Daniel 1 - Bible in Tzeltal de Oxchuc y Tenejapa

Xjajch'ibal aiyej

¹ Ta yoxebal ja'wil yochel ta muc' ajwalil a te Joacim, ja' te muc' ajwalil yu'un Judá, te Nabucodonosor te muc' ajwalil yu'un Babilonia, c'ot ta Jerusalén. C'alal c'ot la sjoyintayic soc soldadoetic te lume.

² Te Cajwaltic ma ba la scoltay te Joacim, jich tsacot yu'un te Nabucodonosor, soc la yac' ochuc ta sc'ab bayal te biluquetic yu'un templo yu'un te Diose. Te Nabucodonosor la yic' bael ta Babilonia te jchuqueletique. Te ch'ul biluquetic la yac' ta yawil sc'ulejal ta templo yu'un te diosetic yu'une.

³ Soc xan, la spas ta mandal te yabate, te Aspenaz sbiile, te ja' jwentainwanej yu'un te j'at'eletic ta spalacio, jich la yalbey: —Ta yolil te israeletic ya me ale te sts'umbal ajwalil soc te sts'umbal te mach'a lec sc'oplale,

⁴ t'ujbil queremetic te ma'yuc sfaltaic ta sbaq'uetalique, te ay sp'ijil sjolic soc ay sp'ijil yo'tanique, te mero bayal bitic snopojic ta bayuque, soc te chapalic yu'un at'el ta palacio yu'un ajwalil, ya me awic' tel. Ja'ic me ya yich'ic ac'beyel snopic te jc'optic soc te libroetic cu'untic jo'otic te caldeootic —la yut.

⁵ Te Nabucodonosor, la yal mandal te ja' nix ya x'ac'botic swe' yuch'ic jujun c'aal te swe'el-yuch'el te ajwalil, soc ya me yich'ic p'ijubtesel oxeb ja'wil. Te c'alal ya xc'ax te oxeb ja'wile, chapalic meix yu'un abatinel.

Daniel soc sjo'tac ta sna muc' ajwalil

⁶ Ta yolil te queremetic tey ay a te Daniel, Ananías, Misael soc Azarías, te sts'umbal Judá ta spisilic.

⁷ Te queremetic jeltaybot sbiilic yu'un te jwentainwanej yu'un j'at'eletic ta palacio yu'un ajwalil: te Daniel, Beltsasar sbiil c'ot; te Ananías, Sadrac sbiil c'ot; te Misael, Mesac sbiil c'ot; te Azarías, Abed-nego sbiil c'ot.

⁸ Pero Daniel ma la sc'an te ya sboltes sba yu'un te swe'el soc te vino yu'un te muc' ajwalile. Ja' yu'un la sc'anbey te jwentainwanej yu'un j'at'eletic te manchuc ya sujot ta swe'el-yuch'el te bila ya swe'-yuch' te muc' ajwalile.

⁹ Ta swenta bit'il at'ejemix Dios ta stojol te jwentainwanej yu'un j'at'eletic, buen lec yo'tan ta stojol Daniel.

¹⁰ Jich la yalbey: —Pero ya xtal xiwel ta co'tan ya caiy ta stojol cajwal, ja' te muc' ajwalile, melel yalojbon te bila ya xju' ya awe' —awuch'ique. Teme la yilex te ma pajaluc lequex ta ilel soc te yantic queremetique, ta scaj te ma pajaluc te awe'elique, ja'ex ta acajic teme ya sticunon ta milel te muc' ajwalile —xi'.

¹¹ Te Daniel ba sc'opon te mayordomo, ja' te ac'bot swentain te Daniel, Ananías, Misael soc Azarías yu'un te jwentainwanej yu'un te j'at'eletique. Jich c'o yalbey:

¹² —Ya calbat wocol ta atojol, te yacuc apas awil prueba ta jtojoltic te abatotic awu'une: Ja' te yacuc apas mandal te ja' nax puro boc-itaj ya yac'botic jwe'tic soc te puro ja' ya cuch'tic lajunebuc c'aale.

¹³ C'alal c'axix a te lajuneb c'aale, ya me apajotic soc te bi quileltic ta stojolic te yantic queremetique, ja' te queremetic ja' nix la swe'elinbeyic te bila ya yich' ac'beyel swe' te muc' ajwalile. Teme la awile, ja' me xapas ta jtojoltic jiche te bi yilele —xi'.

¹⁴ Lec la yaiy te mayordomo te bila la yalbeye, ja' yu'un la spas prueba ta stojolic lajuneb c'aal.

¹⁵ C'alal c'ax te lajuneb c'aale, chicnaj ta ilel la yil te ja' mero lec ayic soc mero tulan queremetic stuquelique. Yan te queremetic ja' swe'elinejic te we'elil ya swe' te muc' ajwalile, ma pajaluquic soc stuquel.

¹⁶ Ja' yu'un te mayordomo ma ba la yac'beyix te we'elil soc te vino yu'un ya swe'-yuch'ic sc'oplale, ja' la yac'bey swe'ic te boc-itaje.

¹⁷ Ta xchanebalic te queremetique, Dios ac'bot sp'ijil yo'tanic yu'un, soc ac'bot sna'ic ta lec te bit'il ay sc'oplal spisil ta jchajp libroetic soc spisil p'ijililetic. Te Daniel ya sna' yalbeyel sc'oplal spisil ta jchajp waichiletic soc te bitic ya x'ac'bot yil ya yaiye.

¹⁸ C'alal ts'acaj sc'aalelal te chapal yu'un te muc' ajwalile, ja' te ya xbajt' ta ac'beyel ta stojol te queremetique, te jwentainwanej yu'un j'at'eletic ta spalacio ajwalil ba yac'bey ta stojol.

¹⁹ Te muc' ajwalil la sc'opon te queremetique, pero ta spisil te queremetic ma'yuc jtuluc yan te pajal soc Daniel, Ananías, Misael, soc Azarías. Ja' yu'un, tey jilic ta abatinel ta stojol a te muc' ajwalile.

²⁰ Ta spisil te bitic ya sc'an p'ijil-o'tanil, soc ya sc'an lec snopjibale, ja'ic te jojc'obotic yu'un te muc' ajwalile. Te muc' ajwalile, lajuneb buelta toyem sp'ijilic la stabey a, te bit'il mach'atic ay sp'ijilic soc te ay bila ya sna'ic syoljoltayel ta banti ay ta ajwalile.

²¹ Tey jil a te Daniel asta ja' to c'alal ta sbabial ja'wil yat'el ta muc' ajwalil te Ciro.