Apocalipsis 9 - Bible in Tzeltal de Oxchuc y Tenejapa

Te yo'ebal oq'uese

¹ Te yo'ebal ch'ul abate la yoq'uesin te oq'uese. La quil te ay ec' ch'ay coel tel ta ch'ulchan te c'ot ta sba te balumilale. Te eq'ue ac'bot ta sc'ab te sllaveil sti'il te xaabe.

² Jich la sjambey sti' te xaabe. Tey mo loq'uel tel ch'ail te jich yilel te bit'il xch'ailel te muc'ul hornoe. Te xch'ailele ijc'ub yu'un te c'aale, soc ijc'maxantic nax a bajt' te q'uinale.

³ Ta bay te ch'aile, loc' tel c'ulubetic tey a te wilic bael ta spamal te balumilale. Ac'bot yipic ta ti'aw jich bit'il ya xti'awanic ta balumilal te tsequetique.

⁴ Albotic mandal te ma ba ya yuts'inic te aquiltic te ay ta balumilale soc spisil te bitic ya xch'iic ta balumilale soc spisil te te'etique. Ja' nax me ya yuts'inic te jich yipal ants-winiquetic te ma ba yich'oj selloic ta stibaic yu'un te Diose.

⁵ Ja'uc me to, ma ba ac'botic te ya smilic ta jc'axel te ants-winiquetique. Ja' nax ac'bot ta swentaic te ya yac'bey c'axuc swocolic jo'eb u. Te xc'uxul te sti'awique, ja' pajal soc te xc'uxul sti'aw te tseque.

⁶ Te bi ora jich ya xc'ot ta pasele, ya me sc'an slajelic te ants-winiquetique, ja'uc me to, ma ba ya staic. Manchuc teme yo'tanuc ya sc'an xlajique, ja'uc me to, ya x'an bael ta stojolic te lajele.

⁷ Te c'ulubetique jich yilelic te bit'il caballoetic te chapalic yu'un guerrae. Ta sjolic ay bila jich yilel te bit'il corona te pasbil ta oroe. Te sit yelawique pajal yilel soc sit yelaw ants-winic.

⁸ Te stsotsil sjole pajal yilel soc stsotsil sjol ants. Te sbaquel yeique pajal yilel soc sbaquel ye te león-chojetique.

⁹ Ay smajq'uil yo'tanic te pasbil ta taq'uin yilel. Xpumumet nax ya xc'opoj te xiq'uique, jich te bit'il xpumumet nax sc'op ya caiytic bayal carretaetic nitbilic ta caballoetic te animal ya x'ochic ta guerrae.

¹⁰ Ay sneic jich bit'il sne te tseque te ya xti'awanique. Ac'bot ta swenta sneic yuts'inel jo'eb u te ants-winiquetique.

¹¹ Soc ay jtul ajwalil yu'unic te ja' swentainej te xaabe. Abadón sbiil ta hebreo-c'op soc Apolión sbiil ta griego-c'op.

¹² C'axix te sbacumul woclajele. Ay to sc'an xan cha'cum woclajel.

¹³ Te swaquebal ch'ul abate la yoq'uesin te oq'uese. La caiy stojol te ay mach'a c'opoj ta yolilal te chanch'ix xulubil te ay ta scajtijib majt'anil te pasbil ta oro te ay ta stojol te Diose.

¹⁴ La caiy stojol te jich albot te swaquebal ch'ul abat te yich'oj oq'uese: “Coltaya bael te chantul ch'ul abatetic chuculic ta bay ti' muc'ul ja' Eufrates”, la yut.

¹⁵ Jich colic bael ta chuquel te chantul ch'ul abatetique, swenta yu'un ya xba smilic jteb ma oliluc te ants-winiquetique. Melel ja' swentail te chapalique, ja' to teme ya sta te bi ora soc bi c'aalil soc bi uil soc bi ja'wil te ya xc'ot ta pasele.

¹⁶ Soc la caiy stojol te jaytul soldado ay yu'unic te cajajtic ta caballoe. Ay lajunwinic millón (200,000,000) ta jtul ta spisilic te soldadoetique.

¹⁷ Jich yilel te caballoetic soc te soldadoetic te cajajtic a te ac'boton quile. Te soldadoetique ay smajq'uilic te tsaj yilel jich bit'il c'ajc', soc yax jich bit'il zafiro, soc c'an jich bit'il azufre. Yan te caballoetique jich sjolic te bit'il león-chojetique. Ta yeic yac ta loq'uel c'ajc' soc ch'ail soc azufre.

¹⁸ Jteb ma oliluc te ants-winiquetic te lajic yu'un te oxchajp miljibale, ja' bi ja' te c'ajq'ue soc ch'ail soc azufre te loc' ta yeic te caballoetique.

¹⁹ Melel te caballoetique ya xlajinwanic ta yeic soc ta sneic. Yu'un te sneique pajal yilel soc te jti'awal chane. Ay sjolic te ya yaiyic uts'inwanej soque.

²⁰ Ja'uc me to, te jayeb xan mach'atic ma ba lajic yu'un te miljibaletique, ma la sujt'es yo'tanic yu'un te bila spasoj ta sc'abique. Ma la yijq'uitayic ta ch'uunel te pucujetic soc loc'ombaetic te pasbilic ta oro soc ta plata soc ta bronce soc ta ton soc ta te', te ma xyilic q'uinal soc te ma xyaiyic stojol c'op soc te ma xju' ya xbeenique.

²¹ Soc ma la yijq'uitayic te milawe soc te ts'ilwaneje soc te mulweje soc te eleq'ue.