Amós 4 - Bible in Tzeltal de Oxchuc y Tenejapa

¹ Aiya awaiyic stojol, ja'ex antsetic te pajalex soc me' wacax ta Basán ta switsul Samaria, te ya atenic ta uts'inel te me'baetic, soc te c'axem to xan ya awilbeyic yo'tan yu'un te ma'yuc bila ay yu'unique; te ya awalbeyic te amamlalique: “Ich'aic tel vino ya cuch'tic”, te xaex ta stojolique.

² Te Cajwaltic te Ch'ul Dios stuquele, jich ya yal ta jamal: —Te ja'exe ya me xtal sc'aalelal ta atojolic te ya awich' luquel bael ta lucub taq'uin, soc te awalatac ya me yich'ic luquel bael ta stsacjibal-chay.

³ Ja' acholoj abaic ya xloq'uex tel ta bay jinem te ts'ajq'ue, ya me awich' ch'ojel bael ta bay wits Hermón —xi' ta tulan te Cajwaltique.

Swenta labanel

⁴ Jich ya yal te Cajwaltic: —Baanic ta Betel, soc ta Gilgal, pasaic mulil, esmantesaic te toybail awu'unique. Ich'aic bael milbil majt'anil ta sab, soc diezmoetic awu'unic ta ox'oxeb c'aal.

⁵ Chic'aic waj te yich'oj levadura swenta majt'anil ta yalel wocol, soc pucbeya sc'oplal ta bayuc te majt'anil awu'un te spasemal awo'tan ya awaq'uique, ja' te ya smulan awo'tanic spasel te ja'exe —xi' ta tulan te Cajwaltique.

Ac'bot castigo Israel, ma la sujt'es yo'tan

⁶ Jich ya yal te Cajwaltic: —Jo'on la cac' te tal wi'nal ta stojol spisil te lumetic awu'unique; jo'on la cal mandal te ma'yuc lec swe'elic ta spisil yajwal te alumale. Ja'uc me to, ma ba la asujt'es awo'tanic ta jtojol yu'un —xi' ta tulan te Cajwaltique.

⁷ —Ja' nix jich la jcom ja'al oxeb u te ma to sta yorail te ya xloc' sit a te awawal-ats'unube. Ay la cac' ja'al ta jpam lum, soc ay ma la cac' ja'al ta yan jpam lum; ay jsejp q'uinal ta bay la cac' ja'al, soc ay yan jsejp q'uinal te ma la cac' ja'al, jich taquej.

⁸ Te ants-winiquetic cotlajanel c'axic ta lumlumtic ta sleel ja' yuch'ic, ma tic'uc la staic yu'un te taquinti'il la yaiyique. Ja'uc me to, ma ba la asujt'es awo'tanic ta jtojol yu'un —xi' ta tulan te Cajwaltique.

⁹ —La jmajat c'oem ta buen c'ajc'al ic' soc ta buen tulan chamel; la cac' te ya sayub awawal-ats'unubic soc te ats'usubilique. Te c'ulubetic la slajinbat te higueraetic soc te olivoetic awu'unique. Ja'uc me to, ma ba la asujt'es awo'tanic ta jtojol yu'un —xi' ta tulan te Cajwaltique.

¹⁰ —La jticunbeyex tel te bila la yac'beyex awocolic, jich bit'il la jticunbey tel ta stojol te egipcioetic. La cac' te ya xlajic ta guerra te queremetic awu'unic; soc la cac'bey yu'uninbeyex acaballoic te acontroique. La cac'beyex awaiybeyic stuil te mach'atic lajem awu'unique. Ja'uc me to, ma ba la asujt'es awo'tanic ta jtojol yu'un —xi' ta tulan te Cajwaltique.

¹¹ —La jlajinex jich bit'il la jlajin Sodoma soc Gomorra; jich jilat te bit'il xutumte' loq'uesbil tel ta c'ajc'. Ja'uc me to, ma la asujt'es awo'tanic ta jtojol yu'un —xi' ta tulan te Cajwaltique.

¹² —Jich yu'un, Israel, jich nix me ya jpasbat te ja'ate; te bit'il jich jnopoje, chajbana aba te ya ata aba soc te Dios awu'une —xi'.

¹³ Te Cajwaltic ja' te la spas te witstiquil soc te iq'ue, ja' te ya yac'bey sna' stojol ants-winiquetic te bila chapbil yu'une, ja' te ya sc'atp'un ta ijc' q'uinal te saquil q'uinale, ja' te ya yoclin ta bay mero toyol q'uinal te balumilale, ja' me Ajwalil, te Dios Spisil ya xju' yu'une, ja' me sbiil abi.