Éxodo 11 - Bible in Tzeltal de Oxchuc y Tenejapa

Slajunebal castigo: Ya xlaj ba alaletic

¹ Te Cajwaltic, jich la yalbey te Moisés: —Ya to cac' tel castigo ta stojol te faraón soc te slumale, ja' to me jich ya yaq'uex loq'uel a. Ma me ja'uc nax jich ya yalbeyex, ya me stenex loq'uel soc spisil bitic ay awu'unic.

² Jich yu'un ta ora to albeya te alumale, winicuc antsuc, te mach'a slac'oj sba sna soque, ac'a sc'anbey loq'uel oro soc plata —xi'.

³ Melel te Cajwaltic la yac'bey ta yo'tanic egipcioetic te ayuc sc'oplal ta yo'tanic te israeletique. Te sjo'tac ta ajwalil te faraón, jich c'oemix ta yo'tanic te ay bila bayal ya xju' yu'un te Moisés soc jich me c'oemix ta yo'tanic spisil te egipcioetique.

⁴ Te Moisés la yalbey te faraón: —Jich la yal te Cajwale: “Ta olil ajc'ubal ya me xc'axon ta spamal Egipto.

⁵ Te juju-jchajp na ya me xlaj te sba snich'anic te alumal te egipcioetique, jich me uuc te sba anich'ane te ya xnajc'aj ta muc'ul nactijibale, soc me uuc te sba yal te criada te ya x'at'ej ta cha'e. Ya xlajic uuc te sba yalatac te chambalametique.

⁶ Ta spamal Egipto ay me aw soc woclajel te ma'yuc jich pastaj ta neelal ni ta patilal”, xi' te Cajwale.

⁷ Swenta yu'un tey ya ana'ic stojol a te ma pajaluc sc'oplal ta yo'tan Cajwal soc egipcioetic te israelotique, ni ma ba ya swojwojtayotic te ats'i'ique, manchuc me ants-winiquetic, o chambalametic.

⁸ Te ajo'tac ta ajwalile ya laj me xtal squejan sbaic ta jtojol ta sc'anel te ya quic' loq'uel ta ora spisil te jlumale. Ja' to me ya xboon abi —xi' te Moisese. Bayal ilinem loq'uel Moisés ta stojol faraón.

⁹ Jich yu'un te Cajwaltic la yalbey te Moisés: —Te faraón ma nix bay ya yich'beyex ta muc' ac'opic a, swenta yu'un jich ya spastaj a te jchajp señailetic cu'un ta lum Egipto —xi' te Diose.

¹⁰ Te Moisés soc Aarón la spasic spisil te jayebix tel jchajp señail ta stojol te faraón. Ja'uc me to, te Cajwaltic la stulantesbey xan yo'tan te faraone. Jich stalel nax ay te yo'tane, ma la yac' loq'uel te israeletic ta Egipto.