Amós 5 - Bible in Tzeltal de Oxchuc y Tenejapa

Iq'uel sujt'el yu'un Dios

¹ Aiybon awaiyic jc'op, israeletic, aiya awaiyic te mel-o'tan cu'un ta atojolique:

² Te t'ujbil ach'ix Israel te ma'yuc bay bolobene, lajix ta jinel, yalix, ma xjajch'ix ta yan buelta. Limil jilel ta slum-sq'uinal, ma'yuc mach'a ya sjach jajch'el.

³ Jich ya yal te Dios te Ajwalil yu'un te israeletique: —Teme ay jpam lum ya sticun bael jmil (1,000) winiquetic ta guerra, ja' nax cuxul ya sujt'ic jo'winic (100); teme ay jpam lum ya sticun jo'winic (100), ja' nax lajuntul ya sujt'ic tel —xi'.

⁴ Jich ya yal te Ajwalil yu'un te israeletique: —La'ic ta jtojol, jich me ya xcuxinex.

⁵ Ma me xbaex ta Betel, ma xbaex ta Gilgal, ma me xc'axex bael ta Beerseba. Melel te Gilgal ya me x'ic'ot bael ta mosoil, te Betel ya xc'atp'uj ta jinem ts'ajq'uetic —xi'.

⁶ Noptsajanic ta stojol te Cajwaltique, jich me ya xcuxinex; teme ma jichuc ya apasique,ya me sticun tel c'ajc' ta spamal sq'uinal Israel. Ma me ayuc ya xwejt' ta Betel te mach'a ya scom.

⁷ Ya me awil awocolic ja'ex te ya aboltesic te chajbanele, melel ay swocolic yu'un te lume. Ya ach'ayic bael te bitic ay ta swentaic yich'el juju-jtul.

^8-9 Te Cajwaltic ja' la spas tsojboltsojp te eq'uetic, jich bit'il Xanab-ec' soc Orión, ja' te mach'a ya sc'atp'un ta ijc' q'uinal te saquil q'uinale, soc te ya sc'atp'un ta c'aaleltic te ajc'ubale; ja' te mach'a ya yic' tel te ya'lel mar, soc ya smal ta sba te lumq'uinale; ja' te mach'a ya sjin te tulanil ts'ajq'ue, ya sjin ta jc'axel te anjibale. Ajwalil te sbiile.

¹⁰ Ya me awil awocolic te ya alab-o'tantayic te mach'a ya xc'opoj yu'un te lequil chajbanel, soc te ya awilayic te testigo te smelelil ya yale.

¹¹ Scaj te ya apech'ic ta teq'uel te me'baetic soc ya ac'anbeyic spatanul te strigoe. Ma xju' ya anainic te naetic te la apasic ta tone, soc ma x'awuch'beyic ya'lel te ts'usubiltic te ats'unojique.

¹² Jo'on ya jna' te bayal bila amen apasojic soc te ma'yuc slajibal te amulique. Ya atenic ta uts'inel te mach'a toje, ya atsac amajt'an taq'uinic, soc ta bay chajbajibal ma'yuc sc'oplal ya xc'ot awu'unic te bila ya sc'an te me'bae.

¹³ Ja' yu'un te mach'a p'ije ma xju' yu'un te ya xc'opoje, melel bolobenix te q'uinale.

¹⁴ Pasaic te bila leque, ma me ja'uc te bila amene, jich me ya xcuxinex. Jich me smelelil ya xc'ot te bila ya awalique: “Te Cajwaltic Dios te Spisil ya xju' yu'une, sjoinejotic te jo'otique”, te xaexe.

¹⁵ Ilayaic te bila amene, lecuc me awo'tanic yu'un te bila leque. Leaic te bit'il ya yich' chajbanel ta toj te c'opetique; jich te Cajwaltic Dios te Spisil ya xju' yu'une, repente ya xc'uxtay te jayeb xan mach'atic cuxajtic ta Israel.

¹⁶ Jich ya yal te Cajwaltic Dios te Spisil ya xju' yu'une: —Ay me oq'uel ta yolil lum, ta spisil calleetic ay me awetic.Jich me ya yalic: “¡Ay! ¡Ay!”, xiic me ta oq'uel. Ya me x'ic'otic tel ta oq'uel te mach'atic ayic ta c'alc'altic, soc te mach'atic yat'elinejic oq'uel yu'un te mel-o'tane.

¹⁷ Spisil mach'atic ayic ta ts'usubiltic ya me x'oq'uic c'alal ya xtalon ta yaq'uel castigo —xi' te Cajwaltique.

¹⁸ Ya me yil swocolic te mach'atic ya sc'anix yo'tanic te ya xc'otix sc'aalelal te Cajwaltique. ¿Ya bal ana'ic te bila ya xc'ot ta awentaic ta sc'aalelal? Ijc' me ya xc'ot, ma me ayuc saquil q'uinal.

¹⁹ Jich me ya xc'ot te bit'il mach'a ya x'an bael yu'un te león-choje; ja'uc me to, ora ya sta sba soc oso. O jich bit'il te mach'a ya x'och bael ta sna te ya xijc'an sba ta pajc', te tey ya sta ti'el ta chan a.

²⁰ Melel nix a, te sc'aalelal Cajwaltic ijc' me, ma me saquil q'uinaluc; pimil ijc' q'uinal, xujt' ma me xchicnaj jtebuc.

²¹ Ya yal te Cajwaltic: —Ma jmulan soc ya quilay te q'uinetic ya apasic, yu'un te ach'uunejon ta ac'opique; ma lecuc co'tan yu'un te ya atsobilay abaic, te muc' sc'oplal ta awo'tanique.

²² Ma jc'an te chic'bil majt'anil ya awac'bonic yu'un quich'jibal ta muq'ue, ni te majt'aniletic harina; ma ba ya jtsacbat te jujp'en wacaxetic te ya amilic te seña te jun co'tan jbatique.

²³ ¡Q'ueja abaic ta ch'inch'onel soc te ac'ayojique! Ma jc'an caiybey stojol sc'op te awarpaique.

²⁴ Ja'uc me to, ac'a oquinuc jichuc ja' te bila toj ta pasele, te toj-o'tanile jichuc me te bit'il sloq'uibja' te ma xlaje.

²⁵ “Israeletic, ¿la bal awac'bonic milbil majt'anil soc yan majt'aniletic te cha'winic (40) ja'wil beenex ta jochol taq'uin q'uinal?

²⁶ Ta ora to, te bit'il ya acuchic bael te nailpac' yu'un Moloc soc Quiyún soc te ec' yu'un te diosetic awu'unic te ja'ex nix la apasique,

²⁷ ya me jch'ojex bael ta jejch' Damasco —xi'. Ja' ya yal te Cajwaltic Dios te Spisil ya xju' yu'une. Ja' me sbiil abi.