Eclesiastés 10 - Bible in Tzeltal de Oxchuc y Tenejapa

¹ Te ja te lajeme, teme tuube, ya xch'aybey yic' te lequil perfume. Ja' nix me jich te jp'al bol c'ope, ya me xch'aybey yutsil te lequil p'ijil c'ope.

² Te mach'a ay sp'ijile, ja' ya xtal ta yo'tan te bila leque; pero te mach'a ma sna' q'uinale, ja' ya xtal ta yo'tan te bila amen.

³ C'alal ya xbeen ta be te mach'a ma sna' q'uinale, ya yac' ta ilel te ma'yuc sp'ijil sjole; soc ya yac' ta na'el te ma sna' q'uinal ta stojol te yantique.

⁴ Teme ya x'ilin ta atojol te mach'a ochem ta ajwalil, ma me ja'uc xawijq'uitay awat'el yu'un; melel ja' poxil c'oem yu'un te mach'a ya sta falta, te lamal awo'tan ya awac' aba ta stojol.

⁵ C'oem ta co'tan te ay falta ya yich' pasel ta balumilale, te ja' nix jachem ta stojol te mach'atic ochemic ta ajwalile:

⁶ Te mach'atic mero ma sna'ic q'uinale, ja' ya yac'beyic toyol yat'el; yan te mach'atic ay sc'oplale, ja' ya yac'beyic ta swenta te banti peq'uel sc'oplal te at'ele.

⁷ Ay quiloj mosoetic cajajtic ta caballo; soc quiloj ajwaliletic, te ja' ya xbeen ta yacanic jichuc mosoetic.

⁸ Te mach'a ya sjoc' ch'en, ya me xch'ay coel tey a. Te mach'a ya sjin te ts'ajq'ue, ya me xti'ot ta chan.

⁹ Te mach'a ya swaluy ton, ya me x'ejch'entesot yu'un. Te mach'a ya xot' te si'e, ora ya sboj sba yu'un.

¹⁰ Teme ya xlaj ye te yecheje, teme ma ba ya sjuxe, mero tulan ya sc'anix jimel. Te bitic ya yich' pasel, ja' lec teme buen lec ya yich' pasele, soc ja' lec teme soc p'ijilil ya yich' pasele.

¹¹ ¿Bistuc ya yich' monel chan teme ti'awanixe? Tojol xanix ya yich' monel.

¹² Te sc'op te mach'a ay sp'ijile, ya x'ac'bot yutsil q'uinal yaiy yu'un; yan te sc'op te mach'a ma sna' q'uinale, ja' nix ya xjinot yu'un te sc'ope.

¹³ Melel puro amen c'opetic ya xjajch' ta yalel; soc ja' slajibal sc'op ya xc'ot te bitic mero amen nax sbae.

¹⁴ Te mach'a ma sna' q'uinale, ma wocoluc ya xwejt' yu'un te bi ya yale. ¿Mach'a ya xju' yu'un yalel te bila ya to xc'ot ta pasele? Melel ma'yuc mach'a ya xju' yu'un sna'el te bila ya xtal ta patil baele.

¹⁵ Te mach'atic ma sna'ic q'uinale, bayal ya smil sbaic ta at'el; jich ma sna'ic te banti ay sbelal te lume.

¹⁶ Ay me swocol te nación teme ch'in querem ochem ta muc' ajwalil yu'une, soc teme yacal ta pas-q'uin a ya sacub q'uinal yu'un te ajwaliletique.

¹⁷ Bin nax me yutsil te nación ay buen lequil ajwalil yu'une. Te c'alal yorail te ya xwe'ic te ajwaliletic tey a, ya xwe'ic yu'un ya xtal xan yipique, Soc ma x'ochic ta yacubele.

¹⁸ Te mach'a ch'aje, ya xch'ay coel smujq'uil te snae; ta scaj te xch'ajile, ya xjin coel ta snae.

¹⁹ Te we'elile, yu'un ya caiybeytic sbujts'; te vino, yu'un ya yich' aiybeyel yutsil. Pero ja' ya spas falta te taq'uine.

²⁰ Ma me xalaban te muc' ajwalile; ma me ayuc bila ya awal ta awo'tan ta stojol. Ma me ayuc bila amen xawal ta stojol te jc'uleje, manchuc me atuquel ayat. Ja' me x'ana' te ya xwil te ja'mal mutetique, ya me xju' yu'unic te ya xba yalbeyique.