Esdras 7 - Bible in Tzeltal de Oxchuc y Tenejapa

Esdras soc sjo'tac julic ta Jerusalén

¹ Ta patil bael, te c'alal ay ta muc' ajwalil ta Persia te Artajerjes, ay jtul winic Esdras sbiil. Ja' sts'umbal te Seraías, Azarías, Hilcías,

² Salum, Sadoc, Ahitob,

³ Amarías, Azarías, Meraiot,

⁴ Zeraías, Uzi, Buqui,

⁵ Abisúa, Finees, Eleazar soc Aarón te sbabial sacerdote.

⁶ Te Esdras, ja' maestro te sna'oj ta lec te mandalil yu'un te Cajwaltic, te Dios yu'un Israel, te ac'bot ta swenta yu'un te Moisese. Te Esdras coltaybil yu'un te Cajwaltique, jich ac'bot yu'un spisil te bitic la sc'anbey te muc' ajwalil Artajerjes. Jich loc' jajch'el ta Babilonia,

⁷ bajt' ta Jerusalén te Esdras soc jchajp israeletic, ja'ic te sacerdoteetic, levitaetic, jc'ayojetic, jcanan-ti'nailetic soc mach'atic abatetic yu'un templo. Jich c'ot ta pasel ta sjuquebal ja'wil yat'el ta muc' ajwalil a te Artajerjes.

^8-9 Ta swenta yutsil yo'tan Dios ta stojol, te Esdras jajch' ta loq'uel tel ta Babilonia ta sbabial c'aal sjajch'el a te sbabial u swenta sjuquebal ja'wil yat'el ta muc' ajwalil a te Artajerjes. C'ot ta Jerusalén ta sbabial c'aal sjajch'el yo'ebal u a te ja'wil jajch'eme.

¹⁰ Te Esdras ja' mero xchapoj ta yo'tan te ya snop soc te ya spas te bila ya yal te mandaliletic yu'un te Cajwaltique, soc te ya yac'bey snopic te israeletic te mandaliletic soc te sc'op yaloj te Cajwaltique.

¹¹ Ja' scopiaul in to te carta te la yac'bey Esdras te muc' ajwalil Artajerjes. Ja' sacerdote te Esdras soc maestro te snopoj spisil te mandaliletic soc te sc'op Cajwaltic te ja' yu'un te Israele:

¹² “Te Artajerjes muc' ajwalil swentainej yantic te muc' ajwaliletique, ya spatbey yo'tan te Esdras, sacerdote soc maestro te snopoj te smandal Dios ta ch'ulchane.

¹³ “La calix mandal te spisil israeletic te ayic ta q'uinal te banti c'alal jwentainej te jo'on muc' ajwalilone, teme ya sc'anic ya sjoinat bael ta Jerusalén, ya xju' ya xbajt'ic, soc nix teme sacerdote o levita.

¹⁴ Melel jo'on muc' ajwalilon soc juqueb jo'tac ta at'el, ya jticunat ta Judá soc ta Jerusalén ta stsajtayel te bi yilel aye, chican te bila ya yal te smandal te Dios awu'un awich'oj ta ac'abe.

¹⁵ Ich'a bael te plata soc te oro te spasemal co'tantic ya cac'beytic te Dios yu'un Israel te jo'on muc' ajwalilon soc jo'tac ta at'ele,

¹⁶ soc ta spisil te plata soc oro te ya xju' ya ata ta spisil ta sq'uinal Babilonia, soc xan te staq'uinic te spasemal yo'tanic ya yaq'uic yu'un te templo yu'un Dios ta Jerusalén te yantic judioetic, soc te sacerdoteetique.

¹⁷ Te taq'uin in to, ya aman ch'in wacaxetic a, soc chijetic, soc ch'in alal chijetic, soc nix te yantic smajt'an Dios swenta harina soc vino, swenta yu'un ya me awac'beyic ta sba te scajtijib ta chiq'uel majt'anil ta templo yu'un te Dios awu'unic ta Jerusalén.

¹⁸ Jich nix te oro soc plata te ya spas sobra awu'unique, pasa soc a te awermanotac te bila ya amulanic spasel ae, chican te bila lec yo'tan yu'un te Diose.

¹⁹ Pero te biluquetic la awich' aq'uel swenta yich'el ta muc' te Dios awu'un ta templo yu'une, ja'at ni me ya xc'o awac' ta stojol te Dios ta Jerusalén.

²⁰ “Biluc xan a te ya sc'an xan ya yich' aq'uel yu'un te templo yu'un Dios awu'une, ya me xju' ya ale ta yawil sbiluc muc' ajwalil.

²¹ Jo'on Artajerjeson muc' ajwalilon, ya calbey mandal ta spisil tesoreroetic te ay ta jq'uinal ta stojol smalib c'aal yu'un muc'ja' Eufrates, ta ora nax ac'a yac'beyic spisil te bitic ya sc'an te sacerdote Esdras te maestro yu'un mandalil yu'un te Dios ta ch'ulchane.

²² Ya xju' ya yich' oxmil soc jo'lajunwinic (3,300) kilo plata, cheb xcha'winic ta jmil (22,000) litro trigo, cha'mil soc lajunwinic (2,200) litro aceite soc nix te jayeb ats'am ya sc'ane.

²³ “Spisil te bitic ya sc'an te Dios ta ch'ulchan yu'un te templo yu'une, ya me xju' ya yich' aq'uel ta ora, swenta yu'un jich ma'yuc ya xtal castigo ta stojol a te snich'nab muc' ajwalile soc nix ta stojol te bay c'alal yu'unineje.

²⁴ Soc ya me ana'ic uuc te ma xju' ya yich' c'anel patan, sloc'ol biluc, o yantic pataniletic ta stojolic mach'auc sacerdoteil, levitaetic, jc'ayojetic, jcanan-ti'nailetic, abatetic yu'un templo, soc mach'auc a te ya yac' sba ta abatinel ta templo yu'un te Diose.

²⁵ “Jichat uuc te ja'ate, Esdras, chican te bila sp'ijil awo'tan yac'ojbat te Dios awu'une, ac'beya yat'el juecetic soc jwentainwanejetic. Ac'a xchajbanic ta stojil ta spisilic te mach'atic ayic ta jpam q'uinal te ay ta stojol smalib c'aal yu'un te muc'ja' Eufrates, ja'ic ta spisilic te ya sna'ic te mandalil yu'un te Dios awu'une. Te mach'atic ma sna'ique, ac'beya snopic.

²⁶ Ta spisil te mach'a ma ba ya yac' c'otuc ta pasel te mandalil yu'un te Dios awu'une, soc te mandaliletic cu'un jo'on te muc' ajwalilone, ora ac'a yich' ticunel ta milel, o ya yich' tenel loq'uel, ya yac' multa, o ya x'och ta chuquel”, xi' ta scarta te muc' ajwalile.

La sc'opon Dios Esdras

²⁷ Ja' yu'un te Esdras la sc'opon Dios, jich la yal: —Wocol la awal, Cajwal, te Diosat yu'un te jme'il-tatiletique, melel la atijbey yo'tan te muc' ajwalil te la yich' ta muc' te templo awu'un ta Jerusalén.

²⁸ Soc te la awac'bon quil yutsil awo'tan ta stojol te muc' ajwalil, soc te sjo'tac ta at'el, soc te yantic winiquetic ich'bilic ta muc' te sjoy ta at'el te ajwalile. Soc la awac'bon yip co'tan, melel ta swenta bit'il la acoltayon, ju' cu'un stsobel te israeletic ich'bilic ta muq'ue, swenta yu'un la sjoinon sujt'el tel —xi' ta sc'oponel Dios te Esdras.