Eclesiastés 12 - Bible in Tzeltal de Oxchuc y Tenejapa

¹ Na'a me te Jpaswanej awu'un te bit'il jch'ielat toe, te bit'il ma to staojuc yorail te awocol te c'alal ya xmamalubate. Melel ya me sta yorail te jich ya awale: “Jc'axel ma jtabey yutsilal ya caiy te jcuxlejal ta q'uinale”, te xaate.

² Pasbeya yat'el Dios ta ora yo'tic, c'alal ma to xtup' ta asit te xojobil te c'aal, te u, soc te eq'uetique, soc te c'alal ma to stsob sba te awocole.

³ Ya xc'ot yorail te ya xjajch'ic ta nijq'uel te ac'abe, soc ya xlaj yip te awacane. Ya xc'ot yorail te wocol ya xwe'at yu'un ma'yuquix sbaq'uel te awee; soc ma xchicnajix q'uinal yu'un boloben te asite.

⁴ Jich ora ya xmajc' te achiquine, soc ma xchicnaj ya awaiy te sc'op te molinoe. Ya me xiwtesat te sc'op te ja'mal mutetic.

⁵ Ya me xiwat te ya xbeenat ta banti toyol, soc ay me xiwel ya awaiy te ya xbeenat ta bebetic. Ya me xjajch' ta sacubel te ajole. Ya xlaj yip te abaq'uetale, soc ma xtuun awu'un te poxile te ya yac' xan sbujts' q'uinal ya awaiy yu'une. Melel ya sta yorail te ya xbaat ta muquenal; ta calle ya me xchicnaj yoq'uel te mach'atic ya yoq'uetayate.

⁶ Na'a me te Jpaswanej awu'un te bit'il ma to staoj yorail te ya xtuch' te ch'ajan pasbil ta plata, soc ma to ba wuyem te oxom pasbil ta oro; soc ma to top'enuc te q'uib ta sti'il te sloq'uibja'e, soc te ma to xet'emuc te scaruchail te sloq'uesibal te ja'e.

⁷ Te c'alal ya xc'axe, te ts'ubil lume ya sujt' xan bael ta lum, jich nix te bit'il ay ta neelal to; te ch'ulelale ya sujt' xan bael ta stojol Dios, melel ja' nix la yac' a.

⁸ Jo'on te jp'ijubteswanejone, ya cal xan: “Mero tojol, tojol ta jyalel”, xoon. Ta spisil mero tojol ta jyalel.

Slajibal c'opetic

⁹ Bayal la yich' sp'ijil yo'tan te jp'ijubteswaneje, jich bayal bi la yac'bey snop te ants-winiquetique. Soc la yich' starea ta snopel mero bayal p'ijil c'opetic, soc buen lec xmelmon la xchap.

¹⁰ La yac' yo'tan ta sleel te c'opetic te snujp' ya xc'ote, swenta yu'un jich me buen t'ujbil ta sts'ibuyel ya xc'ot yu'un a te bitic mero smelelile.

¹¹ Te p'ijil c'opetic yu'un te mach'atic ay sp'ijilique, jich c'oemic te bit'il chicote ya quich'tic tojtesel ae. Te c'alal yich'ojix chajbanel a, jich c'oemic te bit'il estacaetic te buen lec yich'ojic ts'apele, ts'apbil yu'un jtul nax jcanantaywanej.

¹² Te bi ya jtatic ta swentaique, ja' te ya yal caiytic te ya sc'an ya jtsajtay jbajtique. Te spasel tsobol libroetic ma'yuc slajibal; te bayal bi ya jnoptique ya xlubotic yu'un.

¹³ Lajix ta alel te c'opetique, spisil la yich'ix alel. Ich'a ta muc' te Diose, ch'uunbeya te mandaliletic yu'une, melel ja' nax ta spisil te ay ta swenta spasel te ants-winiquetique.

¹⁴ Dios me ya yich'botic ta wenta spisil te cat'eltique, manchuc me lec o ma lecuc, manchuc me muquen la jpastic.