Éxodo 15 - Bible in Tzeltal de Oxchuc y Tenejapa

Sc'ayoj Moisés

¹ Te Moisés soc te israeletic la sc'ajintayic c'ayoj te la yich'ic ta muc' a te Cajwaltique. Jich la yalic ta c'ayoj: “Ya me jc'ajintay ta yich'el ta muc' te Cajwale, melel jchajp nax te bit'il la yaiy tsalaw, mul ta mar caballoetic soc mach'atic cajalic tey a.

² Ja' yu'un ya jc'ajintay te Cajwale, ja' quip soc ja' Jcoltaywanej. Ja' Dios cu'un, cajal yutsil sc'oplal, ja' Dios yu'un te jtate, muc' sc'oplal stuquel.

³ Te Cajwale mero ju'em yu'un guerra. Ajwalil te sbiile.

⁴ Te Cajwal la smul coel ta mar te caballoetic yu'un te muc' ajwalil ta Egipto soc te soldadoetic yu'un; te mach'atic lequil capitán-soldadoetic, lajic ta ja' ta Mar Rojo.

⁵ Jich bit'il ton coic bael c'alal ta yet'al mar.

⁶ Ja'at Cajwal, la awac' ta ilel smuc'ul awu'el, ta swenta te yip swa'el ac'ab, laj te jcontrotique.

⁷ Ta smuc'ul awu'el la ajin mach'atic la scontroinat; til jichuc c'ajc' te awilimba, lajic ta c'ajq'uel jichuc ac.

⁸ Ta yip jujch'iyel la awac'bey te ja'e, jich la stsob sba, la sq'uep sba jichuc ts'ajc' te ja'e; ta yolil yet'al mar ma'yuc bay la stij sba te slumile.

⁹ Te jcontroinwanejetic la snop ta yo'tanic: ‘Ya jnutstic, ya me jtsactic, ya me jpuctic te bitic ya jpojbeytique, ja' to me chican lec ya xjil co'tantic yu'un. Ya me jloq'ues te jpuñale, ya me jin ta jc'ab a’, xi' ta yo'tan.

¹⁰ Ja'uc me to, la ajujch'iy te mar, jich bic'otic yu'un; mulic coel ta ja' jichuc plomo, ta swenta yip te ja'e.

¹¹ Ja'at Cajwal, ma'yuc yan diosetic ya spajat. Ma'yuc yan mach'a ya spajbat awutsilal soc amuc'ul te ja'ate. ¡Jchajp nax bitic ya apas soc xiweltic sba! ¡Awu'un c'ajintayel!

¹² La aloq'ues awu'el, te lumq'uinal la sbic' bael te jcontrotique.

¹³ Soc xc'uxul awo'tan yacat ta stojobtesel bael te lum la acoltaye; soc awu'el yacat ta yiq'uel bael ta bay ch'ultesbil na awu'un.

¹⁴ Te lumetic ya me xnijc' yo'tanic c'alal ya yaiyic stojol; te filisteoetic ya me x'ajc'naj yo'tanic yu'un xc'uxul mel-o'tan.

¹⁵ Te capitán-soldadoetic yu'un edometic ya me xmajc' ic' ta yo'tanic, te jtsobwanejetic yu'un moabetic ya me xnijq'uic yu'un xiwel, jc'axel me ma'yuc yip yo'tanic ya xc'ot spisilic te cananeoetique.

¹⁶ Ja'at Cajwal, ac'a xiwuquic, ayuc nijq'uel ta yo'tanic, jichuc me ma stij sbaic bit'il tonetic ta scaj yip te ac'abe, ja' to me c'alal c'axiquix te lum awu'une, ja' te lum la awu'uninixe.

¹⁷ Ja'at Cajwal, ic'awotic bael, ac'a ainucotic ta ch'ul wits awu'un, te la atsa ta bay ya xnainate, ta ch'ul awilal te la awac' ipajuque.

¹⁸ Te Cajwal sbajt'el q'uinal muc' ajwalil stuquel”, xiic ta c'ayoj.

Sc'ayoj María

¹⁹ C'alal ochic ta mar te carretaetic yu'un faraón soc te caballoetic yu'une, te Cajwaltic la yac' sta xan sba te ja'e. Yan te israeletic te c'axic bael ta mar, jich la st'unic c'axel te bit'il taquin q'uinal.

²⁰ Jich yu'un te María, ja' te j'alwanej te xwix te Aarón, la stsac te pandereta yu'une. T'unot yu'un spisil te antsetique, ajc'otajic ta stijel te spanderetaique.

²¹ Jich yac ta yalel ta c'ayoj te María: “C'ajintayaic ta yich'el ta muc' te Cajwaltique, te jchajp nax la yaiy tsalawe, mul coel ta mar te caballoetic soc te yajwale”, xi' ta c'ayoj.

Ch'aal ja'

²² Te Moisés la yac'bey yijq'uitay jilel Mar Rojo te israeletic, bajt'ic ta muc'ul jochol taquin q'uinal Shur sbiil. Oxeb c'aal beenic ochel, ma'yuc bay la staic ja' yuch'ic.

²³ C'alal c'otic ta Mara, ma ju' la yuch'ic te ja' tey a, yu'un ch'a. Ja' swentail te Mara c'ot sbiil yu'unique.

²⁴ Te lum jajch'ic ta sbolc'optayel te Moisés, jich la yalbeyic: —¿Bi ya cuch'tic? —xiic.

²⁵ Jich te Moisés la sc'anbey coltayel te Cajwaltique. Jich ac'bot yil jpejt' te' yu'un te Cajwaltique. Te Moisés la xch'oj ochel ta ja' te te'e, jich a lecub te ja'e. Te Cajwaltic tey la yilbey yo'tanic a, soc la yac'bey mandalil te ya xtojtesotic yu'une.

²⁶ Jich la yal: —Teme jun awo'tanic ya awaiybonic stojol te bila ya cal te jo'on Ajwalilon te Dioson awu'unique, soc teme ya apasic te bila lec co'tan yu'une, teme ya ach'uunic te mandaliletic cu'une, soc teme ya ac'otes ta pasel te bila ya yal te mandaliletic cu'une, ma'yuc bi ora ya xtal tulan chamel ta atojolic te bit'il la cac'bey te egipcioetique, melel jo'on te Ajwalilon te ya jlamantesbeyex achamelique —xi' te Cajwaltique.

²⁷ Patil c'otic ta Elim te banti ay lajchayeb sloq'uibja', soc ay lajuneb xchanwinic (70) ta jtejc' palmaetic, tey c'o spasic scampamentoic a ta bay te ja'etique.