Apocalipsis 20 - Bible in Tzeltal de Oxchuc y Tenejapa

Te jmil (1,000) ja'wile

¹ Soc la quil jtul ch'ul abat te yac ta coel tel ta ch'ulchan. Yich'oj ta sc'ab te sllaveil te xaabe, soc yich'oj ta sc'ab jlijc' muc'ul cadena.

² Te ch'ul abate la stsac te muc'ul chan te xiweltic sba ta ilele, te ja' te namey q'uinal chan te pucuj soc Satanás xi' te sbiile. Te ch'ul abate la xchuc ta cadena jmil (1,000) ja'wil.

³ Soc la xch'oj ochel ta xaab, la smac jilel ta llave, soc la smac jilel ta sello, swenta yu'un ma ba ya slo'layix a te chajbalchajp nacionetique, ja' to teme loc' te jmil (1,000) ja'wile. Te c'alal loq'uix a te jmil (1,000) ja'wile, ya me yich' coltayel loq'uel jun chebuc c'aal.

⁴ Soc la quil te ay muc'ul nactijibaletique. Te mach'atic nacalic tey ae, yich'oj yat'elic ta chajbanwanej. Soc la quilbey xch'ulelic te mach'atic la yich'ic coq'uel sjolic ta scaj te la yalic ta jamal ta testigo-c'op te Jesuse, soc ma'yuc banti la slajin sbaic ta stojol te muc'ul chambalam te xi'bantic sbae soc ta stojol te sloc'ombae, soc ma la xch'uunic yich'el smarca ta stibaic o ta sc'abic. La quil cha'cuxic spisilic soc la quil te sjoinejic ta ajwalil jmil (1,000) ja'wil te Cristoe.

⁵ Yan te yantic animaetique, ma ba cha'cuxic ja' to teme ts'acajix a te jmil (1,000) ja'wile. Ja' sbabial cha'cuxel abi.

⁶ Bin nax me yutsil te mach'atic cha'cuxic ta sbabial buelta cha'cuxele, soc ja'ic te ch'ul lum yu'un Dios stuquelique. Te xchebal buelta lajele ma'yuquix yip ta stojolic. Sacerdoteetic yu'un Dios soc te Cristoe, soc ya me sjoinic ta ajwalil jmil (1,000) ja'wil te Cristoe.

La yich' tsalel te pucuje

⁷ Te c'alal ts'acajix a te jmil (1,000) ja'wile, ya me yich' coltayel loq'uel ta bay chucul te Satanase.

⁸ Jich ya xjajch' slo'lay spisil ta chajbalchajp te nacionetic ta xchanjejch'eluc balumilal te ja' Gog soc Magog sbiilic te ants-winiquetique. Ya me stsob sbaic ta guerra te jich yajtalulic te bit'il sji'al te mare.

⁹ Jich talic ta bay sjoylejal te balumilale. Tal sjoytayic ta bay ayic te mach'atic ch'ul lum yu'un te Diose soc te muc'ul lum yu'un te c'ux ta yo'tane. Ja'uc me to, Dios la yac' coel tel c'ajc' ta ch'ulchan. Jich jc'axel lajic ta c'ajq'uel ta spisilic.

¹⁰ Te pucuj te lo'layotic yu'une, la yich' ch'ojel ochel ta muc' pamal c'ajc' te yac ta tilel soc azufre, ta banti yich'ojix ch'ojel te muc'ul chambalam te xi'bantic sbae soc te lotil j'alwanej yu'une. Tey me ya xc'ax swocolic a ta c'aal ajc'ubal ta sbajt'el q'uinal.

Ich'el ta c'op ta bay muc'ul saquil nactijibale

¹¹ La quil ay mero muc'ul saquil nactijibal te ay mach'a nacal tey a. Loc' bael ta anel ta stojol te ch'ulchan balumilale, ma ba wejt' xan yawilic ta banti ya x'ainique.

¹² Soc la quil spisilic te animaetic te muc' biq'uit tec'ajtic tey a ta stojol te Diose. Te libroetique la yich' jamel, soc ay yan libro te la yich' jamel te ja' te lista yu'un cuxinele. Dios la yalbey yat'elic juju-jtul te animaetique chican te bi yilel te bila spasojique. Ja' chican te bila ts'ibubil ta bay te libroetique.

¹³ Te mare la yac' loc'uc tel te animaetic te tey lajemic a. Te lajele soc te stsobjibal animaetique la yaq'uic loq'uel tel uuc te mach'atic ay yu'unic tey a. Spisilic la yich' alel te yat'elique, chican te bi yilel te bila spasojic ta juju-jtule.

¹⁴ Te lajel soc te stsobjibal animaetique la yich'ic ch'ojel ochel ta bay te muc' pamal c'ajq'ue. Te muc' pamal c'ajq'ue, ja' te xchebal buelta lajele.

¹⁵ Soc la yich' ch'ojel ochel ta bay muc' pamal c'ajc' spisilic te mach'atic ma ba ts'ibubil sbiilic ta bay lista yu'un te cuxinele.