Ester 1 - Bible in Tzeltal de Oxchuc y Tenejapa

La spas q'uin muc' ajwalil Asuero

¹ Ja' te c'op in to, ja' c'ot ta pasel te c'alal ay ta muc' ajwalil a te Asuero, ja' te la swentain juqueb sjucwinic (127) ta jpam q'uinal te jajch' ta India c'alal ta Etiopía.

² Soc tey ta lum Susa, ta joyob ts'ajc'ubil centro yu'un, la yac' smuc'ul nactijib te muc' ajwalile.

³ Ta yoxebal ja'wil yich'bel yat'el ta muc' ajwalil a te Asuero, la spasbey sq'uin swenta yich'jibalic ta muc' ta spisilic te mach'atic ay yat'elic te ya xcoltayot ta at'el yu'une, te capitanetic yu'un soldado-persiaetic soc mediaetic, te ajwaliletic, soc jwentainwanejetic ta juju-jpam q'uinal,

⁴ swenta yu'un ya yac'bey yilic te sc'ulejale, te smuc'ul yat'el ta muc' ajwalile, te jchajp yilel yutsilal soc te yip yat'el ta muc' ajwalile. Jalaj olil ja'wil te q'uine.

⁵ C'alal c'ax te q'uine, te muc' ajwalil la spas xan juqueb c'aal q'uin. Tey la spas ta banti nichimaltic te ay ta yamaq'uil te spalacioe. Spisil la yich'ic iq'uel te mach'atic nainemic ta joyob ts'ajc'ubil centro yu'un te lum Susa, ja' te mach'atic bayal ich'bilic ta muq'ue, soc nix te mach'atic jteb nax ich'bilic ta muq'ue, c'ot spisilic.

⁶ Te amaq'ue yich'oj ch'alel ta buen t'ujbil saquil soc yaxal cortinaetic. Te yich'oj yip pasbil ta tsajal-yaxal ts'otbil lino. Jipajtic ta xotbil plata soc chucbil tel ta oyetic pasbil ta mármol-ton. Soc yac'ojic nactijibaletic pasbilic ta oro soc ta plata. Te piso ta banti ya xbeenique, yich'oj limbeyel buen t'ujbil tonetic: nácar, saquil mármol soc ijc'al mármol.

⁷ Te bitic la yuch'ique, la yuch'ic ta vasoetic pasbil ta oro. Yan yantic yilel pasbil te vasoetique, ma pajaluc yilel ta spisil. Te vino bayal yac ta oc c'oem, jich bit'il ay yutsil yo'tan te muc' ajwalile.

⁸ Pero te muc' ajwalil, la yalbey mandal te jc'asesej-we'el-uch'baliletic te ma me ayuc mach'a ya yich' sujel ta yuch'el te bila ma smulan yuch'ele, te ja' me lec te chican yo'tanic te bila ya smulanic yuch'el ta juju-jtul te mach'atic ic'bilique.

⁹ Jich te yinam muc' ajwalil te Vasti sbiile, la stsob ta swenta q'uin uuc te yinamic te mach'atic ic'bilique, tey nix ta sna te muc' ajwalil Asuero.

¹⁰ Ta sjuquebal c'aal sjajch'el a te q'uine, te muc' ajwalil bin nax yo'tan ta scaj te yuch'oj vino. Jich la sticun bael te Mehumán, Bizta, Harbona, Bigta, Abagta, Zetar soc te Carcas, juqueb winiquetic te jun yo'tan sbaic ta stojole,

¹¹ yu'un bajt' ta iq'uel tel ta stojol te yiname, ja' te Vasti sbiile. Te c'alal ya xtale, ay me ta sjol te scorona swenta yinam muc' ajwalile, swenta yu'un ya me smulanbeyic te st'ujbilal ta spisilic te lum soc te mach'atic muc' sc'oplalique. Melel yu'unix mero t'ujbil a te yinam te muc' ajwalile.

¹² Pero te yiname, ma ba la sc'an xch'uunbey smandal te muc' ajwalil c'ot ta alel yu'un te winiquetique. Te muc' ajwalil bayal ilin yo'tan yu'un, mero bayal slab yo'tan yu'un.

¹³ La sjojc'obey te mach'atic ay sp'ijil yo'tanic ta sna'el te leyetique, melel ja' scostumbreic te bila chajbanel ya sc'an yu'un te muc' ajwalil, ja' ya yich' nopel soc te mach'atic ya sna'ic te leyetic soc te mandaliletique.

¹⁴ Ja' te mach'atic te ay sp'ijil yo'tanic te ay ta sts'eel spisil ora te muc' ajwalil, ja'ic te Carsena, Setar, Admata, Tarsis, Meres, Marsena soc Memucán, juquebic te ich'bilic ta muc' te yich'oj tulan yat'elic ta Persia soc Media. Sjoinej sbaic soc te muc' ajwalil ta xchajbanel spisil te yat'ele, melel yich'oj tulan yat'elic ta ajwalil ta stojol te nacione.

¹⁵ Ja' yu'un jojc'obotic yu'un te muc' ajwalile: —Chican bi ya yal te leye, ¿bi ya sc'an ya jpastic ta stojol te quinam Vasti te ma ba la xch'uunbon te jmandal te la jticun ta alel ta stojol ta swenta te jc'asesej-c'opetic cu'une? —xi'.

¹⁶ Te Memucán c'opoj ta stojolic te mach'atic ay ta swentaic xchajbanel at'el soc te muc' ajwalile, jich la yalbey: —Te Vasti yinam muc' ajwalil, ma ja'uc nax ja'at te la yuts'inate, la yuts'in c'oem ta spisil te mach'atic yich'oj yat'elic, soc ta spisil te mach'atic ayic ta juju-jpam te ay ta awenta ja'at te muc' ajwalilate.

¹⁷ Te bila la spas te awiname, ya me yaiyic ta spisilic te antsetique, soc ja' me ta swenta te ma ba ya yich'iquix ta muc' te smamlalique. Jich me ya yalic: “Te muc' ajwalil Asuero la sticun ta iq'uel te yinam te bit'il ja' muc' ajwalile, pero ma ba la xch'uun iq'uel yu'un”, xiic me.

¹⁸ Te yinamic te mach'atic yich'oj yat'elic ta Persia soc ta Media, teme la yaiyic te bila la spas te awinam Vasti yo'tic, ya me stsac sbaic ta c'op soc smamlalic, jich me ya yac' wocol soc ilimba.

¹⁹ Ja' yu'un, teme lec ya awaiye, te ja'at te muc' ajwalilate, ac'a me ta puquel ta alel te mandalil in to, soc ac'a yich' aq'uel ochel ta sjunal leyetic yu'un persiaetic soc mediaetic, swenta yu'un jich ma xju' ya yich' c'axintayel a, ja' in to: “Te antsil-ajwalil Vasti ma'yuquix bi ora ya xju' ya stejc'an sba ta stojol muc' ajwalil”, xi' me. Te bit'il yich'oj aq'uel yat'el ta antsil-ajwalil, ya me yich' pojel, swenta yu'un ya me yich' aq'uel yan ants te mero snujp' stuquele.

²⁰ Te mandalil yu'un te muc' ajwalil ya me sc'an te ya yich' puquel ta alel ta bay c'alal swentainej mandalteswanej te muc' ajwalile, swenta yu'un spisil antsetic ya me yich'ic ta muc' te smamlalique, pajal me te mach'atic muc' sc'oplalic soc mach'atic peq'uel sc'oplalic —xi'.

²¹ Te bi la snop ta yo'tan te Memucán, lec c'ot ta yo'tan te muc' ajwalil soc nix te mach'atic sjoinej sbaic ta chajbanwaneje. Ja' yu'un te muc' ajwalil jich la yac' c'otuc ta pasel.

²² La sticun cartaetic ta juju-jpam q'uinal te bay c'alal swentaineje. La sts'ibubey ta sc'opic nix soc ta sts'ibujelic nix te juju-jpam q'uinal soc ta juju-jpam lum te bay c'alal yu'unineje. La yalbey mandal spisil winiquetic te ay yinamic, ac'a spasic tulan mandal ta snaic te bit'il ja' swentainejique, ac'a c'opojicuc ta yalel te bila ya smulanic yalele.