Eclesiastés 4 - Bible in Tzeltal de Oxchuc y Tenejapa

¹ Bajt' co'tan ta yilel te tulan uts'inel yac ta pasel ta balumilal. La quil te mach'atic yacal yich'belic tulan uts'inele, yacalic ta oq'uel, pero ma'yuc mach'a ya xmuc'tesbot q'uinal yaiyic yu'un. Ya x'ac'botic tulan swocolic yu'un, pero ma'yuc mach'a ya xmuc'tesbot q'uinal yaiyic yu'un.

² Ja' yu'un la cal te ja' mero lec ayiquix te mach'atic lajiquixe, ma ja'uc lec ayic te mach'atic cuxulic toe.

³ Manchuc ta xcha'chajbalic, ja' mero lec ayic te mach'atic ma to ba ayinemique, melel ma to ba yilojic te bitic amen ta pasel ta balumilale.

⁴ La quil te bayal ya x'at'ejotique, te bayal ya x'esmaj jbiluctic swenta bit'il muc' at'el ya jchajbantique, talel c'axel ya xjajch' bic'tal-o'tantay jbajtic yu'un. Ja' nix jich mero tojol ta jyalel, soc te ja' pajal soc te yacuc jtsactic te iq'ue.

⁵ Te ants-winiquetic jich ya yalic: “Te mach'a ma sna' q'uinale ya spet sc'ab, jich ya sjin sba ta stuquel a”, xiic.

⁶ Pero jo'on jich ya cal: “Ja' bayal sc'oplal teme ya jcux co'tantic jtebuque, ma ja'uc ay sc'oplal teme ya jmil jbajtic ta bayal at'el, yu'un ja' pajal soc te yacuc jtsactic te iq'ue”, xoon.

⁷ Yan xan la quil te bi mero tojol ta jyalel yac ta pasel ta balumilal:

⁸ Ay jtul winic mero stuquel ay ta q'uinal, ma'yuc mach'a jun yo'tan soc ni snich'nabuc, ni yermanotac. Pero ma xcux yo'tan ni jtebuc, soc te spisil ora ma xcux yo'tan ta smulanel te sc'ulejale, ni ayuc yan bila ay ta yo'tan. Ni yacuc sna' ta yo'tan mach'a yutsil-slequil ya xc'ot te yat'el te ma xcux yo'tan ta spasele, soc ma ba ya snop te bi yu'un te cujch'em yu'un te swocole. Ta spisil mero tojol ta jyalel, soc mero yalal ijc'atsil c'oem.

Ja' quiptic teme jun ayotique

⁹ Ja' toyol c'oem te chebe, ja' peq'uel te mach'a jtul naxe. Melel te chebe ja' toyol ya xloc' sit te yat'elique.

¹⁰ Teme ya xyal te jtule, te yane ya me stam jajch'el. Pero ay me swocol stuquel te mach'a jtul nax ay teme yale, melel ma'yuc mach'a ya xtsacot jajch'el yu'un stuquel.

¹¹ Soc xan, teme cheb ya slac' sbaic ta wayele, talel c'axel ya sq'uixnay sbaic. Pero teme stuquele, ma ba ya xq'uixnaj.

¹² Te mach'a stuquel aye, ya me yich' tsalel; pero teme chebique ya me xju' yu'unic tsalaw. Soc teme ay oxp'ij te hilera ya yich' ts'otele, ma orauc ya xtuch'.

Ma ja'uc ay sc'oplal ya'wilal te mach'a ay sp'ijile

¹³ Soc yan xan, ja' bayal sc'oplal te querem te me'ba teme ay sp'ijil yo'tane; ma ja'uc bayal sc'oplal te muc' ajwalil mamalix teme ma sna' q'uinale. Melel te mamale ma sc'anix tojtesel stuquel.

^14-15 Manchuc me ja' ya x'och ta muc' ajwalil te querem, te loq'uel to ta chucjibal a te ya xmo ta muc'ul nactijibale, o teme mero me'ba a te mo ta muc'ul nactijibale, quiloj te ants-winiquetic ta balumilal te ya smulanbeyic yat'ele.

¹⁶ Manchuc me ma x'ajtabaj te yajwal lum ya swentaine, ni ja'uquic, ni ja'uc te patil alnich'anetic yu'un, te bin nax yo'tanic ya xjil yu'une. Ja' nix jich, mero tojol ta jyalel, ja' pajal soc te yacuc jtsactic te iq'ue.