Cantares 8 - Bible in Tzeltal de Oxchuc y Tenejapa

¹ Te ja'ucat nix a te jxilelat te ch'iemat ta xchu' te jme'e. Te jichuque, teme la jtaat ta calle, ya xju' ya jbujts'iyat, ma me ayuc mach'a ya slabanon yu'un.

² Ya xju' ya quic'at bael ta sna jme', ya quic'at ochel tey a, ya x'ochat ta maestro cu'un te jichuque. Ja' ya cac'bat awuch' te buen lequil vino soc te ya'lel te granada cu'un te jichuque.

³ Meybon jol ta xq'uexen ac'ab, petawon a te swa'el ac'abe.

Winic:

⁴ Antsetic ta Jerusalén, albonic ta jamal teme ma ba ya atijbeyic swayel te mach'a bayal jmulaneje. Ijq'uitayawotic, ac'a wayucotic, ja' to c'alal ya jc'an xjajch'otic.

Swaquebal c'ayoj Coro:

⁵ ¿Mach'a a te yac ta talel ya quil ta jochol taquin q'uinal, te pacal ta snejq'uel te mach'a bayal smulaneje? Ta ye'tal ste'el manzana la jtijbat awayel; tey ta banti jajch' xc'uxul swocol ta alajel te ame'e; tey ta banti la yayintesate.

Winic: Ants:

⁶ Jtuqueluc nax me ayon ta awo'tan, jo'ucon nax me señailon ta ac'ab. Te mulanele, ma xju' ta lajinel sbujts', ja' pajal soc te lajel te ma'yuc mach'a ya xju' ya slajinbey sc'oplal. Te yip ta co'tantic te mulanwaneje, ma xju' ta jinel jichuc bael ta muquenal. Te sc'aal yac ta tilel te mulanwaneje, ja' te c'ajc' talem ta stojol Dios.

⁷ Te mulanel ma xju' ta tup'el ta ja', manchuc me ya xtal spisil ya'lel maretic, pero ma xtup' yu'un; ni ja'uc te muc'ja'etic ya xju' yu'unic stup'ele. Te ayuc mach'a ya yal ya yac' spisil sc'ulejal swenta stael te mulanele, ja' nax labanel ya sta yaiy te jichuque.

Coro:

⁸ Te quijts'intic ma'yuc xchu'. ¿Bi ya jpastic teme ay tal ta c'anele?

⁹ Te joyob ts'ajc'uque, ya jpasbeytic smajq'uilic ta sba ts'ajc' pasbil ta plata te jichuque; te ti'nailetique, ya jmactic ta lequil tabla yu'un cedro te jichuque.

Ants:

¹⁰ Jo'on pajalon soc jun joyob ts'ajc', te jchu' pajal soc balal ts'ajq'uetic. Ja' yu'un ta sit-yelaw stuquel la jtaix te yutsilal q'uinal caiye.

¹¹ Te Salomón, ay jun sts'usubil ta Baal-hamón. La yac' jilel ta canantayel yu'un jcananetic. Te c'alal la sta yorail ya xloc' te site, ac'bot jmil ta jsejp plata ta juju-jtul.

¹² Te jmil ta jsejp plata, ja'at awu'un, Salomón, jich te jcananetique lajunwinic (200) yu'unic. Yan te jo'one ja' nix ya jcanantay te ts'usubil cu'une.

Winic:

¹³ Ac'bon caiybat te ac'ope, ja'at antsil-ajwalil yu'un te nichimaltique. Te mach'a jun co'tan jbajtic soque yacalic ta smaliyel yaiyic te ac'ope.

Ants:

¹⁴ Animajan te ja'at te bayal ya jmulanate, animajan jichuc ja'mal chij, animajan jichuc yal tsajal chij, ta sba witstiquil te bayal sbujts'e.