Eclesiastés 5 - Bible in Tzeltal de Oxchuc y Tenejapa

Teme ay bi la awalix ya apase, ya me awac' c'otuc ta pasel

¹ Te c'alal ya xbaat ta templo yu'un te Diose, buen tsajtaybil me x'ainat tey a. Ma me ja'uc nax xbajt' awo'tan yaq'uel milbil majt'anil, jich te bit'il ya spasic te ants-winiquetic te ma sna'ic q'uinale, te ma ba ya sna'ic te amen te bi ya spasique. Te ja'ate, noptsajan xan me bael ta sts'eel te Diose, junuc me awo'tan xach'uunbey spisil smandal.

² Ma me ayuc bi ora nax ya alom ta chapel ta stojol Dios, ni ya awal ta awe, o ya awal ta ajol ta awo'tan. Melel te Diose ay ta ch'ulchan stuquel, yan te ja'ate ayat ta balumilal. Ja' yu'un tsajtaya me, ma me najt'uc ya xc'ot te ac'op te c'alal ya xc'opojate.

³ Melel ta scaj bayal bila ya anop te ya xwaichejate, soc ta scaj te bayal ya xc'opojat te ya xloc' bol c'op ta awe.

⁴ Teme ay bila ya awal ya apasbey ta stojol te Diose, ora me xawac' c'otuc ta pasel, melel te Diose ma smulan te mach'a ma sna' q'uinale. Ja' yu'un pasa me te bi ya awal ta jamal ya apas ta stojol te Diose.

⁵ Melel ja' lec te jc'axel ma'yuc bi ya awal ya apase, ja' wocol teme ya awale, pero teme patil ma ba ya xc'ot ta pasel awu'une.

⁶ Ma xawac'bey permiso te awe te ya yac'bat ale amule. Patil ya awalbey te mach'a ticunbil yu'un Dios ta atojol, te scaj jowil c'op te jich la awale. ¿Bi yu'un ya awac' ilinuc Dios yu'un te bila ya awale, soc te ya sjin ta jc'axel te bila apasoje?

⁷ Ja' yu'un te ja'ate, ta yolil te tojol ipal ch'inch'in c'opetic te pajal soc waichile, ya sc'an ya awac' ta ilel te awich'oj ta muc' te Diose.

Bitic lec soc bitic ma lecuc

⁸ Ma me jchajbuc q'uinal ya awaiy yu'un, teme ay ya awil ta yantic lum te banti yacalic ta uts'inel te me'baetique, soc te ya yixlanic ta pasel te bi stojil ay ta stojolique. Melel ay me yan mach'a cajal yu'un te mach'a toyole, in te mach'a toyole ay to xan mach'a cajal yu'un a, pero ta xchebalic ay to xan yan mach'a mero toyol xan yu'unic a.

⁹ Ja' me stoyesel yutsil-slequil te lum yu'unic ta sc'opique, soc te muc' ajwalil yac ta at'el ta slecubtesel te lum yu'un ta sc'ope.

¹⁰ Te mach'a xbiq'uet ta yo'tan te taq'uine, spisil ora ay to yan ya sc'an ya yaiy a te jayeb ayix yu'une. Te mach'a xbiq'uet ta yo'tan te c'ulejalile, ma'yuc bi ora ya yal te ayix tsobol yu'une. Ja' ni me jich mero tojol ta jyalel,

¹¹ melel teme ay bayal awu'une, ja' nix jich bayal ya alajin. ¿Bi ya xloc' a te ay awu'une? ¿Ja' xanix bal te ya amulan yilel te jayeb ay awu'une?

¹² Te mach'a ya x'at'eje, manchuc me bayal ya xwe' o ma'yuc bayal ya xwe', pero jun me yo'tan ya xway spisil ora stuquel. Yan stuquel te jc'uleje, ma x'ac'ot ta wayel yu'un stuquel te sc'ulejale.

¹³ Ta balumilal ay bi mero mel-o'tantic sba quiloj: Ja' te mach'a ya sbusan ipal c'ulejalil yu'une, ja' nix ya sta swocol yu'un a.

¹⁴ Melel ta scaj nax te ma stojiluc manbajel chonbajel, ya xlaj yu'un spisil te sc'ulejale. Teme ay jtul snich'ane, ma'yuquix ni jxujt'uc ya yac'bey jilel.

¹⁵ Te bit'il jul tel ta balumilal, ja' nix jich ya xcha'sujt' xan bael: te bit'il mero t'anal a te ayine, ma'yuc ni jxujt'uc ya yich' bael te sit te yat'ele.

¹⁶ Ja' mero mel-o'tantic sba ta melel. Melel te bit'il tale, ja' nix jich ya xcha'sujt' xan bael. Melel ¿bi ya sta a te mero bayal at'eje?

¹⁷ Soc xan, te jayeb c'aal cuxul ta q'uinale, cuxin ta ijc' q'uinal, c'ux obol sba, soc bayal swocol te c'ax ta q'uinale.

¹⁸ Te jo'one la jta ta na'el te bila lec ya sc'an pasel soc te bi mero t'ujbile: Ja' te we'el-uch'ele, soc te ya jc'ases co'tantic ta stuuntesel te sit te cat'eltique, te c'ax bayal jwocoltic ta at'el yu'un te jayeb nax c'aal la yac' cuxinucotic ta balumilal te Diose. Ja' nax cu'untic abi.

¹⁹ Ay to xan yan a, te mach'a Dios ya x'ac'bot bayal sc'ulejal yu'une, ya x'ac'bot permiso yu'un ya swe' ya yuch' te bi snujp' te sc'ulejale. Melel te bit'il bin nax co'tantic ta at'ele, yu'un talem ta stojol Dios.

²⁰ Melel Dios ya yac'botic bayal yutsil co'tantic; ma ja'uc ya jna'ulaytic te bit'il ya xc'ax cu'untic c'aal te cuxulotic ta q'uinale.