Éxodo 20 - Bible in Tzeltal de Oxchuc y Tenejapa

Lajuneb mandaliletic

¹ Dios la yal spisil in mandaliletic to:

² —Jo'on Ajwalilon, te Dioson awu'une, te la jloq'uesat ta Egipto ta banti ayat ta mozoile.

³ “Ma me ayuc yan diosetic awu'un, melel jo'on nax me jtuquel te Dioson awu'une.

⁴ “Ma me xapas awajcanan. Ma me xapasbey sloc'ombail bitic ayic ta stoyolil ch'ulchan, soc bitic ayic ta lumq'uinal, soc bitic ayic ta mar ta yet'al te lumq'uinale.

⁵ Ma me xaquejan aba ta stojolic, ma me xach'uunic. Melel jo'on Ajwalilon te Dioson awu'une. Jo'on Dioson te jc'axel ma jmulan teme ya ale yantic diosetic awu'un. Ya cac'bey castigo yu'un smulic te me'il-tatiletic ya yilayonique, soc te snich'nabic ta yoxcajal soc ta xchancajal.

⁶ Yan te mach'atic c'uxon ta yo'tanic te ya xch'uunbonic te jmandale, ya jc'uxtay jmil ta caj soc yal-snich'anic stuquelic.

⁷ “Ma me xatojoltabon ta alel jbiil te Ajwalilon te Dioson awu'une, melel te mach'a ya stojoltabon ta alel jbiil te Diosone, ya me cac'bey castigo yu'un.

⁸ “Na'a me te bi c'aalil yu'un cux-o'tan, te ja' swenta ch'ultesel ta jtojol te Ajwalilone.

⁹ Waqueb nax me c'aal ya x'at'ejat, ja' me ya apas spisil a te awat'el te pasel ya sc'an awu'une.

¹⁰ Yan te sjuquebal c'aal ja' me yu'un cux-o'tan stuquel, ch'ultesbil me ta jtojol te Ajwalilon te Dioson awu'une. Ma me x'at'ejatix a, ni ja'uc awal-anich'nab, awabat, acriada, achambalam soc te jyanlum ants-winic te ay ta alumale.

¹¹ Melel te Ajwalilone, waqueb nax c'aal la jpas te ch'ulchan balumilal, te mar soc spisil te bitic aye. Ta sjuquebal c'aal la jcux co'tan, la cac'bey bendición, soc ch'ultesbil c'ot cu'un.

¹² “Ich'a ta muc' te ame'-atate, swenta yu'un ya me xnajt'aj acuxlejal ta aq'uinal te ya cac'bat te Ajwalilon te Dioson awu'une.

¹³ “Ma me x'awaiy milaw.

¹⁴ “Ma me x'awaiy mulwej.

¹⁵ “Ma me x'awaiy elec'.

¹⁶ “Ma me x'ochat ta lotil testigo ta stojol apat-axujc'.

¹⁷ “Ma me xbic'taj awo'tan yu'un sna te apat-axujq'ue: Ma me xbic'taj awo'tan yu'un yinam, yabat, scriada, swacax, sburro soc te bitic ay yu'une —xi' te Diose.

Israeletic la xi'ic Dios

¹⁸ Te israeletic la yaiyic t'om chawuquetic soc la yilic tsantsewaletic, la yaiyic stojol c'opoj xulubiletic, soc te bit'il potsot ta ch'ail te witse, xiw yo'tanic yu'un, q'uejel to la yac' sbaic.

¹⁹ Jich la yalbeyic te Moisés: —Ja'at xac'oponotic atuquel, ya me jch'uuntic. Ma xju' cu'untic te ya sc'oponotic te Diose, repente ya xlajotic yu'un te sc'ope —xiic.

²⁰ Te Moisés la sjac': —Ma me xiwex, tal nax yaiybeyex awo'tanic te Diose. Jich me ya sc'an ya axi'ic swenta yu'un ma xale amulic —xi'.

²¹ Te lum q'uejel la yac' sbaic. Te Moisés la slac' bael te ijc'al tocal te banti ay te Diose.

Mandalil yu'un scajtijib ta chiq'uel smajt'an Dios

²² Te Cajwaltic, jich la yalbey te Moisés: —Jich me xawalbey te alumal israeletique: “Ja'ex la awiliquix te c'alal ta ch'ulchan la jc'oponex tele.

²³ Jich yu'un ma me xapasic loc'ombaetic ta oro soc ta plata te ya ach'uunique.

²⁴ Pasbonic scajtijib ta chiq'uel jmajt'an ta ts'ubil lum. Milbonic jmajt'anin te achambalamique, ja' te achijic soc te awacaxique. Ay me ya achic'bonic jmajt'anin scojt'ol, soc ay me ya amilbonic jmajt'anin swenta seña te lamal-o'tanile. Ya xtalon ta jujun awilal te bay ya sc'an co'tan te ya ana'ulayone, tey me ya cac'beyex bendición a.

²⁵ Teme ya apasbonic ta ton te scajtijib ta chiq'uel jmajt'ane, ma me walubil tonuc, melel teme walubil ta at'ejibaletique, ma me lecuc.

²⁶ Te scajtijib jmajt'ane ma me cajalcajuc moel, melel teme moat bael tey a, ya xchicnaj abaq'uetal”, uta me —xi' te Diose.