Esdras 9 - Bible in Tzeltal de Oxchuc y Tenejapa

Smul te lum soc la sc'opon Dios Esdras

¹ C'alal ju' ta pasel in to, te jwolwanejetic talic ta jtojol, jich la yalbonic: —Te israeletic, soc nix te sacerdoteetic soc te levitaetique, ma ba ju'em yu'unic te parte yac'oj sbaic ta stojolic te mach'atic smacojic q'uinale, ja' te cananeoetic, hititaetic, ferezeoetic, jebuseoetic, amonetic, moabetic, egipcioetic soc te amorreoetique, manchuc me ilaybil sba te costumbre yu'unique te bit'il ma ba xch'uunejic te Diose.

² Ja'ic soc snich'nabic te nujbinic soc te yantsil-nich'anic te winiquetic in to. Ja' yu'un te lum yu'un te Diose la scap sba soc te jyanlum-ants-winiquetique. Te mach'atic sbabial la spasic te mulil in to, ja'ic te mach'atic jwolwanejetic soc te mach'atic ay yat'elique —xi'.

³ C'alal la caiy te c'op in to, la jch'i' jc'u' yu'un, la jbul stsotsil jol soc la jbul quisim swenta seña xc'uxul mel-o'tan, la jnajc'an jba, mero ayon ta mel-o'tan yu'un.

⁴ Tal sjoinonic spisil te mach'atic la xi'ic te castigo ya yac' te Dios yu'un Israel, ta scaj smulic te jayeb sujt'emic tel te ac'bot yijq'uitay slumalique. Pero te jo'one, tey nacalon a, soc ayon ta mel-o'tan yu'un, ja' to c'alal la sta yorail te ya yich' aq'uel milbil smajt'an Dios ta smalel c'aal.

⁵ Jich ora jajch' xan ta lecubel q'uinal la caiy te bit'il mero pejc'aj q'uinal la caiye. Ja' to nix jlapoj a te jc'u' jatsemique, jajch'on ta sc'oponel te Cajwaltic te Dios cu'une,

⁶ jich la cal: —Dios cu'un, Dios cu'un, mero bayal ya xtal q'uexlal ta co'tan ya caiy, soc ma xtojob ya caiy te co'tane, soc ma jna' bi ya cal ta atojol. Melel mero c'axemix ta jyalel te falta cu'untique, c'oemix c'alal ta ch'ulchan te mulile.

⁷ Nameyix soc c'alal ora ayotic ta mero tulan mulil. Ta scaj te bila amen la jpastique, soc nix te muc' ajwaliletic soc sacerdoteetic cu'untique, ta jpisiltic ochotic ta sc'ab muc' ajwaliletic ta yantic nacionetic. La quich'tic ejch'entesel, la quijq'uitay jlumaltic, elc'anot jbiluctic soc la quich'tic ilayel, soc jich nix ayotic c'alal ora in to.

⁸ Pero ja' nix jich yo'tic, Cajwal Dios cu'untic, ta swenta yutsil awo'tan te jtsojp te ya xjilotic ta libre soc te ya awac' x'ainotic ta jnatic ta bay te ch'ul lumq'uinale. Ja'at la awaq'uix yach'il luz ta jtojoltic, la awaq'uix quich'tic ch'in jtebuc ic' te bit'il ayotic ta mozoinele.

⁹ Manchuc me ayotic ta mozoinel, ma ba la apijt'esotic ta banti ayotic ta mozoile. La awac' quiltic yutsil awo'tan ta stojol te muc' ajwaliletic yu'un Persia, la ana' yo'bolil jbatic, la awac' jcuxlejaltic yu'un xcha'pasel xan te templo awu'un te banti jineme. Ja'at la awac'botic coltayel ta sq'uinal Judá soc ta lum Jerusalén.

¹⁰ “Pero yo'tic Dios cu'untic, ¿bi ya xju' ya caltic yu'un te bila jpasojtique? Ma ba ju'em cu'untic spasel te mandaliletic

¹¹ la awal ta swenta te j'alwanejetic, ja' te abatetic awu'une. Ja'at neel la awalbotic te bit'il ay te q'uinal te banti ya x'ochotique, te ya awac' ta jwentatique, te boloben te q'uinal ta scaj sbolil te mach'atic ayic tey a, ta scaj te ilaybil sba scostumbreic yu'un te bit'il ma ba xch'uunejic te Diose, te ja' snojesejic ta pasel a te ixtajele.

¹² Soc la awalbotic te ma xju' ya jnujbin cantsil-nich'nabtic soc squerem-nich'nabic, soc ma xju' ya xnujbin jquerem-nich'nabtic soc yantsil-nich'nabic uuc. Soc la awalbotic te ma me ayuc bi ora ya xbajt' co'tantic ta slamantesel q'uinal ta stojolic, ni slebeyel yutsilalic te ants-winiquetic in to, swenta yu'un jich mero ya me jcanantay jbajtic a soc mero tulan ya x'ainotic a, soc ya me jwe'beytic te bitic lec ta q'uinale, soc ya me cac'beytic jilel yu'unin te jts'umbaltic ta sbajt'el q'uinale.

¹³ “C'axix cu'untic spisil te bitic c'ot ta jwentatic ta scaj te amen cat'eltique, soc te mero tulan mulil cu'untique, manchuc me ma ba awac'ojbotic castigo te bit'il ya sc'an yu'un te jmultique, melel awac'ojotic ta libre in to.

¹⁴ ¿Yu'un bal ya to xju' ya jcha'c'axintaytic te mandaliletic awu'une, ya bal xju' te ya quic' jbajtic xan soc te yantic te mero ilaybil sba scostumbreique? ¿Yu'un bal ma ba x'ilinat ta jtojoltic soc ma ba ya alajinotic, asta ja' to teme ma'yuc cuxul ya xjilotic, ni jtuluque?

¹⁵ “Cajwal Dios yu'un Israel, mero toj awo'tan ta jtojoltic. Ja'at jich la sc'an awo'tan te jtsojp te jayeb xan jilemotic, jich bit'il chican ta ilel ta ora in to. Ta mero melel jo'otic te ay jmultic ta atojole. Ja' yu'un, ma snup'in te ya xtalotic ta atojole —xi' ta sc'oponel Dios te Esdrase.