Apocalipsis 5 - Bible in Tzeltal de Oxchuc y Tenejapa

Te balbil june soc te Alalchije

¹ Soc la quil te ay balbil jun te stsacoj ta swa'el sc'ab te mach'a nacal ta muc'ul nactijibale. Ay bila ts'ibubil ta yutil soc ta spat te balbil june, soc yich'oj juqueb sello.

² Soc la quil jtul ch'ul abat te bayal yipe. Tulan yac ta yalel ta aw ta sjojc'oyel yaiy: “¿Mach'a me ya xju' yu'un sjamel te balbil june? ¿Mach'a ya xju' yu'un sjamel te selloetic macbil ae?”, xi' ta aw.

³ Ja'uc me to, ma ba wejt' jtuluc ta ch'ulchan soc ta balumilal soc ta ye'tal balumilal te ya xju' yu'un sjamel te balbil june. Ni jtuluc ma'yuc mach'a ju' yu'un yilel.

⁴ Bayal la coq'uetay jba yu'un, melel ma ba wejt' jtuluc te mach'a ya xju' yu'un sjamel soc sc'oponel te june.

⁵ La yalbon ts'iin te jtul mamale: —Ma x'oc'atix. Melel ya xju' yu'un sjamel selloetic te León-choj yu'un te sts'umbal Judá te ja' nix sts'umbal te muc' ajwalil Davide. Melel ju'ix yu'un tsalaw. Jich ya xju' yu'un sjamel soc spolel te juqueb selloe —xi'.

⁶ Jich la quil ta bay te muc'ul nactijibale soc ta banti ay te chancojt' bitic cuxajtic te ay ta yolilal te mamaletique. Tey cotol a te jcojt' Alalchij. Yich'oj milel yilel, te ay juqueb xulub soc juqueb sit, ja'ic te juqueb Espirituetic yu'un Dios te la yich'iquix ticunel bael ta spamal te balumilale.

⁷ Te Alalchije ba stsac te balbil jun te ay ta swa'el sc'ab te mach'a nacal ta muc'ul nactijibale.

⁸ Te c'alal la stsac te balbil june, te chancojt' bitic cuxajtique soc uuc te chaneb xcha'winic (24) ta jtul mamaletique la squejan sbaic ta stojol te Alalchije. Spisilic yich'oj yarpaic soc copaetic te pasbilic ta oro te nojel ta pom, te ja' sc'opic ta sc'oponel Dios te mach'atic ch'ul lum yu'un te Diose.

⁹ La sc'ajintayic jcum yach'il c'ayoj: “Ay ta awenta atuquel te ya xju' awu'un stsaquel te balbil june soc sjamel te selloetique. Yu'un la awich' milel, soc ta swenta ach'ich'el la amanbeyix yu'unin Dios tsobol ta jchajp sts'umbal ants-winiquetic te yanyantic sc'opique soc te yanyantic slumalique soc te yanyantic nacionetic ta balumilale.

¹⁰ La awac'beyix yat'elic ta ajwalil soc ta sacerdoteil ta stojol te Dios cu'untique, soc ya me xmandalajic ta balumilal”, xiic ta c'ayoj.

¹¹ La quil soc la caiybey stojol sc'op tsobol ta jtul te ch'ul abatetic te sjoytayejic te muc'ul nactijibale soc uuc te bitic cuxajtique soc uuc te mamaletique. Te yajtalul te ch'ul abatetique bayal ta millón ta millón te ma ju' ta ajtayele.

¹² Tulan yacalic ta aw te jich la yalique: “Te Alalchij te la yich' milele, ay ta swenta yich'el yu'el, soc sc'ulejal, soc sp'ijil, soc yip. Ay ta ich'el ta muc' soc te yutsilale”, xiic ta aw.

¹³ Spisil te bitic chicnantesbil yu'une te ay ta ch'ulchan soc ta balumilal soc ta ye'tal balumilal soc ta mar soc spisil te bitic ay tey a, jich yacalic ta yalel: “Te mach'a nacal ta muc'ul nactijibal soc te Alalchije, ac'a yich' albeyel wocol. Ay ta ich'el ta muc', ay yutsilal soc ay yu'el ta sbajt'el q'uinal”, xiic ta spisilic.

¹⁴ Te chancojt' bitic cuxajtique jich la yalic uuc: “Jichuc”, xiic. Te chaneb xcha'winic (24) mamaletique la squejan sbaic ta stojol te mach'a stalel cuxul sbajt'el q'uinale.