Éxodo 24 - Bible in Tzeltal de Oxchuc y Tenejapa

La yich' aq'uel yip trato

¹ Te Cajwaltic, jich la yalbey te Moisés: —Moan tel soc Aarón, Nadab soc Abiú, soc xan te lajuneb xchanwinic (70) mamaletic ich'bilic ta muc' yu'un te israeletique. Li' xtalex te banti ayon to, ja'uc me to c'ubul me ya x'ainex, soc ya me aquejan abaic.

² Ja'at nax me atuquel ya xtalat ta jtojol, ma me xtal stuquel te yantique. Ma me sjoinex moel tel te lume —xi'.

³ Te Moisés ba yalbey te lum ta spisil te bila la yal te Cajwaltic soc te mandal la yale. Ta spisilic jun nax la sjaq'uic: —Ya jpastic ta spisil te mandal la yal te Cajwaltique —xiic.

⁴ Te Moisés la sts'ibuy spisil te bila la yal te Cajwaltique. Ta yan c'aal ta buen sab jajch' ta spasel scajtijib ta chiq'uel te milbil smajt'an Dios ta yet'al wits. La slats lajchayeb tonetic te ch'ultesbilique, jujun ta swenta juju-jchajp sts'umbal te israeletique.

⁵ La yalbey te queremetic te ya xba smilbeyic smajt'anin Cajwaltic toroetic te ya xchic'bey scojt'ol, soc ay ya yac'bey smajt'anin swenta seña lamal-o'tanil.

⁶ Te Moisés la xch'ambey te xch'ich'ele, olil la yac' ta muc'ul tazaetic. Te olil xane tey la stsijts'an a ta bay te scajtijib ta chiq'uel te milbil smajt'an te Diose.

⁷ La stsacbey slibroil te trato, soc la yawtaybey yaiy ta stojol te lume. Jich la yalic yu'un: —Ya me jpastic spisil te bila ya sc'an te Cajwaltic, ya me jch'uunbeytic te sc'ope —xiic.

⁸ Te Moisés la stsac xan te taza te nojel ta ch'ich', la stsijts'anbey ta stojol te lume. Jich la yal: —Ja' in ch'ich' to ja' me ya yac'bey yip te trato te xchapoj Cajwaltic ta jtojoltic ta swenta spisil te aiyejetique —xi' te Moisés.

⁹ Te Moisés mo bael ta wits soc Aarón, Nadab, Abiú soc xan te lajuneb xchanwinic (70) mamaletic yu'un te Israele.

¹⁰ Tey la yilic a te Dios yu'unique. Ta yet'al yacan ay bila mero yax la yilic jich bit'il ch'ulchan, jich bit'il piso pasbil ta lequil zafiro-ton te jich yilel bit'il mero q'uepel te q'uinale.

¹¹ Ma'yuc bila pasbotic yu'un Dios te israeletic te bit'il la yilique. We'ic, uch'ajic ta spisilic.

Moisés ay ta wits Sinaí

¹² Te Cajwaltic, jich la yalbey te Moisese: —Moan tel ta wits ta banti ayon, tey me ya amaliyon a. Yu'un ya cac'bat pejch'el tonetic te tey ts'ibubil cu'un a te mandaliletic swenta sp'ijtesjibal te israeletique —xi'.

¹³ Jich mo bael ta wits te Moisés soc te sjoy ta at'ele, ja' te Josué. Bajt'ic ta bay wits yu'un Dios.

¹⁴ Yan te mamaletic yu'un Israel, jich la yalbey jilel: —Maliyawon li'to ja' to me teme sujt'otic tele. Ja' me ya ajoinic jilel te Aarón soc Hur. Teme ay mach'a ay c'opetic yu'une, ja' me ya xba awalbey ta stojolic —la yut jilel.

¹⁵ C'alal laj yo'tan ta c'op te Moisés, mo bael ta wits. Te witse potsbil yu'un te tocale.

¹⁶ Te xojobil yutsilal te Cajwaltic, tey jul ta sba te wits Sinaí. Waqueb c'aal potsol ta tocal te witse. Ta sjuquebal c'aal c'oponot tel yu'un Cajwaltic te Moisés ta tocal.

¹⁷ Te xojobil Cajwaltic jul ta stojolic te israeletique. Jich chicnaj tel ta sitic ta bay mero slajibal sjol te wits jich bit'il c'ajc' te ya xlajinwan te yipe.

¹⁸ Och bael Moisés ta yolil te tocale, mo xan bael ta wits. Tey jalaj cha'winic c'aal soc cha'winic ajc'ubal a.