Ester 9 - Bible in Tzeltal de Oxchuc y Tenejapa

Tsalawan judioetic

¹ Ta yoxlajunebal c'aal yu'un te slajchayebal u, te Adar sbiile, ja' nix sc'aalelal a te ya c'an tsalotuc yu'un scontroic a te judioetic; pero ma jichuc c'ot ta pasel, ja' la yaiyic tsalaw te judioetique.

² Ta spisil ta jpam q'uinaletic yu'un te muc' ajwalil Asuero, te judioetic la stsob sbaic ta lumetic te banti nainemique, yu'un ja' la yac'beyic guerra te mach'atic chapalic yu'un ya xmilotic yu'un sc'oplale. Pero ma'yuc mach'a ochintayotic yu'un, melel spisil te lumetique u'uninotic yu'un xiwel.

³ Ta spisil te mach'atic yich'oj yat'elic ta juju-jpam q'uinal, ja' te ajwaliletic ta juju-jpam q'uinal soc ta juju-jpam lum, soc spisilic te mach'atic yich'oj tulan yat'elic yu'un te mandalteswaneje, ta spisilic ja' la yac' sbaic soc te judioetic, ta scaj te ja' la xi'ic te Mardoqueo.

⁴ Melel te Mardoqueo mero muc' sc'oplal ta spalacio te muc' ajwalile, soc pujc' ta alel sc'oplal ta spisil ta jpam q'uinal. Jujun c'aal yac ta toyel xan yip.

⁵ Te judioetic la slajinic ta milel ta puñal spisil te scontroique. Jc'axel la slajinic spisilic, soc chican nax yo'tanic te bila la smulanic spasbeyel.

⁶ Tey nax ta joyob ts'ajc'ubil centro yu'un te lum Susa, la smilic jo'winic xcha'bajc' (500) winiquetic.

⁷ Soc la smilic te Parsandata, Dalfón, Aspata,

⁸ Porata, Adalía, Aridata,

⁹ Parmasta, Arisai, Aridai soc Vaizata,

¹⁰ te ja'ic te lajuntul snich'nab Amán, ja' mero scontro te judioetique. Pero ma ba la spicbeyic te bila ay yu'unique.

¹¹ Ta in c'aal to, c'alal la yaiy te muc' ajwalil te jayebix te mach'atic lajemic ta joyob ts'ajc'ubil centro yu'un te lum Susa,

¹² jich la yalbey te antsil-ajwalil Ester: —Te judioetic la smiliquix jo'winic xcha'bajc' (500) winiquetic soc te lajuntul snich'nab Amán, ta joyob ts'ajc'ubil centro yu'un te lum Susa. ¿Bitic xan spasojic ta yantic q'uinaletic te ay ta jwentae? Bi xan yan ya ac'an, ya me cac'bat —la yut.

¹³ La sjac' te Ester: —Teme lec ya awaiye, te ja'at te muc' ajwalilate, ac'a yich'ic aq'uel permiso te judioetic ayic ta Susa te jich ya spasic xan pajel te bit'il yacalic ta spasele, ja' te bila ya yal te mandalil yich'oj ts'ibuyele. Soc ac'a yich'ic jijp'anel ta te' te sbaq'uetalic te snich'nab Amán —xi'.

¹⁴ Te muc' ajwalil la yal mandal te jich ya yich' pasele. La yich' puquel ta alel smandal ta lum Susa, soc te sbaq'uetalic te snich'nab Amán slajunebalic la yich'ic jijp'anel ta te'.

¹⁵ Te judioetic nainemic ta Susa, la xcha'tsob xan sbaic ta xchanlajunebal te c'aal yu'un te u Adar. La smilic xan jo'lajunwinic (300) winiquetic tey a, pero ma ba la spicbeyic te bila ay yu'unique.

^16-17 Te judioetic nainemic ta yantic q'uinaletic la stsob sbaic uuc, pero ta yoxlajunebal c'aal yu'un te u Adar, yu'un ya scoltay sbaic soc ya sjinic te bila chapal yu'unic te scontroique. La smilic jo'lajuneb xchanwinic ta jmil (75,000) te scontroique, pero ma ba la spicbeyic stuquel te bila ay yu'unique. Ta xchanlajunebal c'aal a te u la xcux yo'tanic, bin nax yo'tanic la spasic q'uin soc we'elil.

¹⁸ Melel ta yoxlajunebal ajtal soc ta xchanlajunebal la stsob sbaic stuquelic te judioetic ayic ta Susa, la xcux yo'tanic ta yo'lajunebal ajtal stuquelic, ja' nix jichic uuc bin nax yo'tanic la spasic q'uin swenta we'el.

¹⁹ Pero te yantic judioetic nainemic ta lumetic soc ta ch'in lumetic, te ma'yuc sjoyob ts'ajc'ulique, ya spasic q'uin soc sbujts' yo'tanic ta xchanlajunebal te u Adar, soc talel c'axel la smajt'antes sbaic yu'un.

Q'uin Purim sbiil

²⁰ Te Mardoqueo la sts'ibuy ta jun te bila c'ot ta pasele, soc la sticunbey carta te judioetic nainemic ta pamalpam q'uinal swentainej te muc' ajwalil Asuero, te c'ubul ayic soc te nopol ayique.

²¹ La spas ta mandal te jujun ja'wil ya me spasic q'uin ta xchanlajunebal c'aal soc ta yo'lajunebal c'aal te u Adar.

²² Melel ja' sc'aalelal te la smilic te scontroic, soc ja' yuil te bi ora te jelon ta sbujts' yo'tanic te smel-o'tanic soc jelon ta q'uin te yawic swenta xc'uxul te mel-o'tane. Ja' in c'aaletic to ya me yich'ic pasel q'uin soc we'elil soc sbujts' q'uinal yaiyic, soc talel c'axel me ya smajt'antes sbaic a, soc ya me yaq'uic majt'anil yu'un me'baetic, xi' te smandale.

²³ Te judioetic la xch'uunic spasel q'uin swenta jujun ja'wil, jich nix te bit'il albotic yu'un te Mardoqueo.

²⁴ Melel te Amán te scontro te judioetique, la snop te ya slajin spisil te judioetic, asta la sle ta swenta snumeroil te bi c'aalil ya yich' milel, te jc'axel ya slajin ta sc'ope.

²⁵ Pero c'alal c'ot ta stojol muc' ajwalil te Ester, te muc' ajwalil la yal mandal ta jun te spisil te bila chapal yu'un te Amán ta swenta swocol te judioetic, ja' nix ac'a sujt'uc ta stojol stuquel. Jich nix c'ot a. Te Amán soc te snich'nabe la yich'iquix jijp'anel ta te'.

²⁶ Ja' swentail te Purim sbiil c'ot te che'oxeb c'aal te q'uine, melel “te pur” te xie, “spasel snúmeroil”, xi' c'oem. Ja' yu'un, ta scaj te bila albotic ta carta yu'un te Mardoqueo, soc ta scaj te bila la yilique, soc te bila c'ot ta swentaic,

²⁷ te judioetic la stsaquic te costumbre yu'unique, soc la stsaquic jilel uuc te patil alnich'anetic yu'unique, soc te mach'atic ochic ta judioile: ja' costumbre yu'unic te ya spasic q'uin ta jujun ja'wil, ma'yuc ya spas falta, ay me q'uin yu'un ta xchebal te c'aale, jich nix te bit'il albil sc'oplale, soc jich nix te bit'il chapale.

²⁸ Ja' in cheb c'aal to ay ta na'el soc ay q'uin yu'un a te jaycaj ya xc'ax ta cajalcaje, ta juju-jchajp sts'umbalic, ta juju-jpam q'uinal soc ta juju-jpam lum, swenta yu'un ma'yuc bi ora ya xch'ay ta na'el ta stojolic a te judioetic soc te sts'umbalique.

²⁹ Te bit'il ay yat'elique, te antsil-ajwalil Ester te yantsil-nich'an Abihail soc te Mardoqueo te judio-winic la sts'ibubeyic yan xan carta; mero tulan xan sc'oplal la yalbey te q'uin Purim sbiile, ja' nix la xcha'albeyic xan sc'oplal te bila la yalic ta sbabial carta.

³⁰ La sticunbeyic ta stojol te judioetic ayic ta sjuquebal sjucwinic (127) ta jpam q'uinaletic ay ta swenta te muc' ajwalil Asuero. La sts'ibuyic ta buen lequil c'opetic, soc ta mero tojil c'opetic ta melel.

³¹ Tey la spasic ta mandal a te ya spasic te q'uin Purim ta yorail te bitic c'aalil la yich'ix alele, mero jich nix te bit'il la yaliquix mandal te Mardoqueo soc te antsil-ajwalil Ester ta stojolic, soc ta stojolic uuc te patil alnich'anetic yu'unique. Ja' nix jich la yich' alel sc'oplal ta comel we'elil, soc te ya yoq'uetay ta na'el te bila c'ot ta pasele.

³² Te mandal yu'un Ester, ja' nix la yalbey tulan sc'oplal te bit'il te ya yich' pasel te q'uin Purim. Spisil in to la yich' ts'ibuyel ta libro yu'un te bitic tulan sc'oplal c'ot ta pasele.