Esdras 6 - Bible in Tzeltal de Oxchuc y Tenejapa

¹ Te muc' ajwalil Darío la sticun ta leel ta sq'uejibal poco' junetic te banti ya yich' q'uejel te junetic bayalic sc'oplal ta Babiloniae.

² Ta spalacio te ajwalil ay ta lum Ecbatana te ay ta sq'uinal Media, la staic jun libro te banti chican ts'ibubil jilel te c'opetic te jich ya yale:

³ “Ta sbabial ja'wil yat'el ta muc' ajwalil a te Ciro, jich la yal ta pasaw ta mandal: Te sc'oplal te templo yu'un Dios ta Jerusalén: Ac'a yich' aq'uel te xjajch'ibal yiptajibe, soc ac'a yich' xan cha'pasel te nae, swenta yu'un ya me yich' aq'uel milbil smajt'an Dios tey a. Ya me yich' aq'uel juqueb xcha'winic (27) metro stoyolil soc juqueb xcha'winic (27) metro sjamalul,

⁴ soc oxchol muc'ul walubil tonetic soc jchol ta puro yach'il te'etic. Te jayeb taq'uin ya xlaje, ya me xloc' ta staq'uin ajwalil.

⁵ Ja' nix jich te biluquetic pasbil ta oro soc ta plata te ja' yu'un te templo yu'un te Diose, (ja' te Nabucodonosor la yich' loq'uel ta templo ta Jerusalén, soc la yich' tel ta Babiloniae) ac'a yich' sujt'el soc ac'a yich' ich'el bael ta Jerusalén, soc ac'a yich' aq'uel ta templo yu'un Dios, te bit'il ja' nix yawil ae”, xi' te smandal Ciro.

⁶ Ja' yu'un te muc' ajwalil Darío, jich la spas bael ta mandal te Tatnai, te ajwalil yu'un te jpam q'uinal ay ta stojol smalib c'aal yu'un muc'ja' Eufrates, soc te Setar-boznai soc te sjo'tac ta ajwalile: “Loc'anic ta Jerusalén,

⁷ ijq'uitayaic, ma me xacomic te ajwalil yu'un judioetic soc te jwentainwanejetic yu'unique te ya swentainic xcha'pasel xan ta yawil nix te templo yu'un te Diose.

⁸ Ja' jmandal ya cal in to ta swenta te bit'il ya yich'ic coltayel te jwentainwanej-judioetic ta swenta xcha'pasel xan te templo yu'un te Diose: Te patanetic ya yich' ta sc'ab te tesorero yu'un ajwalil ta jpam q'uinal ay ta smalib c'aal yu'un te muc'ja' Eufrates, ta mero yorail ac'a yich' aq'uel te jayeb taq'uin ya xtuune, swenta yu'un jich ma ba ya xquejch'aj a te at'ele.

⁹ Ma me xquejch'aj ta aq'uel, jujun me c'aal ac'a yich'ic aq'uel te sacerdoteetic ta Jerusalén te bitic ya sc'ane. Chican te bi ya yalique, soc spisil te bila ya xtuun yu'unique, teme ch'in wacaxetique, teme chijetique, o teme ch'in alal chijetic yu'un ya xtuun yu'unic, yu'un ya yac'beyic chic'bil smajt'an te Dios ta ch'ulchane, o teme trigoe, teme ats'ame, vino, o aceite.

¹⁰ Jich me ya yac'beyic ta smajt'an te Dios ta ch'ulchane te buen lec yo'tan yu'un, soc te yacuc yalic wocol ta stojol Dios yu'un te xcuxlejal te muc' ajwalil soc te yal-snich'nabe.

¹¹ “Soc ya cal xan tulan mandal, teme ay mach'a la xc'axintay te mandal in to, ac'a yich' loq'uesel junuc sts'amte'al te snae, ac'a yich' josel sni' te ya yich' lowel moel a. Te snae ac'a c'atp'ujuc ta jinem na.

¹² Soc te Dios te la stsaix te Jerusalén swenta yu'un yawil sbiile, ac'a slajin mach'auc muc' ajwalil, o nación, te ma sc'an xch'uun in mandal to o te ya sc'an sjin te templo yu'un Cajwaltic te ay ta Jerusalene. Jo'on Daríoon te la cal mandale. Ts'acal me xawac' c'otuc ta pasel te bila ts'ibubil”, xi' te muc' ajwalil Darío.

Sju'tesel at'el

¹³ Te ajwalil yu'un te q'uinal ay ta stojol smalib c'aal yu'un muc'ja' Eufrates, Tatnai sbiil, soc te Setar-boznai soc te sjo'taque, ts'acal la yaq'uic c'otuc ta pasel te bila ts'ibubil yu'un ta mandal la yal te muc' ajwalil Darío.

¹⁴ Jich te jwentainwanej-judioetique, ju' yu'unic te la spasic xan bael te at'el swenta xcha'pasele, jich te bit'il albotic yu'un te j'alwanejetic yu'un te Diose, ja'ic te Hageo soc te Zacarías snich'an Ido. Te xcha'pasel te templo, ju' ta pasel, ja' la yich' t'unel te mandal la yal te Dios yu'un Israel, soc nix te bila mandalil la yal te Ciro, te Darío soc te Artajerjes, te muc' ajwaliletic yu'un Persia.

¹⁵ Te templo ju' ta pasel ta oxeb c'aal sjajch'el u Adar ta swaquebal ja'wil yat'el ta ajwalil te Darío te muc' ajwalil yu'un Persia.

¹⁶ Te israeletic, te sacerdoteetic yu'unic soc te levitaetic yu'unic, soc te yantic sujt'emiquix te la yich'ic loq'uesel ta slumalique, bin nax yo'tanic la spasic q'uin yu'un te la yaq'uic ta sc'ab Dios te temploe.

¹⁷ Ta yorail in to, la yac'beyic milbil smajt'an Dios jo'winic (100) ch'in toroetic, lajunwinic (200) chijetic, jbajc' (400) ch'in alal chijetic soc lajchayeb tentsunetic, juju-jcojt' yu'un te juju-jchajp sts'umbal israeletique, swenta smajt'an Dios te la yaq'uic yu'un te smul spisil Israele.

¹⁸ La sjel sbaic ta yat'el te sacerdoteetic ta chajbalchajp, soc te levitaetic la stsac yat'elic. Spisil jich la spasic swenta yich'jibal ta muc' Dios ta Jerusalén, jich nix te bit'il ts'ibubil ta libro yu'un Moisés.

¹⁹ Te mach'atic sujt'emiquix tel te la yich'ic loq'uesel ta slumalique, la spasic te q'uin Pascua ta xchanlajunebal c'aal sjajch'el ta sbabial u.

²⁰ Te sacerdoteetic soc te levitaetic la spoc sbaic, jich lecubic jich nix te bit'il c'aemic ta pasel ta stojol te Diose. Jich la yac'beyic te milbil smajt'an Dios yu'unic swenta q'uin Pascua te mach'atic sujt'emiquix tel te ac'bot yijq'uitay slumalique, soc te sjo'tac ta sacerdoteile, soc nix te yu'unic uuc.

²¹ Spisil te israeletic sujt'emiquix tel te la yich'ic loq'uesel ta slumalique, la swe'ic te we'elil yu'un Pascua. Ja' nix la sjoinic spisilic te mach'atic ma ba la yaq'uix sbaic a te bila ilaybil sba ta pasel yu'unic te nacionetic xch'uunejic loc'ombaetique, te jun la yac' sbaic soc ta yich'el ta muc' te Cajwaltic te Dios yu'un Israele.

²² Juqueb c'aal bin nax yo'tanic la spasic te q'uin swenta waj te ma ba yich'oj levadurae. Ja' nix te Cajwaltic te ac'botic yutsil yo'tanic yu'un, te bit'il Dios la yac'bey te muc' ajwalil ta Persia te ya xna'bot yo'bolil sbaic yu'une, soc te coltayotic ta xcha'pasel xan te templo yu'un Dios, ja' te Dios yu'un Israele.