Efesios 6 - Bible in Tzeltal de Oxchuc y Tenejapa

Tac'uyel yu'un alnich'anetic soc me'il-tatiletic

¹ Alnich'anetic, ch'uunbeya smandal te ame'-atatic te bit'il ach'uunejic te Cajwaltique, te melel ja' stojil te jich ya apasique.

² Te sbabial mandal te ya yal te ay bila ya quich'tic yu'une, ja' in to: “Ich'a ta muc' te ame'-atate,

³ swenta yu'un lec me ya xc'oex, soc ya xnajt'aj aworailic yu'un ta balumilal”, te xie.

⁴ Ja'ex te sme'-statexe, ma me xawac' te ya x'ilin yo'tan awu'unic te awal-anich'anique. Ja' ya sc'an te lec ya ach'ijtesic, soc te lec ya ap'ijubtesic ta yalalil to, soc te ya atac'uyic ta swenta te Cajwaltique.

Sc'oplal abatetic soc te yajwalique

⁵ Abatetic, ch'uunbeyaic smandal te awajwalic ta balumilale. Xi'aic, soc nijc'anic me ta stojol, soc peq'uel me xawac' abaic ta stojol jich bit'il ta stojol te Cristoe.

⁶ Ac'a abaic ta abatinel, ma yejt'aluc te ya yilexe, jich bit'il te mach'atic ya sc'anic te lec ya x'ilot yu'un te ants-winiquetique. Jichuc me ta awo'tanic te ja' yabatex te Cristoe, socuc me awo'tanic ya apasic te bila ya sc'an yo'tan te Diose.

⁷ Toyoluc me awo'tanic ta abatinel. Jichuc me ta awo'tanic te bit'il ja' yacat ta abatinel yu'un te Cajwaltique, te ma ja'uc te ants-winiquetique.

⁸ Na'aic me te juju-jtulotic, teme lec te bila ya jpastique, ya me x'ac'bototic stojol jc'abtic yu'un te Cajwaltique, manchuc teme ayotic ta abatinel o teme ayotic ta libre.

⁹ Soc ja'ex te yajwalex te abatetique, jich nix ya sc'an ya apasic ta stojol uuc te abatetic awu'une. Ijq'uitayaic te ya axiwtesic ta tulan c'ope. Na'aic me te pajal ay Awajwalic ta ch'ulchan soque, soc ma'yuc mach'a tsabil nax yu'un te Diose.

Majq'uilal yu'un te Diose

¹⁰ Lec ay, quermanotac, ich'aic me yip awo'tanic ta swenta te Cajwaltique. Yu'un ja' nax ta swenta yip yu'el te ya xju' cu'untique.

¹¹ C'u'inaic me spisil te amajq'uilic yu'un te Diose, swenta yu'un jich me ma jtebuc ataelic ta lo'layel yu'un sp'ijil te pucuje.

¹² Yu'un ma ja'uc ya jtsal jbatic soc te mach'atic pajal jch'ich'-jbaq'uetaltic soque. Ja' ya jcontroin jbatic soc te pucujetic te ay yipique, soc te ay bayal yu'elique, soc te ajwaliletic yu'un te balumilal te ayic ta ijc' q'uinale, soc spisil te bila amen te ayic ta sjamalul te ch'ulchane.

¹³ Jich yu'un ya sc'an ya awich'ic spisil amajq'uilic yu'un te Diose, swenta yu'un jich me ya xju' awu'unic stsalel te bi c'aalil te ay awocolic yu'une. Jich ta patil te c'alal chapalexix ae, jich me ay yip awo'tanic ta lec.

¹⁴ Jich yu'un chapaluquex me ta lec: Chuca me ach'ujt'ic a te bila smelelile. C'u'inaic me te smajq'uil awo'tanique, ja' te toj-o'tanile.

¹⁵ Lapaic me te axanabique, ja' te chapalex yu'un xcholel te lec yach'il c'op te ya xlamaj q'uinal yu'une.

¹⁶ Soc yan xan, ich'aic me te smajq'uil abaq'uetalique, ja' te xch'uunjel awo'tanic te ya xju' awu'unic stup'el a te bit'il tilem sni' yat'ejib te pucuje.

¹⁷ Ich'aic me te smajq'uil ajolique, ja' te acolelique. Soc ich'aic me te spuñal te Ch'ul Espiritue, ja' te Sc'op Diose.

¹⁸ C'oponaic Dios spisil ora. Albeyaic wocol soc c'anbeyaic Dios te ya scoltayex ta spisil orae. Albeyaic wocol ta swenta te Espiritue. Wiq'uiluc me asitic, ma me xch'ajubex ta sc'oponel Dios ta stojolic te mach'atic ch'ul lum yu'un te Diose.

¹⁹ Soc c'oponbonic Dios ta jwenta uuc, swenta yu'un ya me scoltayon ta c'op te c'alal ya cal te sc'op Diose, soc ma me xiw co'tan te ya cac' ta na'el te lec yach'il c'op te muquen ay ta neelal toe.

²⁰ Dios sticunejon ta c'op ta stojol te ants-winiquetique. Ja' swentail te ayon ta chuquel ta cadena ta ora to. C'oponbonic Dios te ma ba xiw co'tan ta xcholele.

Spatjibal-o'tanil ta slajibal

²¹ Te quermanotic Tíquico te bayal c'ux ta co'tantique, te jun yo'tan yac'oj sba ta coltaywanej ta swenta te Cajwaltique, ja' me ya yalbeyex awaiyic spisil te bi quilel ayon li'to soc te bila yacon ta spasele.

²² Ja' swentail te la jticunix tel ta atojolique swenta yu'un ya me yalbeyex awaiyic te bi quilel ayotique, jich me ya smuc'ubtesbeyex te awo'tanique.

²³ Te Jtatic Diose soc te Cajwaltic Jesucristoe, ac'a yac'beyex lamal q'uinal soc xc'uxul awo'tanic ta swenta te xch'uunjel awo'tanic soc spisil te quermanotactique,

²⁴ soc ac'a yac'beyex bayal yutsil yo'tan ta apisilic te c'ux ya awaiyic ta awo'tanic te Cajwaltic Jesucristoe, te xujt' ma xyanaj stuquel te sc'uxul yo'tane. Jichuc.