Apocalipsis 17 - Bible in Tzeltal de Oxchuc y Tenejapa

Te castigo ya yich' te mero jmulawil antse

¹ Tal sc'oponon jtul ta sjuctululic te ch'ul abatetic te yich'ojic te juqueb copaetique. Jich la yalbon: —La' li'to, ya cac'bat awil te castigo ya yich' te mero jmulawil ants te nacal ta sba te maretique.

² Te muc' ajwaliletic ta balumilale, yaiyojiquix mulwej soc. Soc spisil te mach'atic cuxajtic ta balumilale, yacubenic yu'un te svinoe, ja' bi, sboltesej sbaic soc ta swenta te smulweje —la yuton.

³ Te Espíritu la swentainon ta yu'el. Jich ic'bilon bael la caiy c'alal ta jochol taquin q'uinal yu'un te ch'ul abate. Tey la quil jtul ants a te cajal ta spat tsajal chambalam te xi'bantic sbae, scojt'ol ts'ibubil biililetic swenta stoybac'optayel te Diose. Ay jucp'ij sjol soc lajunch'ix xulub.

⁴ Te sc'u' slapoj te antse, tsaj soc tsaj'aman. Xch'aloj sba ta oro soc ta t'ujbil lequil tonetic soc ta perlaetic. Yich'oj ta sc'ab copa te pasbil ta oro te nojel tey a te bila ya yilay te Diose, capal soc sbolil te smulweje.

⁵ Ay sbiil te muquen ay sc'oplal te ts'ibubil ta stibae: “Muc'ul lum Babilonia, sme' spisil jmulawil antsetic soc spisil te bila ya yilay ta balumilal te Diose”, xi' te sbiile.

⁶ La quil te antse yacuben yu'un xch'ich'el te mach'atic ch'ul lum yu'un te Diose soc te xch'ich'el te mach'atic la yich'ic milel yu'un te la yalic ta jamal te xch'uunejic te Jesuse. Te c'alal la quile, cham nax la caiy yu'un.

⁷ Jich la yalbon te ch'ul abate: —¿Bi yu'un te cham nax la awaiy yu'une? Ya calbat awaiy te ants te muquen ay sc'oplale soc te muc'ul chambalam te xi'bantic sba te cajal tel a te ay jucp'ij sjol soc lajunch'ix xulub.

⁸ Te muc'ul chambalam te xi'bantic sba te la awile, ja' seña te mach'a ay ta neelale te ma ba chican ta ora to soc te ya to xmo loq'uel tel ta bay te xaabe. Patil ya me xbajt' ta lajel ta jc'axel. Te mach'atic cuxajtic ta balumilal te ma nacaluc sbiilic ta lista swenta cuxinel c'alal to ta xjajch'ibal te balumilale, cham nax me ya yaiyic te c'alal ya yilic te muc'ul chambalam te xi'bantic sba te ay ta neelal te ma ba chican ta ora to soc te ya to xchicnaj xane.

⁹ “Ya sc'an te ay sp'ijil awo'tan teme ya ac'an ya ana' stojol in to. Te jucp'ij sjole, ja' seña te juqueb wits ta bay nacal te antse,

¹⁰ soc ja' seña xan te juctul muc' ajwaliletique. Ay jo'tul te muc' ajwaliletic te lajix sc'oplalique. Te jtule ay yat'el ta ora to. Te yane ma to xchicnaj tel, ja'uc me to, teme chicnaje, ma xjalaj bayal c'aal.

¹¹ Te muc'ul chambalam te xi'bantic sba te ay ta neelal te ma ba chican ta ora to, ja' swaxaquebal muc' ajwalil stuquel, ja'uc me to, ja' nix jtul ta sjuctululic te muc' ajwaliletique. Patil ya me xbajt' ta lajel ta jc'axel.

¹² “Te lajunch'ix xulub te la awile ja' seña lajuntul muc' ajwaliletic te ma to ayuc yat'elique. Ja'uc me to, ya me yich' yat'elic ta muc' ajwalil junuc ora soc te muc'ul chambalam te xi'bantic sbae.

¹³ Te lajuntul muc' ajwaliletique jun nax te bila snopojique. Ja' ya yajwalinic stuquel te muc'ul chambalam te xi'bantic sbae soc ya me xch'uunbeyic te smandale.

¹⁴ Ya me spasic guerra soc te Alalchije, ja'uc me to, ya stsalotic yu'un. Melel ja' Ajwalil yu'un te ajwaliletique, soc ja' Muc' Ajwalil yu'un te muc' ajwaliletique. Te mach'atic sjoinej sbaic soque, tsabilic soc ic'bilic yu'un te Diose, soc jun yo'tanic ta stojol —la yuton.

¹⁵ Te ch'ul abate la yalbon xan: —Te maretic la awil ta bay nacal te jmulawil antse, ja' seña bayal ta jchajp lum soc bayal ta jtul ants-winiquetic te yanyantic sc'opic soc te chajbalchajp nación ayique.

¹⁶ Te lajunch'ix xulub la awil te ay ta sjol te muc'ul chambalam te xi'bantic sbae, ya me slab-o'tantayic te jmulawil antse. Me'ba me ya yijq'uitayic soc t'anal ya xjil yu'unic. Ya sti'beyic sbaq'uetal soc ya xchiq'uic ta c'ajc'.

¹⁷ Dios yac'ojbey ta yo'tanic te ya spasbeyic te bila ya sc'an yo'tan stuquel te bit'il jun nax te bila snopojique soc te ja' yajwalinejic stuquel te muc'ul chambalam te xi'bantic sbae, ja' to c'alal ya xc'ot ta pasel te sc'op Diose.

¹⁸ Te ants la awile, ja' seña te muc'ul lum te ya xmandalaj ta stojol spisil te ajwaliletic ta balumilale —la yuton.