Eclesiastés 3 - Bible in Tzeltal de Oxchuc y Tenejapa

Spisil ay yorail

¹ Ta balumilal spisil ay yorail ta pasel. Ay yorail ta jujun te bila ya xc'ot ta pasele:

² Ay yorail ayinel ta q'uinal, soc ay yorail lajel bael ta q'uinal. Ay yorail ts'unbajel, soc ay yorail ta bulel te bi la yich' ts'unele.

³ Ay yorail milaw, soc ay yorail poxtayel. Ay yorail te bila ya yich' jinel, soc ay yorail te bila ya yich' pasel.

⁴ Ay yorail oq'uel, soc ay yorail tse'ej. Ay yorail mel-o'tan, soc ay yorail pas-q'uin.

⁵ Ay yorail ta puquel bael tonetic, soc ay yorail ta tsobel tel. Ay yorail ya spet sbaic, soc ay yorail ya yijq'uitay sbaic.

⁶ Ay yorail ta leel, soc ay yorail ta ch'ayel. Ay yorail ta q'uejel, soc ay yorail ta ch'ojel.

⁷ Ay yorail ta jatsel, soc ay yorail ts'isel. Ay yorail ch'abal q'uinal, soc ay yorail aiyej.

⁸ Ay yorail mulanel, soc ay yorail ilayel. Ay yorail guerra, soc ay yorail lamal q'uinal.

⁹ ¿Bi ya xloc' yu'un a te winic te mero bayal ya x'at'eje?

¹⁰ La jna'ix te ijc'atsil ya x'ac'bot scuch yu'un te Diose, swenta yu'un ya yac' bic'tajuc a.

¹¹ Te bi ora jich la sc'ane, spisil t'ujbil la spas. La yac'bey sna' ta yo'tan te ants-winiquetic te bitic swenta sbajt'el q'uinal, manchuc me ma xju' yu'unic sna'el te smuc'ul sjamalul te bila spasoj te Diose, soc te bitic ya to spas baele.

¹² Ya jna' te bi mero lec ya spas te ants-winiquetique: Ya sc'an te ya sc'ases yo'tanic ta smulanel te bitic aye, soc ya sc'an ya yaiybeyic yutsilal te cuxlejale.

¹³ Melel te ya xwe'otic ya x'uch'otic, soc teme ya jmulantic te bitic ya xloc' a te cat'eltique, yu'un ja' nix te Dios te jich yac'ojbotique.

¹⁴ Spisil te bitic spasoj te Diose, jna'oj te stalel aye. Ma'yuc bi pasel xan ya sc'an, soc ma'yuc bi loq'uesel ya sc'an. Dios jich la spas, swenta yu'un c'alal ya yilic te ants-winiquetique, ya xch'uunic.

¹⁵ Ma'yuc bi ay te ma'yuc ta nameye, soc ma'yuc bi ya xchicnaj te ma'yuc chicnajeme. Ja' nix te Dios ya yac' chicnajuc xan yan buelta te bila c'axemixe.

Te bila ma stojiluc ta cuxlejal

¹⁶ La quilix ta lec ta balumilal te ya jtatic te bitic amen ta banti sc'oplal ay lequil chajbanele, soc ya jtatic te bitic ma lecuc ta pasel ta banti sc'oplal ay stojil te c'ope.

¹⁷ Ja' yu'un te ya cale, te Dios ya xchajbanot yu'un te mach'a lec yo'tane, soc Dios ya xchajbanot yu'un te mach'a amen yo'tane. Melel ay yorail yu'un spisil te bitic ya xchicnaje, soc ay yorail yu'un te bitic ya xc'ot ta pasele.

¹⁸ Ya cal xan, te bi yilel yat'el te ants-winiquetic, Dios yacal ta pasel ta prueba yu'un, swenta yu'un ya sna'ic a te ja' nix pajalic soc te chambalametique.

¹⁹ Ta mero melel, te ants-winiquetic soc te chambalametic, pajal ay slajibalic, pajal ya xlajic bael. Melel te bit'il cuxulique, pajal ya yich'ic ic', soc ta swenta bit'il ya yich'ic ic' te cuxulique. Ma'yuc mach'a cajal, ni te ants-winic ni te chambalame: ta spisil, mero tojol ta jyalel.

²⁰ Melel te banti ya xbajt'ique, jun nax yawil ya xc'otic. Melel ta ts'ubil lum pasbilic ta spisilic a, ja' nix jich ta ts'ubil lum ya sujt'ic xan ta spisilic.

²¹ ¿Mach'a ya xju' ya yal te ya xmo bael ta stoyolil ch'ulchan te xch'ulel te ants-winique, soc te ya xco bael ta sc'ubulil lumq'uinal xcuxlejal te chambalame?

²² La jna'beyix swentail ta lec, te ma'yuc bi mero t'ujbil ta mulanel te ya yaiybey yutsilal te winique, ja' nax te ya stuuntes te yat'ele. Ja' nax yu'un abi, melel ma'yuc mach'a ya xbajt'ic ta iq'uel tel yu'un, te ya xtal yil xan te bi ya xc'ot ta pasel te c'alal lajemixe.