Amós 8 - Bible in Tzeltal de Oxchuc y Tenejapa

Nojel ta moch te sit awalts'unubile

¹ Ja' la yac'bon quil te Cajwaltique: Ay jun moch te nojel ta sit awalts'unubil te lequix ta lo'ele,

² la sjojc'obon: —¿Bi ya awil, Amós? —la yuton. —Ay moch te nojel ta sit awalts'unubil te lequix ta lo'ele —la cut. La yalbon te Cajwaltique: —Jich c'oem te Israel; ma ba ya jpasbeyix perdón ta jc'axel.

³ Te bi c'aalil ya cale, te c'ayojetic ta muc'ul palacio ya me xc'atp'ujic ta oq'uel. Bayal mach'a ya xlajic, soc ya me yich'ic ch'ojel loq'uel te sbaq'uetalic, ma'yuc mach'a ya xc'opoj. Ja' tulan ya cal jo'on te Ajwalilone —xi'.

Ya xnoptsajix castigo ta stojol Israel

⁴ Aiya awaiyic stojol, ja'ex te ya atenic ta uts'inel te alumalic te peq'uel ayique, soc te ya awuts'inic te me'baetic ta alumal;

⁵ jich ya awalic: —¿Bi c'aalil ya xc'ax te q'uin yu'un te yach'il u, swenta yu'un ya xju' jchontic a te trigo? ¿Bi c'aalil ya xc'ax te sc'aalelal cux-o'tan, swenta yu'un toyol xan stojol ya jchontic a te jtrigotique? Ya me jtuuntestic te ma ts'acaluc sp'isol soc te ma ts'acaluc kilo,

⁶ swenta yu'un ya jmantic a te me'baetic; te mach'atic ma'yuc bi ay yu'unique ya jeltic ta jun nax par zapatos. Ja' me ya jchonbeytic te sts'ubil trigoe —xaex ta yalel.

⁷ La yal ta jamal te Cajwaltic, la sta ta alel a te bila stoyoj sba yu'un te sts'umbal Jacob: —Mero ma xch'ay ta co'tan te bila spasojique —xi'.

⁸ ¿Ma bal yacuc xtal nijq'uel ta lumq'uinal yu'un? ¿Ma bal ya x'oq'uic spisil te yajwale? Te lumq'uinal ya me syuq'uilay sba, jich bit'il ya xmo soc ya xco ya'lel te muc'ja' Nilo.

⁹ Jamal ya yal te Cajwaltique: —Te c'alal ya sta yorail, ya me x'ijc'ub q'uinal ta olil c'aal, ta c'aaleltic ya cac' x'ijc'ub q'uinal ta balumilal.

¹⁰ Te q'uinetic ya jc'atp'un ta oq'uel yu'un te animaetique; soc te c'ayoj ya jc'atp'un ta oq'uel ta swenta sna'el te animae. Ya me cac' te ya alapic ch'ixal pac'; soc ya me at'axan ta joxel ajolic ta seña xc'uxul mel-o'tan. Jich me oq'uel ya spasic yu'un te bit'il mach'a ch'ayem te jip jtul snich'ane; spisilic me ya xwoclajic yu'un xch'aal mel-o'tan —xi'.

¹¹ Ya yal te Cajwaltic: —Ya me xtalix sc'aalelal te ya jticun tel wi'nal ta balumilal: Ma me ja'uc te wi'nal yu'un we'elil, ni ja'uc yu'un te taquinti'ile, ja' me te wi'nal ta yaiyel stojol te jc'ope, jo'on te Ajwalilone.

¹² Te ants-winiquetic ya me xbajt'ic ta meletel, yu'un ya slebonic te jc'ope. Ya me xbajt'ic ta mar soc ta yan mar, soc c'alal ta norte soc ja' to ta sloq'uib c'aal; ja'uc me to, ma ba ya staic.

¹³ Te t'ujbil ach'ixetic soc queremetic ya me xcom q'uinal yaiyic yu'un taquinti'il te bi c'aalil ya cale.

¹⁴ Te mach'atic ya sc'oponic yajcananic ta Samaria, te mach'atic ya yalic: “Ac'a cuxinuc te dios awu'un, ja'at Dan”,te xie, soc: “Ac'a cuxinuc te diosetic yu'un Beerseba”, teme xiic xane, ya me xyalic, soc mero ma xjajch'iquix —xi' te Cajwaltique.