Éxodo 2 - Bible in Tzeltal de Oxchuc y Tenejapa

Ayin Moisés

¹ Ay jtul winic te ay ta swenta sts'umbal Leví. Nujbin soc jtul ants te pajal ayic ta swenta Leví.

² La staic alal, ayin ch'in querem yu'unic. C'alal la yilic te buen t'ujbil te alale, jich la snaq'uic oxeb u.

³ Ja'uc me to, ma ju' yu'unic snaq'uel bayal c'aal. Jich la spas ch'in moch ta jalal. La smac ta lec te bay japajtique, la spac'bey a te bila ay xuch'ile. Tey la yac' ochel a te alale. La st'uman bael ta ja' ta bay jalaletic ta ti'ti'ja' Nilo.

⁴ Ay xwix te alale. Q'uejel to ba stejc'an sba ta yilel te bila ya xc'ot ta pasel ta stojol te alale.

⁵ Ja' yorail a te coj tel ta atimal ta muc'ja' te yantsil-nich'an faraón. Te criadaetic yu'un ba yaiyic paxeal ta ti'ti'ja'. Te yantsil-nich'an faraón tey la yil a te moch te ay ta yolil jalaletic. Jich la sticun bael jtul scriada, ba sloq'ues tel.

⁶ La sjam te moche. La yil ay alal yac ta oq'uel tey a. Te yantsil-nich'an faraón c'ux la yaiy ta yo'tan, jich la yal: —Ja' ch'in alal yu'un te hebreoetique —xi'.

⁷ Te xwix te alal la yalbey te yantsil-nich'an faraón: —¿Bi xaat yu'un teme ya xba quic'bat tel jtuluc hebrea-ants te ya xchu'untesbat te alale? —la yut.

⁸ —Baan ic'bon tel —xi' te yantsil-nich'an faraón. Bajt' te ach'ixe, ja' nix ba yic'bey tel te sme' te alale.

⁹ Te yantsil-nich'an faraón jich la yal: —Ic'a bael te alale, ch'ijtesbon a. Ya me jtojbat te awat'ele —xi'. Te sme' te alal la yic' bael. La xch'ijtes.

¹⁰ C'alal muc'ub, ba yac'bey te yantsil-nich'an faraón. Jich c'ot ta yo'tan te bit'il mero yal. Moisés c'ot yu'un te sbiile: —Melel la jloq'ues tel ta ja' —xi'.

Moisés an loq'uel ta Egipto

¹¹ C'alal muc'ul winiquix a te Moisés, ay jun buelta loc' yaiy paxeal ta yilel te yermanotaque. Tey la yil a te ay bayal swocolic yu'un te at'ele. Soc tey la yil xan a te ay jtul egipcio yac ta smajel sba soc jtul hebreo.

¹² Jich yu'un caj yil ta sjoyobal, ma'yuc mach'a chican la yil. Jich yu'un la smil te egipcio-winique. La smuc jilel ta ji'ileltic.

¹³ Cha'loc' bael ta yan c'aal, la yil te pajal hebreoetic yacal ta smajel sbaic. C'an scom te mach'a yac ta majawe, jich la yalbey: —Ma xamaj aba soc te awermanoe —xi'.

¹⁴ Te hebreo-winic la yalbey: —¿Mach'a la yac'bat awat'el te ya xtal apasotic ta mandale? ¿Yu'un bal ya ac'an amilon jich bit'il la amil te egipcio-winique? —xi'. C'alal la yaiy stojol te Moisés, xiw yu'un. La sna' stojol te chicnajemix te bit'il laj te jtul egipcioe.

¹⁵ Te faraón la yaiy stojol te ay smiloj jtul egipcio te Moisese. Jich la sticun ta leel, yu'un ya yich' milel uuc. Te Moisés loc' ta anel, bajt' ta sq'uinal Madián, c'o snajc'an sba ta nopol pozo.

¹⁶ Te Reuel, sacerdote yu'un te madianetic, ay juctul yantsil-nich'nab. Bajt'ic ta sloq'uesel ja' ta bay pozo. Ja' ba snojesic ta bay ya yuch'ic ja' te chijetique, jich ya yac'beyic ja' yuch'.

¹⁷ Ja'uc me to, tal yan jcanan-chijetic, tal stenic loq'uel te ach'ixetique. Jich yu'un te Moisés jajch' ta scoltayel ta ora. Ja' la yac'bey ja' yuch' te xchijique.

¹⁸ C'alal sujt'ic bael ta stojol te statique, jojc'obotic yu'un: —¿Bit'il ay a te sujt'ex tel ta orae? —xi'.

¹⁹ La sjaq'uic: —Yu'un ay jtul egipcio-winic la scoltayotic, c'opoj cu'untic ta stojol te yantic jcanan-chijetique. Jich yu'un ja' la sloq'uesbotic te ja'e, soc la yac'bey ja' yuch'ic te jchijtique —xiic.

²⁰ Jich yu'un te Reuel la yalbey ta stojolic: —¿Banti ay te winique? ¿Bistuc la awijq'uitayic jilel stuquel? Baan, ic'aic tel, ac'a tal we'uc —xi'.

²¹ Te Moisés la xch'uun iq'uel ochel. Tey nain a, la sjoin ta nainel te Reuele. Ta patil te Reuel la yac'bey yinamin te jtul yantsil-nich'ane ja' te Séfora sbiile.

²² Ayin ch'in alal yu'unic. Gersón sbiil c'ot yu'un te Moisés, melel la yal: “Yu'un jyanlum winicon li'to”, xi'.

²³ Bayal c'aal ta patil laj te ajwalil yu'un te Egipto. Pero yacalic ta woclajel ta ajc'an ta mozoinel te israeletique. Ja'uc me to, c'ot ta stojol Dios te yajc'anic soc te sc'opique.

²⁴ Te Dios la yaiybey te sc'opique, jich la sna' xan te ay trato spasoj soc Abraham, Isaac soc Jacob.

²⁵ Dios la yilbey swocolic te israeletic, soc la sna'bey yo'bolil sbaic.