Amós 9 - Bible in Tzeltal de Oxchuc y Tenejapa

Ma'yuc mach'a ya xcol ta castigo

¹ La quil te Cajwaltic te ay ta sts'eel te scajtijib majt'anile, soc jich la yalbon: —Yuq'uilaya ta majel te yoyal na ja' to me c'alal ya xnijc' te yiptajibe; ac'a wuyuc coel tel ta sba te ants-winiquetique. Te mach'atic cuxul ya xjilic, ya me jmil ta puñal; manchuc me ya x'anic bael ta sc'opic, ni jtuluc ya xcol.

² Manchuc teme ya snac' sba ta yet'al lumq'uinal, tey me ya jtsac loq'uel tel a; manchuc teme ya xmo bael c'alal stoylejal ch'ulchan, tey ya jcojt'es tel a.

³ Teme ya snac' sba ta bay stoylejal switsul Carmelo, tey ya xba jle a; teme ya snac' sba ta jtojol ta bay sc'ubulil mar, tey ya jticun bael a te smuc'ul xchanul mar, yu'un ya xba sti'.

⁴ Teme ya xtsacot loq'uel ta slumal yu'un te scontrotaque, ya jticun bael puñal, ya xba smil. Ya cac'bey spisil ora te bila ma lecuc, ma ja'uc te bila leque —xi' te Cajwaltique.

⁵ Te Cajwaltic te Spisil ya xju' yu'une, ya stij te lumq'uinal, jich ya x'ulub. Ya me x'oc' yu'un spisil te yajwale. Te lumq'uinal ya me syuq'uilay sba jich bit'il ya xmo soc ya xco ya'lel te Nilo.

⁶ Te Cajwaltic spasoj sna ta ch'ulchan, soc spasoj te syaxal sjamalul moel ch'ulchan te chican ta sba te lumq'uinale. Ja' ya yich' tel te ja'etic yu'un mar, soc ya smal ta sba te lumq'uinale. Ajwalil me te sbiile.

⁷ Tulan ya yal te Cajwaltique: —Israeletic, ma me xacuyic te yanuquex cu'un a te etiopeetique. Jich bit'il la quiq'uex tel ta Egipto, jich nix la quic' tel ta Creta te filisteoetic, soc la quic' tel ta Kir te arameoetique —xi'.

⁸ Te Cajwaltic ya yil ta sit spisil te jmulawiletique, jich ya yal yu'un: —Ya me jch'ay ta lumq'uinal te sts'umbal Jacob; ja'uc me to, ma ba ya jlajin ta jyalel. Jo'on Ajwalilon, tulan ya cal.

⁹ Ya me cal mandal te ya yich' chijch'anel sts'umbal Israel, jich bit'il ya yich' chijch'anel trigo ta bay sloq'uesjibal, xujt' ma ba ya xch'ay jp'ijuc ta lum.

¹⁰ Spisil jmulawiletic ta lum cu'un ya me xlajic ta puñal; ya me xlajic spisil te mach'atic ya yal: “Ma'yuc bila ya spasbotic; ma ba ya staotic te bila amene”, teme xiique —xi'.

Ya me sujt' tel ta patil te Israel

¹¹ Ya yal te Cajwaltic: —Ya me sta sc'aalelal te ya jpas ta yan buelta te sna David te jineme. Ya jmacbey te bay jinemic, ya jach te jinem ts'ajq'uetic. Jich nix ya jcha'pas xan te bit'il namey tele,

¹² swenta yu'un te bila jilem yu'un Edom soc spisil te nacionetic te ay ta jwenta ta neelale, ja' ni me ya x'och yu'unin te Israele —xi'. Te Cajwaltic la yal te sc'ope, soc ya xc'ot ta pasel yu'un.

¹³ —Ya me sta sc'aalelal te yac to nax ta loq'uel trigo a te ya xc'ot yorail ta joq'uel te lume, soc ma to xlaj ta pits'el ta teq'uel ts'usub a, te ya xc'ot yorail ta ts'unel te trigoe. Ta witstiquil soc ch'in witsetic ya me x'oquin coel tel jichuc ja' te vinoe.

¹⁴ Jich yu'un ya me quic' sujt'el tel te lum Israel cu'un te ic'otic bael ta mosoil. Ya xcha'pasic xan te lumetic jinemique, tey me ya xnainic a; ya me sts'unic ts'usubiletic, soc ya me yuch'beyic te ya'lele; ya me sts'unic awalts'unubil, soc ya me slo'beyic sit.

¹⁵ Jo'on me ya jts'un ta mero slum-sq'uinalic te israeletique, soc ma ba ya yich' xan bulel loq'uel ta bay lumq'uinal te la cac'beye —xi'. Jich tulan ya yal te Cajwaltic Diose.