Éxodo 17 - Bible in Tzeltal de Oxchuc y Tenejapa

Loc' ja' ta muc'ul ton

¹ Spisil te israeletic loq'uic bael ta jochol taquin q'uinal te Sin sbiile, c'unc'un beenic bael jich bit'il mandal yu'un te Cajwaltique. C'o spas scampamentoic ta Refidim. Pero ma'yuc ja' la sta yuch'ic tey a te israeletique.

² Jajch'ic ta yutel te Moisés, jich la yalic: —¡Ac'botic ja' cuch'tic! —xiic. —¿Bistuc ya awutonic te jo'one? ¿Bistuc ya awil-o'tantayic te Diose? —xi' te Moisese.

³ Te israeletique ay taquinti'il la yaiyic. Jajch'ic ch'inlajanel ta c'op ta stojol Moisés yu'un, jich la yalbeyic: —¿Bistuc la aloq'uesotic tel ta Egipto? ¿Bistuc te tal amilotic ta taquinti'il soc te cal-jnich'antique soc te jchambalamtique? —xiic.

⁴ Te Moisés la sc'opon te Cajwaltique, jich la yalbey: —¿Bi ya jpas soc te lume? Jteb xan meix ma smilonic ta ton —xi'.

⁵ Te Cajwaltic la sjac': —C'axan bael ta stojol te lume. Ic'a bael sjoinat cha'oxtuluc te mamaletic ich'bilic ta muc' yu'un Israel. Ich'a bael te abastón te la amaj a te muc'ul ja'e, beenan me jiche.

⁶ Tey me ya jmaliyat a ta bay sba te tontiquil ta wits Horeb. C'alal ya amaj te tone, ya me x'oquin tel ja' tey a te ya yuch' te lume —xi' te Diose. Te Moisés jich la spasbey ta sitic te mamaletic yu'un Israel.

⁷ Meriba c'ot sbiil yu'un, melel tey jajch'ic ta ch'inlajanel a te israeletique. Soc Masah la yac'bey xan sbiil, melel tey la yilbey yo'tan a te Diose. Yu'un jich la yalic: —¿Sjoinejotic bal te Cajwaltique, o ma ba sjoinejotic? —xiic.

La yac'beyic guerra te amalequetic

⁸ Te amalequetic bajt'ic ta Refidim, ba yac'beyic guerra te israeletique.

⁹ Jich yu'un te Moisés la yalbey te Josué: —Tsaa bael winiquetic, baan ac'beyaic guerra te amalequetic. Tey me ayon pajel ta jol wits. Ya me jtsac ta jc'ab te bastón yac'ojbon te Diose —xi'.

¹⁰ Te Josué jich la spas te bit'il pasot ta mandal yu'un Moisés. Loc' bael ta yac'beyel guerra te amalequetique. Ja'uc me to, moic bael ta jol wits te Moisés, te Aarón soc te Hur.

¹¹ C'alal la stoy sc'ab te Moisés jich yac ta ju'el guerra yu'unic te israeletique. Yan te c'alal ya scojt'ese, ja' ju' yu'unic te amalequetic.

¹² Te bit'il lub sc'ab te Moisés, la stsacbeyic tel ton, la yac'beyic snactijibin. Jich yu'un te Aarón soc te Hur la stsacbeyic te sc'abe. Juju-jtul la yac' sbaic ta jujun sc'ab. Jich ju' yu'un soc sc'ab te Moisés, toyol ay te sc'abe, ja' to c'alal mal te c'aale.

¹³ Te Josué la stsal te amalequetique. Limilic jilel ta lum.

¹⁴ Te Cajwaltic la yalbey te Moisés: —Ts'ibuya ta libro swenta yu'un ya me yich' na'el. Albeya te Josué, ya me jtup'bey ta jc'axel sna'jibal te amalequetique —xi'.

¹⁵ Te Moisés la spasbey scajtijib smajt'an Dios. Jich la yac'bey sbiilin: “Ja' bandera cu'un te Cajwale”, xi'.

¹⁶ Soc jich la yal: —Ay ta jc'ab te bandera yu'un te Cajwale. Te Cajwal ay ta guerra soc Amalec soc te cajalcaj yal-snich'an baele —xi'.