Cantares 1 - Bible in Tzeltal de Oxchuc y Tenejapa

¹ Te buen t'ujbil c'ayoj yu'un Salomón:

Sbabial c'ayoj Ants:

² Bujts'iyon caiy. Te bujts'iyel awu'un c'axem jich sbujts' a te bit'il vino.

³ Buen t'ujbil sbujts' te perfumeetic awu'une; malem perfume c'oem te abiile. Ja' yu'un ya smulanat te antsetique.

⁴ Ic'awon bael ta ora, ic'awon bael ta ana. Muc' ajwalil, ic'awon bael ta banti nainemat. Bin nax me co'tantic ya x'ainotic ta atojol; ya me jna'tic spisil ora te bujts'iyel awu'une, c'ax me jich sbujts' a te bit'il vino. Ja' yu'un ya smulanat te antsetique.

Coro: Ants:

⁵ Antsetic ta Jerusalén, ijc'al antson, pero t'ujbilon; ijc'on jichuc campamento yu'un Cedar, buen t'ujbilon jichuc spac'al snailpac' Salomón.

⁶ Ma me ja'uc ay sc'oplal awu'un te bit'il ijc'one, soc ma me ja'uc ay sc'oplal awu'un te bit'il xchic'ojbon jnujc'ulel te c'aale. Te jbanquiltac ilinic ta jtojol, jich la yac'onic ta scanantayel ts'usubiletic; te jts'usubil c'oem ma ba ju' cu'un scanantayel.

⁷ Ja'at te jmulanejat ta co'tane, albon caiy, ¿banti ya awac' sle swe'el te chambalametic awu'une? ¿Banti ya awic' bael ta cux-o'tan ta olil c'aal? ¿Bi yu'un ya xbeenon jichuc jmelmonel, ta sts'eel te chambalametic yu'un ajo'tac?

Coro:

⁸ Teme ma ba ana'oj te ja'ate, ja'at te c'axem at'ujbilale, t'una bael te yacan ta spisil te chambalametic. Ac'a ta we'el tey a te ch'in tentsunetic awu'une, tey me ta nopol nailwamal yu'un te jcanan-chijetique.

Winic:

⁹ Ja'at te bayal ya jmulanate, jichat ta co'tan ya caiy te bit'il te buen t'ujbil yegua yu'un scarreta faraón.

¹⁰ Buen t'ujbil te asit-awelawe, buen t'ujbil te xch'alil te achiquine. Buen t'ujbil te anuc', buen t'ujbil c'oem soc te ualil-perlaetique.

¹¹ Ya me jpastic xan ta oro capal ta plata te ach'alile.

Ants:

¹² Te c'alal nacal ta ti' mesa te muc' ajwalile, te nardo cu'un ya spuc bael sbujts'.

¹³ Te mach'a mero mulanbil cu'une, jich c'oem cu'un te bit'il ch'in bolsa mirra, te spisil ora jipil ta jtan ta yolil xchebal jchu'.

¹⁴ Te mach'a mulanbil cu'une, jich c'oem cu'un te bit'il alheña-nichim te ya xch'i ta ts'usubil ta En-gadi.

Winic:

¹⁵ Ja'at te buen mulanbilat cu'une, mero buen t'ujbilat ya quil, c'ax t'ujbilat ya quilat. Ta xchebal te asite pajal soc cheb stsumutetic ya quil.

Ants:

¹⁶ Buen t'ujbil winicat, buen ya jmulanat ya caiy, mero buen t'ujbilat ya quil. Yaxal ja'mal te jwayibtique.

Winic:

¹⁷ Cedroetic te sts'amte'al te jnatique, te c'antajetic ja' smujq'uil, ja' te smujq'uil te ya yaxintesotique.