Eclesiastés 1 - Bible in Tzeltal de Oxchuc y Tenejapa

Tojol spisil, ma'yuc swentail ya xc'ot

^1-2 Ja' te bila la yal te jp'ijubteswanej, ja' te snich'an David, te och ta muc' ajwalil yu'un Jerusalén. Mero tojol, tojol ta jyalel. Ta spisil, mero tojol ta jyalel.

³ ¿Bi ya xloc' yu'un a te winic te lom bayal ya x'at'ej ta balumilal?

⁴ Ay yacalic ta ayinel ta q'uinal, ay yantic yacalic ta lajel bael, pero te balumilale ma ba ya xyanaj stuquel.

⁵ Ya xloc' tel te c'aale, ya xmal bael te c'aale, ya xcha'sujt' xan bael ta yawil, yu'un ya xloc' xan tel yan buelta.

⁶ Te iq'ue ya xujch'iyot bael ta sur, ora ya sujt' xan bael ta norte. Ya sujt' xan tel te iq'ue, soc ya xcha'sujt' xan bael.

⁷ Te muc'ja'etic, spisilic ya xbajt'ic ta mar, pero te mar, ma'yuc bi ora ya xnoj stuquel. Te muc'ja'etic, ya xcha'sujt'ic xan ta bay jajch'em tel, yu'un ya xcha'sujt'ic bael ta mar, jich ayic ta beel spisil ora.

⁸ Spisil te bitic ya xc'ax co'tantic yu'un, ma'yuc mach'a ya xju' yu'un yalel te bit'il aye. Ma'yuc mach'a ya yal te tiq'uix a te bila la yilixe, soc ma'yuc mach'a ya yal te tiq'uix a te bila la yaiy stojole.

⁹ Ma'yuc bi ay te ma'yuc ta nameye, ma'yuc bi ay ta pasel te ma'yuc ta pasel ta nameye, ma'yuc bi yach'il ay ta balumilal.

¹⁰ Ay me mach'a jich ya yal: “Ja' in to mero yach'il to”, xi' me. Pero ay nanix ta namey a, ayix bayal ta jbajc' ya'wilal a te c'alal ayinotique.

¹¹ Te bitic c'axemiquix ch'ayemiquix ta o'tanil; te bitic ya to xc'ot ta pasel ja' ni me jich ya xch'ayic ta o'tanil; ja' nix jich te bitic ya to xchicnaje, ya me xch'ayic xan bael ta o'tanil.

Te bitic yiloj te jp'ijubteswaneje

¹² Te jo'on te jp'ijubteswanejone, c'axon ta muc' ajwalil yu'un Israel ta Jerusalén.

¹³ Soc sp'ijil co'tan la cat'elin yilel soc snopel spisil te bitic ya yich' pasel ta balumilal. Ja' jich ay te bit'il Dios yac'ojbey yijc'ats te winiquetic, swenta yu'un ya yac' bic'tajuc ta stojol.

¹⁴ Ju' cu'un sna'el ta lec spisil bitic ya yich' pasel ta balumilal, mero tojol ta jyalel, ja' pajal soc te ya jc'antic ya jtsactic te iq'ue.

¹⁵ Ma xju' ta tojtesel te bitic coxole, ma xju' ya awajtay te binti ma'yuc awu'une.

^16-17 Ja' yu'un jich la cal ta co'tan: “Te jo'one, mero muc' jc'oplal ta winiquil yu'unic, c'axem jich jp'ijil a te bit'il te yantic mach'atic neel c'axic ta muc' ajwalil ta Jerusalén. Melel jc'axel la cac' jba ta stael sc'ubulil te p'ijil-o'tanil, soc ta sna'el swentail te bitic aye, soc nix te bitic ma lecuc soc te bol-o'tanile. Tic' la yac'bon jna' ya caiy a te ja' nix te ya jc'an ya jtsac te iq'ue”, xoon.

¹⁸ Ta mero melel ya cal, te mach'a snopoj p'ijil c'op, ay me bayal swocol; teme bayal bi ya jna'tique, bayal me jwocoltic yu'un.