stoylejale.

¹¹ Ya me apac'bey ta potsel ta jayal oro ta yutil soc ta spat ta swolol. Ya me abech'bey pimil oro ta xch'ujt' ta sjoyobal.

¹² Ya me apasbey xch'ocowil ta oro, cheb me xawac'bey ta jujun xujc' yacan.

¹³ Ya me apasbey cheb ste'el ta acacia swenta sq'uechjibal te ya axij c'axele. Ya me apac'bey ta potsel ta jayal oro te ste'ele.

¹⁴ Xija c'axel ta xch'ocowil te ayic ta jujun xujc' te scajonile, jich me ya aq'uechic bael a.

¹⁵ Ma me xaloq'ues te ya axij c'axele, jich me ac'a jiluc ta xch'ocowil te cajone.

¹⁶ Ac'a ochel ta yutil cajón te mandalil ya cac'bate.

¹⁷ “Pasbeya smajq'uil sti' ta bay ya jtatic perdón ta lequil oro. Jun metro soc lajuneb centímetro te snajt'ile, soc jo'eb xchanwinic (65) centímetro te sjamalule.

¹⁸ Cheb sloc'ombail querubinetic ya apasbeyic, ya me atenic ta martillo ta xcha'jejch'el te smajq'uil sti'e.

¹⁹ Jun nax ya xloc' ta pasel soc te cheb querubinetique. Jujun me ya xc'ot ta juju-jejch' te yawil perdone.

²⁰ Ya me awac'bey yil sbaic soc ya me awac' stinan sbaic coel ta yilel te yawil perdone. Te xiq'uique ya me awac' slich' sba, ja' me ya yac'beyic yaxinal a te yawil perdone.

²¹ Macbeya coel sti' a te cajone. Tey me ya awac' ochel a te mandalil te ya cac'bate.

²² Tey me ya jta jbajtic ta c'op ta sba te smajq'uil sti' ta yolil te cheb querubinetic te ay ta sba scajonil te trato. Tey me ya cac'bat ana' spisil a te bila mandal ya calbat yu'un te israeletique.

Mesa yu'un ch'ul waj

²³ “Pasa jun mesa ta acacia. Lajuneb yo'winic (90) centímetro te snajt'ile, soc jo'eb yoxwinic (45) centímetro te sjamalule. Ja' me jo'eb xchanwinic (65) centímetro stuquel te stoylejale.

²⁴ Pac'beya me ta potsel ta oro. Bech'beya pimil oro ta sjoylejal te sti'ile.

²⁵ Pasbeya xch'ujte'al ta sjoylejal, juqueb centímetro me te stoylejale. Bech'a ta pimil oro ta sjoylejal.

²⁶ Ya me apasbey chaneb xch'ocowil. Jujun ya awac'bey xch'ocowil te jujun xujc' xchiquin ta stojol te yacane, jich me ta xchanebal.

²⁷ Jich me pajal ya xc'ot soc te xch'ujte'al, swenta yu'un tic' me ya xc'ax tey a te ste'el te sq'uechjibale. Jich ya xju' ya yich' q'uechel bael a te mesa.

²⁸ Te sq'uechjibal mesa, ja' me ya apas ta acacia, ya me apac'bey ta potsel ta oro.

²⁹ Ya me apasbey splatoil ta lequil oro, soc muc'ul cucharaetic, oxometic, tazaetic te ya xtuun yu'un te majt'anil, te ay ya'lel ya xtale.

³⁰ Tey me ya awac' ta mesa spisil ora te ch'ul waj cu'une.

Scajtijib c'ajq'uetic ta oro

³¹ “Ya me apas scajtijib c'ajq'uetic ta lequil oro, ya me apas ta puro martillo. Jun nax me ya xloc' ta pasel spisil soc te snactijib, te ste'el, te swolwolil soc te xyaxal spat snichimal ta yolil yilele.

³² Ya me aloq'uesbey waqueb sc'ab, oxeb me ta juju-jejch'.

³³ Ta juju-jch'ix ta swaquebal te sc'abe, oxeb me ya apasbey swolwolil, te pajal yilel soc te snich almendro soc te xyaxal spat snichimal ta yolile.

³⁴ Yan ta ste'el ta yolil te scajtijib c'ajq'uetic, chaneb me ya apasbey swolwolil, te pajal yilel soc snich almendro ta yolile.

³⁵ Ay me jun xyaxal spat snich almendro yilel ta yet'al ta bay jajch'em juju-jchajp te yoxchajbal sc'abc'abe, jun nax me loq'uem ta pasel soc ste'el te scajtijib c'ajq'uetique.

³⁶ Ta spisil ya me apas ta lequil oro te ya aten ta martillo.

³⁷ Soc ya me apasbey juqueb ch'in c'ajq'uetic. Ya me acajan tey a swenta yu'un ya xojobaj tel ta elawal.

³⁸ Ya me apasbey stup'jibal te smechail c'ajq'ue, soc te ch'in splatoil yu'une, ta lequil oro me xapas.

³⁹ Ta swenta oxlajuneb xcha'winic (33) kilo te oro ya apas a te scajtijib c'ajq'uetic soc ta spisil te bitic ya xtuun yu'une.

⁴⁰ Ya me anop ta lec te señail, yu'un jich me ya apas te bit'il la cac'bat awil ta witse.