Apocalipsis 4 - Bible in Tzeltal de Oxchuc y Tenejapa

Te yich'el ta muc' Dios ta ch'ulchan

¹ Patil ay yan bila la quil. Ja' la quil te ay ti'nail jamal ta bay te ch'ulchane. Te sbabial c'op te la caiy stojole, jich sc'op te bit'il oq'uese. Jich la yalbon: —Moan tel li'to, yu'un ya cac'bat awil te bila ya xc'ot ta pasel ta puersa ta patilal baele —la yuton.

² Ta ora nax la swentainon ta yu'el te Espiritue. Jich la quil te ay jun muc'ul nactijibal te ay ta yolil te ch'ulchane, soc la quil te ay mach'a nacal tey a.

³ Te mach'a nacal tey a ta bay te muc'ul nactijibale, sacleman nax soc tsajxojan nax jich bit'il lequil tonetic te jaspe soc cornalina sbiilique. Soc joyol ta arco iris te muc'ul nactijibal te xlememet xyaxal te xojobil, jich bit'il te esmeralda-tone.

⁴ Ta sjoylejal te muc'ul nactijibale, la quil chaneb xcha'winic (24) nactijibaletic te tey nacalic a te chaneb xcha'winic (24) ta jtul mamaletic. Sac te sc'u'-spac' slapojique soc ay scorona ta sjolic te pasbil ta oro.

⁵ Ta bay te muc'ul nactijibale, loc' tel tsantsewal tey a, soc ay bila bayal yac ta bul sc'op tey a, soc ay chawuc. Soc ay juqueb c'ajq'uetic tuchajtic ta tilel ta stojol te muc'ul nactijibale, ja'ic te juqueb Espirituetic yu'un te Diose.

⁶ Soc ay bila pamal tey a ta bay stojol te muc'ul nactijibale, pajal yilel soc mar te xlemet nax jich bit'il te espejoe. Ta yolilal ta bay xchantselel xchiquin te muc'ul nactijibale, ay chancojt' te bitic cuxajtic la quil tey a te ay sitic ta scojt'ol ta yelawic soc ta spatic.

⁷ Te sbabial te bila cuxule jich yilel te bit'il león-choje. Te xcha'cojt'ole jich yilel te bit'il alal toro wacax. Te yoxebal jich sit yelaw te bit'il winique. Te xchancojt'ole jich yilel te bit'il águila te yac ta wilele.

⁸ Ta xchanebal te bitic cuxajtique ay waqueb xiq'uic te juju-jcojt'e. Nojel ta sitic te yutil xiq'uique soc te spat xiq'uique. C'aal ajc'ubal ma xquejch'ajic ta yalel: “Ch'ul Dios, ch'ul Dios, ch'ul Dios. Ja' te Cajwaltic Dios te Spisil ya xju' yu'une, ja' te mach'a ay ta namey tele, soc te mach'a stalel aye, soc te mach'a jtalelixe”, xiic.

⁹ Te bitic cuxajtique, spisil ora ya yalbeyic yutsilal, ya yich'ic ta muc', soc ya yalbeyic wocol te mach'a nacal ta muc'ul nactijibale, ja' te mach'a stalel cuxul sbajt'el q'uinale.

¹⁰ Te chaneb xcha'winic (24) mamaletique ya squejan sbaic ta stojol te mach'a nacal ta smuc'ul nactijib te stalel cuxul sbajt'el q'uinale. Ya scojt'es scoronaic ta stojol te muc'ul nactijibale soc jich ya yalic:

¹¹ “Cajwal, ja' awu'un te ich'el ta muq'ue, ya sc'an alel awutsilal soc awu'el. Yu'un ja'at la achicnantes spisil te bitic aye, soc ja' sc'anjel awo'tan te bitic ayic ta q'uinale soc te bitic la yich' chicnantesel awu'une”, xiic.