Amós 7 - Bible in Tzeltal de Oxchuc y Tenejapa

C'ulubetic yilel

¹ Ja' la yac'bon quil Cajwaltic in to: C'alal yac to nax ta loq'uel tel a te aquiltic te ya xchicnaj te c'alal lajix ta tsobel aquiltic ta swenta te muc' ajwalile, la quil te Cajwaltic te yac ta spasel te c'ulubetique.

² Patil la quil te c'ulubetic yacaliquix ta slajinel ta jyalel te aquiltic ta lumq'uinale, jich la cal: —Cajwal, pasbon perdón. ¿Bit'il c'an cujch'uc yu'un te Jacob te lum awu'une? Melel c'ax ch'in ta jyalel —xoon yu'un.

³ Jich yu'un te Cajwaltic la snop xan te bila xchapoj ta yo'tane, jich la yal: —Ma me xc'ot ta pasel —xi'.

Tojc'al yilel

⁴ Ja' la yac'bon quil Cajwaltic in to: La quil la yich' ticunel tojc'al ta swenta castigo. Jc'axel la staquintesbey ya'lel ta bay mero sna'bilal mar, soc yaquix ta c'ajq'uel te q'uinale.

⁵ Jich la calbey: —Coma aba, Cajwal, wocoluc a. ¿Bit'il c'an cujch'uc yu'un te Jacob te lum awu'une? Melel ch'in ta jyalel —la cut.

⁶ Jich yu'un te Cajwaltic la scom sba ta spasel te bila xchapoj ta yo'tane, soc jich la yal: —Ma me xc'ot ta pasel jiche —xi'.

Plomo yu'un albañil yilel

⁷ Te Cajwaltic la yac'bon quil xan: Slac'oj ta tec'lej ts'ajc', soc ay ta sc'ab plomo yu'un albañil.

⁸ Soc la sjojc'obon: —¿Bi ya awil, Amós? —la yuton. —Jun plomo yu'un albañil —xoon ta sjaq'uel. Jich la yalbon: —Ta swenta plomo, ja' ya quilbey a teme ay stojil yo'tan te lum Israel cu'une. Ma me ba ya jpasbey xan perdón, ni jtebuc.

⁹ Te toyol ch'uunjibaletic yu'un sts'umbal Isaac ya me yich'ic jinel, soc te temploetic yu'un Israel ya me yich'ic jinel. Ya me cac' puñal ta scontroinel te mach'atic ay yu'un Jeroboam —xi'.

Amós la stij sba ta c'op soc Amasías

¹⁰ Te Amasías, sacerdote ta Betel, la sticunbey ta alel te Jeroboam muc' ajwalil yu'un Israel: “Te Amós yac ta beel ta yolil israeletic, yac ta xchapel sc'op ta scontroinbelat ja'at muc' ajwalil. Te lume ma xcujch' yu'un te sc'ope.

¹¹ Melel jich yac ta yalel: ‘Jeroboam ya me xlaj ta puñal, soc ya me x'ic'ot bael ta yan lum ta spisil te israeletique’, xi' me”, xi'.

¹² Te Amasías ora la yalbey mandal te Amós: —J'alwanej, anan bael li'to. Teme ya ac'an ya xcuxinat ta j'alwanej, baan ta Judá.

¹³ Ma me x'awaiyix j'alwanej ta Betel, melel ja' ch'ul awilal yu'un muc' ajwalil soc ja' muc'ul templo yu'un te lume —xi'.

¹⁴ Te Amós la sjac': —Te jo'one ma ba j'alwanejon, soc ma snich'anucon j'alwanej. Ja' nax cuxulon a te ya jcanantay chijetic soc ta stulel te ja'mal higueraetique.

¹⁵ Ja'uc me to, te Cajwaltic la scomon ta beel ta scanantayel te chijetic, soc jich la yalbon: “Baan albon jc'oplal ta stojol Israel te lum cu'une”, la yuton.

¹⁶ Jich yu'un ya calbat, aiybeya awaiy stojol sc'op te Cajwaltique. Ja' te ya awal atuquel te ja'ate: “Ma x'ata ta alel te Diose, ma me xacontroin Israel, ma me xacontroinbey te sts'umbal Isaac”, te xaate.

¹⁷ Ja'uc me to, la yal te Cajwaltique: “Te awiname jmulawil ants me ya xc'ot ta spamal te lume, soc te anich'nab te quereme, te ach'ixe, ya me xlajic ta puñal. Te aq'uinale ya me yich' puquel ta swenta número ta na'el; te ja'at ya me xlajat ta bay sq'uinal te mach'a ma xch'uunejuc Dios. Te mach'atic israeletic chucul me ya x'ic'otic bael ta bay najt' yiloj sba soc te slumale”, xi' me te Cajwaltic —xi'.