Eclesiastés 7 - Bible in Tzeltal de Oxchuc y Tenejapa

Aiya awaiy stojol ta lec te bila bayal sc'oplale

¹ Ja' bayal yutsil te mach'a buen lec sc'oplale; ja' peq'uel sc'oplal te lequil perfume. Ja' bayal yutsil te bi c'aalil ya xlajotique; ma ja'uc bayal yutsil te bi c'aalil ayinotique.

² Ja' lec te bael ta muquenale; ma ja'uc lec te pas-q'uine. Melel te lajele, ja' slajibal spisil ants-winiquetic; te mach'atic cuxulique ya me sc'an ya sna'ic.

³ Ja' lec te oq'uele; ma ja'uc lec te tse'eje. Manchuc me ya xbolob quelawtic yu'un oq'uel, pero xjamet ya xbajt' co'tantic yu'un.

⁴ Te mach'a ay sp'ijile bayal bi ya snop yu'un te ya xlaje; yan te mach'a ma sna' q'uinal, ya xbajt' ta yo'tan spasel q'uin.

⁵ Ja' bayal yutsil te ya quich'tic comel yu'un te mach'a ay sp'ijile; ma ja'uc lec teme buen lec jc'oplaltic yu'un te mach'atic ma sna'ic q'uinal.

⁶ Te stse'ej te mach'atic ma sna'ic q'uinal ja' pajal soc te sc'op ch'ix c'alal yac ta c'ajq'uele, mero tojol nax ta jyalel.

⁷ Te uts'inel ya sjinbey sjol te mach'a ay sp'ijile; te mach'a ya yich' taq'uin yu'un ma tojuc ya xchajbanwan, ya xbolob stalel yu'un.

⁸ Ja' lec ta aiyel te c'alal ju'ix ta chapel a te c'ope; ma ja'uc lec ta aiyel te c'alal ya yich' jachele. Ja' lec teme jun awo'tan ya xc'ax awocole; ma ja'uc lec teme toyba ayate.

⁹ Ma me xawac' stsalat ilimba; melel te ilimbae, ja' yu'un stuquelic te ants-winiquetic te ma sna'ic q'uinale.

¹⁰ Ma me xajojc'o awaiy bi yu'un te ja' lec spisil te c'aal c'axemixe, melel ma ja'uc jich ya sjojc'o te mach'a ay lec snopjibal yu'une.

¹¹ Buen lec te p'ijil-o'tanil soc ya xtuun yu'un te mach'atic cuxulic ta balumilale, teme ay nix bi ac'bil jilel yu'unine.

¹² Melel te p'ijil-o'tanil ya xcoltaywan, ja' nix jich ya xcoltaywan te bit'il te taq'uine, pero te p'ijil-o'tanil ja' mero ya xju' yu'un ya yac'bey xcuxlejal te mach'a ya xch'uun tojtesel yu'une.

¹³ Tsajtaya awil ta lec te bila spasoj te Diose: ¿Mach'a ya xju' yu'un ya stojtes te bila ts'otol pasbil yu'un te Diose?

¹⁴ Teme bi ora buen lec ayat ya awaiye, aiybeya me yutsilal awaiy; pero teme bi ora ma lecuc ayat ya awaiye, ya me sc'an ya anop awaiy. Melel ta xchebal talem ta stojol Dios, soc te ants-winique ma ba ya sna' te bila ya xc'ot ta swenta ta patile.

¹⁵ Ta spisil in to quilojix te jayebix c'aal cuxulon te mero ma'yuc swentail ya caiy te jcuxlejale, mero tojol ta jyalel. Ay mach'atic lajiquix bael, manchuc me lec yo'tanic, soc ay mach'atic mero amen yo'tanic, pero manchuc me mero amen yo'tanic, bayal ja'wil cuxinic.

¹⁶ Ma me jc'axeluc toj ya acuy aba, soc ma me c'ax p'ijuc ya awac' aba. ¿Bi swentailuc teme ja'at nix ya ajin abae?

¹⁷ Ma me jc'axeluc amen ya acuy aba, soc ma me jc'axeluc bol ya acuy aba. ¿Bi swentailuc ya xlajat, teme ma to sta yorail ya xlajate?

¹⁸ Ja' lec teme ya atsac in to, soc ma me xcol bael ta ac'ab te yane. Te mach'a ya yich' ta muc' te Diose, spisil me lec ya xc'ot yu'un stuquel.

¹⁹ Te mach'a ay sp'ijile, ya x'ac'bot bayal yip yu'un te p'ijil-o'tanile. Ma ja'uc bayal yip ya xc'ot yu'un jpam lum, teme ay lajuntul te ajwaliletic yu'une.

²⁰ Melel ma'yuc ni jtuluc ta balumilal te mero toj, te spisil ora ja' ya spas te bila leque, te ma'yuc ya sleix smule.

²¹ Ma me x'awich' ta wenta ta spisil te bitic ya x'alote, jich me ma ba ya awaiy a te bila amen ya yalbat ac'oplal te abat awu'une,

²² manchuc teme ja'at, ana'oj ta lec te ay bayal buelta bila amen awalojbey sc'oplal yantic.

Sleel p'ijil c'op

²³ Ta swenta sp'ijil co'tan och jtsajtay quil ta lec, melel te jo'one la cal jba te ay jp'ijile, pero ma xc'ot ta co'tan.

²⁴ Ma xc'ot ta co'tan spisil bit'il aye; mero chujc'ul ta na'el, ma'yuc mach'a ya xc'ot ta yo'tan.

²⁵ Och cat'elin sleel ta sna'el, ochon ta snopel, ta sleel bi p'ijil c'op ya jta xan. C'ot ta co'tan te mero ma lecuc te bol-o'tanile, soc te jowil jol te mero amen ya cac' jbajtique.

²⁶ Ay bi yan jtaoj te c'axem jich xch'aal c'oem a te bit'il te lajele: Ja' te ants ya syacotic ta spejts' te ya xpetawan ta sc'abe. Te mach'a bin nax yo'tan Dios yu'une, ma ba ya x'och ta sc'ab stuquel; yan te mach'a ay ta mulile, ya me x'och ta spejts' stuquel.

²⁷ Te bit'il chapal cu'un te ya jtabey swentail te bitic aye, jo'on te jp'ijubteswanejone, ja' nax jtaoj in to:

²⁸ Ma to ba jtaoj te bila mero yacon ta sleele. Ay jtaoj jtul lequil winic ta banti yolil jmil ta jtul winiquetic, pero te antsetique ma'yuc jtaoj ni jtuluc lec ta yolil ta spisilic te antsetique.

²⁹ Ja' nax jtaoj in to: ja' te bit'il buen toj yo'tan pasot yu'un Dios te ants-winiquetique, pero te ants-winiquetic chujc'ulajix yu'unic te xcuxlejalique.