Esdras 3 - Bible in Tzeltal de Oxchuc y Tenejapa

La xchapic xan yalbeyel wocol Cajwaltic

¹ C'alal la sta te sjuquebal u te israeletic ayiquix ta pamalpam slumalic a. Ta spisil te lume la stsob sbaic ta Jerusalén.

² Te Josué snich'an Josadac soc te sjo'tac sacerdoteetique, soc nix te Zorobabel snich'an Salatiel soc te xchapomale, jajch' spasic te scajtijib smajt'an te Dios yu'un Israel, swenta yu'un ya me xchic'beyic tey a te smajt'an te Diose, te ya yal ta mandalil yu'un Moisés, te swinic te Diose.

³ La spasic te scajtijib smajt'an Dios ta banti nix yawil, yu'un ja' la xi'ic te yajwal te q'uinale. Ta jujun sab soc ta jujun xmal c'aal la xchic'beyic smajt'an swenta yich'el ta muc' tey a te Cajwaltique.

⁴ Soc la spasic te q'uin swenta Nailwamal, jich te bit'il ts'ibubil ta mandalile. Ta jujun c'aal la xchic'beyic smajt'an te Diose, jich nix te bit'il ya yal te mandalil, chican te jich yipal te jujun c'aale.

⁵ Ja' nix jich te chic'bil smajt'an Dios yu'un jujun c'aale, soc te yu'un jujun yach'il u, soc te jujun ch'ul q'uin yu'un Cajwaltic, soc te smajt'an la yac'beyic te mach'atic spasemal yo'tanic ya yac'beyic te Cajwaltique.

⁶ C'alal ta sbabial c'aal sjajch'el a te sjuquebal u, jajch' xchic'beyic smajt'an te Cajwaltique, manchuc teme ma to ba jajch'em ta cha'pasel xan a te templo yu'un te Cajwaltique.

⁷ Jajch' yac'beyic taq'uin te albañiletic, soc te carpinteroetic. Soc te winiquetic ta Tiro soc ta Sidón la yac'beyic swe'el yuch'elic soc aceite, swenta yu'un ya me yich'ic jajch'el cedroetic ta Líbano, ya me yich'ic bael ta mar c'alal ta Jope, jich te bit'il ac'botic permiso yu'un Ciro te muc' ajwalil ta Persia.

Jajch' ta cha'pasel xan templo

⁸ Ja' yu'un ta xchebal u sjajch'el xchebal ja'wil sjulelic ta Jerusalén a, te Zorobabel snich'an Salatiel, soc Josué snich'an Josadac, te sjo'tac sacerdoteetic, te levitaetic, soc ta spisil te namey ic'otic loq'uel ta slumalic te sujt'ic xan tel ta Jerusalén, jajch'ic xan ta xcha'pasel te templo yu'un Dios. Ja' la yac'beyic swentain at'el te levitaetic c'axemix ta jtab ya'wilalique.

⁹ Te Josué soc snich'nab soc yermanotac, jchajp nax la yac' sbaic soc Cadmiel soc nix snich'nab, te ja' sts'umbalic te Judá, soc te sts'umbalic te Henadad soc snich'nab soc yermanotac te ja' levitaetic stuquelic. Jun nax la yac' sbaic swenta yu'un ja'ic me ya spasic ta mandal te mach'atic ya x'at'ejic ta templo yu'un te Diose.

¹⁰ Te c'alal la yaq'uic ochel te yiptajib te templo yu'un Cajwaltic te albañiletique, te sacerdoteetic la stejc'an sbaic, slapojic sc'u'-spaq'uic swenta sacerdote, soc ay oq'uesetic. Te levitaetic te sts'umbal Asaf, yich'ojic platillos swenta sc'ajintayel te Cajwaltique, jich te bit'il la yal mandal te David te muc' ajwalil yu'un te Israele.

¹¹ Yan mach'atic yacal ta sc'ajintayel yutsilal te Cajwaltique, yacal sjac'belic te yantique: “Albeyaic wocol te Cajwaltique, melel mero lec yo'tan, melel sbajt'el q'uinal c'ux ta yo'tan te Israele”, xiic. Spisil te yajwal te lume, awunic ta swenta sbujts' yo'tanic, soc yacalic ta yalel yutsil sc'oplal te Cajwaltic ta swenta te bit'il jajch'ix ta cha'pasel te templo yu'une.

¹² Soc ay tsobolic te sacerdoteetic, levitaetic soc jwolwanejetic yu'un juju-jchajp na te mamaliquix a te la yilic te sbabial templo, mero tulan oq'uic yu'un te la yilic te yac ta jajch'el ta pasel te yach'il templo. Tsobol xan yantic yacalic ta aw ta swenta sbujts' yo'tanic.

¹³ Ma'yuc mach'a ya xju' yu'un sna'el te awetic swenta sbujts' yo'tanique, soc te yoq'uelique, yu'un mero tulan te yawique, c'ubul chican ta aiyel stojol.