Eclesiastés 9 - Bible in Tzeltal de Oxchuc y Tenejapa

Sc'oplal cuxlejal soc lajel

¹ Ta mero melel la cac' co'tan ta sna'el spisil; pero ja' nax la jta te ay ta sc'ab Dios te yat'el te mach'atic lequic soc te ay sp'ijilique. Ma ba sna'oj ni jtuluc te ants-winiquetic te bit'il ay sc'oplal te c'uxtaywaneje, ni ja'uc te ilaywaneje, manchuc me ay ta sitic.

² Melel pajal yacalic ta maliyel yu'un lajel ta spisilic, manchuc me tojic o ma tojuque; manchuc me lec o ma lecuc; manchuc me lecubtesbil o ma lecubtesbiluque; manchuc me ya yac' milbil majt'anil, o ma ba ya yaq'ue; ja' nix jich te mach'a ma'yuc smule, o ja' te mach'a ay smule; te ay bi jc'axel xchapoje, o ja' te mach'a ma'yuc bi jc'axel xchapoje.

³ Te bila amen ya xc'ax ta pasel ta balumilale, ja' te pajal quechel ya xc'ot ta swentaic spisilique. Soc yan xan, te bila ya snop ta sjol soc ta yo'tan te ants-winique, nojel ta bila amen; ja' te mulile, ja' u'uninbil yu'un ta sjol te jayeb c'aal cuxule. Te bila mero slajibale, ja' te c'oel ta muquenale.

⁴ Pero ay to xan bila lec ya smaliy te mach'a cuxul toe. Melel ja' lec te ts'i' te cuxul toe; ma ja'uc lec te león-choj te lajemixe.

⁵ Yan te mach'atic cuxulique, ya sna'ic te puersa quechel ya xlajique. Pero te mach'atic lajemiquixe, ma'yuc bi sna'ojic, soc ni ayuc bila ya staic, melel jc'axel ch'aybiliquix ta o'tanil.

⁶ Tey ya xlaj a te xc'uxul yo'tane, te ilaywanej soc te bila xbiq'uet ta yo'tane; ma xyaq'uix sba a te bila ya yich' pasel ta balumilale.

⁷ Ja' yu'un ya calbat, binuc nax me awo'tan ya xwe'at, soc binuc nax me awo'tan ya awuch' te vino awu'une, melel buen lec yo'tan Dios yu'un te awat'ele.

⁸ Spisiluc me ora buen sac ac'u'-apac' ya alap, spisiluc me ora ya awac'bey perfume ajol.

⁹ Binuc nax me awo'tan ya x'ainat soc awinam, ta spisil ora te ay acuxlejal te ma'yuc swentaile, te ja' ya yac'bat te Dios ta balumilale. Melel ja' nax me ya ata yu'un te bayal at'el la apas ta balumilal.

¹⁰ Spisil te bi ya xju' awu'un spasele, pasa me. Jun me awo'tan xapas, melel ta muquenal te banti quechel ya xbaate, ma'yuc bi ya xju'ix ta pasel tey a, soc ma'yuquix bi ay ta na'el, ma'yuquix bi ay ta nopel, soc ni ayuc xan swentail tey a te p'ijil c'ope.

Te bila ma stojiluc ya jtatic te cuxulotique

¹¹ Ta balumilal ay yan bila quiloj: Ma ja'uc te mach'a ya xju' yu'un animal te ya stsalawan ta animale, soc ni ja'uc te mach'atic ma sna'ic xiwel te ya tsalawanic ta guerra. Ma ja'uc spisil ora ay swe'el yu'un te mach'atic ay sp'ijilique, ni ja'uc jc'ulejetic te mach'atic ay snopjibal yu'unique, soc ni ja'uquic te mach'atic p'ijubtesbilic te buen maliybilique. Ta spisilic ta ch'in ajc' nax te jich ya xc'ot ta swentaique.

¹² Soc yan xan, ma'yuc mach'a sna'oj te bi c'aalil ya xc'ot yorail; jich c'oem te bit'il chayetic macal ya xjil ta stsacjibal, jich te bit'il ja'mal mut ya x'och ta pejts'e. Ja' nix jich te ants-winique, xujt' ma'yuc bi ya sna' a; c'alal ya yil julix tel yorail wocol ta stojol.

¹³ Ay xan yan te bila quiloj ta balumilal, jich ya quil te bit'il ay yich'oj mero muc' nopjibale:

¹⁴ Ay jpam ch'in lum, ma'yuc bayal yajwal, pero tal ta ac'beyel guerra yu'un jtul muc' ajwalil te bayal yipe. Te muc' ajwalil ta sjoyobal la spas smajq'uilic ta yaq'uel guerra.

¹⁵ Ta bay te ch'in jpam lume, ay nainem jtul winic buen me'ba, pero bayal sp'ijil. Ya xju' yu'un ya scoltay ta swenta sp'ijil te lume, pero ma'yuc mach'a ya xna'ot yu'un te me'ba winique.

Ta spisil te bitic aye, ja' toyol sc'oplal te p'ijilile

¹⁶ Pero jo'on ya cal ta jamal, ja' cajal sc'oplal te jp'ijiltique, ma ja'uc te quiptique. Ja'uc me to ma x'ich'ot ta muc' te p'ijil c'op yu'un te winique te ma'yuc bi ay yu'une, soc ma'yuc mach'a ya yaiybey te bila ya yal te me'ba winique.

¹⁷ Ja' buen lec ta aiyel te lamal sc'op te mach'atic ay sp'ijilique; ma ja'uc lec ta aiyel te xch'inch'on nax awetic ta stojol te muc' ajwalil yu'unic te mach'atic ma sna'ic q'uinale.

¹⁸ Ja' bayal ya xtuun te p'ijil c'ope, ma ja'uc ya xtuun te at'ejibaletic yu'un guerra. Manchuc me jtul nax te mach'a ya sta falta, jc'axel bayal bila ya xjin yu'un.