Apocalipsis 21 - Bible in Tzeltal de Oxchuc y Tenejapa

Te yach'il ch'ulchan soc te yach'il balumilale

¹ Soc la quil yach'il ch'ulchan soc yach'il balumilal. Yu'un te sbabial ch'ulchane soc te sbabial balumilale ch'ayiquix bael soc ma'yuquix te mare.

² Jo'on Juanon la quil te ch'ul muc'ul lum te ja' te yach'il Jerusalén. La quil yac ta coel tel ta ch'ulchan te loc' tel ta stojol te Diose. Buen chapal jich te bit'il ya xch'al sba soc sc'u'-spac' te ach'ix ya xnujbine.

³ Soc la caiy stojol te ay mach'a tulan c'opoj tel ta ch'ulchan te jich la yale: “Aiya awaiy stojol, Dios nainemix ta yolil te ants-winiquetique. Ayix sna ta yolilic. Ja' me lum yu'un Dios ya xc'otic, soc ja' nix Dios ya xc'ot yu'unic te Diose.

⁴ Soc ya me scusbot ya'lel sitic yu'un te Diose. Soc ma'yuquix te lajele soc te oq'uele soc te mel-o'tane soc te bila ay xc'uxule. Yu'un te bila ay ta neelale, ch'ayix bael ta spisil”, xi' la caiy.

⁵ Soc jich la yal te mach'a nacal ta muc'ul nactijibale: “Ila me awilic, ya jpasix ta yach'il spisil te bitic aye”, xi' la caiy. Soc jich la yalbon: —Ts'ibuya ta jun te bila la cale. Ja' in to, ja' te smelelil c'op te ya xju' ya xch'uun awo'tane —la yuton.

⁶ Soc la yalbon xan: —Ju'ix cu'un. Jo'on Alfaon, jo'on Omegaon. Ayon ta xjajch'ibal soc ayon ta slajibal. Te mach'a taquin yo'tane, smajt'an me ya cac'bey yuch' te sloc'ja' te ya yac' cuxinele.

⁷ Te mach'a ya xju' yu'un tsalawe, ya me cac'bey yu'unin spisil in to. Ja' Dios ya xc'oon yu'un, soc ja' jnich'an ya xc'ot stuquel.

⁸ Yan te mach'atic ya xiwique, soc te ma sc'an xch'uunone, soc te mach'atic ilaybil sba te bila ya spasique, jmilawaletic, jmulwejetic, j'ac'chameletic, soc te mach'atic jch'uunej-loc'ombaetic, jpas-lotetic, ta spisilic in to, ja' me ya xbajt'ic ta bay muc' pamal c'ajc' te yac ta tilel soc azufre te ja' xchebal buelta lajele —la yuton.

Te yach'il Jerusalén

⁹ Tal jtul ta sjuctulul te ch'ul abatetic te yich'oj te juqueb copaetic te nojel tey a te juccum slajibal castigoetique. Jich la yalbon: —La' me, ya cac'bat awil te ach'ix te ya xnujbin soc te Alalchije —la yuton.

¹⁰ Te Espíritu la yic'on bael ta bay te muc'ul toyol witse. Tey la yac'bon quil a te muc'ul ch'ul lum Jerusalén te yac ta coel tel ta ch'ulchan te loc' tel ta stojol te Diose.

¹¹ Te muc'ul lum, xlemet nax yutsil xojobil tey a te Diose. Te xojobile pajal yilel soc te bit'il xlemet nax t'ujbil saquil ton te jaspe sbiile, te ya xc'ax jsitic ta yilel q'uinal a jich bit'il te cristale.

¹² Joybil ta toyol ts'ajc' te lume. Ay lajchayjujt' sti' te ts'ajq'ue soc teq'uel jtul ch'ul abat ta bay jujun sti'. Soc ts'ibubil sbiilic tey a ta bay jujun sti' te lajchaychajp te israeletique.

¹³ Ay oxjujt' sti' ta stojol sloq'uib c'aal, soc oxjujt' ta stojol norte, soc oxjujt' ta stojol sur, soc oxjujt' ta stojol smalib c'aal.

¹⁴ Ay lajchayeb ton yiptajib te sts'ajc'ul te lume ta bay ts'ibubil sbiilic te lajchaytul jpuc-c'opetic yu'un te Alalchije.

¹⁵ Te ch'ul abat te yacon ta c'op soque, stsacoj ta sc'ab te bila pajal soc jalal yilel te pasbil ta oro te ya sp'is a te muc'ul lume soc te juju-jujt' sti' soc te sts'ajc'ule.

¹⁶ Te muc'ul lume pajal sjamalul ta juju-jejch' te xchiquine. Te snajt'ile pajal soc te sjamalule. Te ch'ul abate la sp'is ta jalal te muc'ul lume. Loc' cha'mil soc lajunwinic (2200) kilómetro ta p'isel yu'un. Pajal soc snajt'il te stoylejale soc uuc te sjamalule te loc' ta p'isel yu'une.

¹⁷ Soc la sp'is te sts'ajc'ule. Loc' jo'eb xchanwinic (65) metro. Te ch'ul abate la sp'is te muc'ul lume te bila swenta p'isjibal yu'un te ants-winiquetique.

¹⁸ Te sts'ajc'ul te lume pasbil ta jaspe-ton. Yan te lume, pasbil ta oro te xujt' ma'yuc scape, te pajal soc te espejo te xujt' ma'yuc bolobene.

¹⁹ Te tonetic te yiptajib ts'ajq'ue, ch'albil ta spisil ta jchajp t'ujbil lequil tonetic. Te sbabiale jaspe-ton. Te xchebale zafiro. Te yoxebale ágata. Te xchanebale esmeralda.

²⁰ Te yo'ebale ónice. Te swaquebale cornalina. Te sjuquebale crisólito. Te swaxaquebale berilo. Te sbalunebale topacio. Te slajunebale crisopraso. Te sbuluchebale jacinto. Te slajchayebale amatista.

²¹ Ta slajchayjujt'ul te sti' sts'ajq'ue, lajchayeb perlaetic pasbil a. Te jujun sti' jun perla pasbil a. Te smuc'ul calleil te lume pasbil ta oro te xujt' ma'yuc scape te pajal soc espejo te ya xc'ax jsitic ta yilel q'uinal a.

²² Ma'yuc templo la quil tey a ta bay te muc'ul lume. Melel te Cajwaltic Dios te Spisil ya xju' yu'une soc te Alalchije, ja' templo yu'un te lume.

²³ Ma xtuun xojobil c'aal soc xojobil u tey a. Melel ja' sacuben q'uinal yu'un te yutsil xojobil te Diose soc te xojobil te Alalchije.

²⁴ Spisil ta jchajp nacionetic ya me x'ainic ta saquil q'uinal yu'un uuc. Soc spisil te muc' ajwaliletic te ayic ta balumilale ya me yich'ic tel yutsil sc'ulejalic te ya yich'ic bael tey a.

²⁵ Jujun c'aal jamal sti' spisil ora te muc'ul lume, soc ma'yuc ajc'ubal tey a.

²⁶ Soc spisil ta jchajp te nacionetic ya me yich'ic tel yutsilalic te ya yaq'uic ta ich'el ta muc' a te muc'ul lume.

²⁷ Ja'uc me to, ma xju' ya x'och xujt'uc tey a te bila ma lecuque, soc ma xju' ya x'och te mach'a ilaybil sba te bila ya spase, soc te mach'a ya spas lote. Ja' nax ya x'och tey a te mach'atic ts'ibubil sbiilic ta bay te lista yu'un cuxinel te yich'oj te Alalchije.