Amós 2 - Bible in Tzeltal de Oxchuc y Tenejapa

¹ Jich ya yal xan te Cajwaltique: —Te mach'a ayic ta Moab bayal buelta spasojic te bila amene. Ma me jichuc nax ya xjil, ya me cac'bey castigo yu'un. Melel la xchic'beyic sbaquel te muc' ajwalil yu'un Edom, la sc'atp'unic ta tan ta jyalel.

² Jich yu'un ya me cac'bey sc'aal te sq'uinal Moab, tan me ya xjil yu'un te muc'ul naetic ta Queriot te c'alal ay aw yu'un guerra soc te ya x'oq'uesinot oq'ues. Jich me ya xlajic te moabetique.

³ Ya me jloq'uesbey ta yolil te lum te muc' ajwalile; ya me jmil, soc te winiquetic te muc' sc'oplalic yu'une —xi'.

⁴ Jich ya yal xan te Cajwaltique: —Te mach'a ayic ta Judá bayal buelta spasojic te bila amene. Ma me jichuc nax ya xjil, ya me cac'bey castigo yu'un. Melel ma la sc'an yo'tanic te p'ijubtesel yu'un Cajwaltic, soc ma la xch'uunbeyic te mandaliletic yu'une. Ja' la xch'uunic te yajcananic te la xch'uunic te sme'-statique.

⁵ Jich yu'un ya cac'bey sc'aal te Judá, tan me ya xjil yu'un te muc'ul naetic ta Jerusalén —xi'.

Chajbanel ta stojol Israel

⁶ Jich ya yal xan te Cajwaltique: —Te mach'a ayic ta Israel bayal buelta spasojic te bila amene. Ma me jichuc nax ya xjil, ya me cac'bey castigo yu'un. Melel la xchonic bael te mach'atic ma'yuc smulique; te mach'a me'baetic, jun nax par zapato la sjelic bael a.

⁷ Ya stenic ta uts'inel soc ya spejc'anic te mach'atic me'baetique; soc ma xyac'beyic lequil chajbanel te mach'atic peq'uelique. Te winic soc nix te snich'ane, jtul nax ants ayic ta sc'oponel, jich ya sboltesbonic sc'oplal te jch'ul-biile.

⁸ Tey ya sliman sbaic ta we'el ta bay c'u'il te la yich'ic ta prendal, jich ya yac' sbaic ta we'el ta swenta yich'jibal ta muc'te yajcananique. Ja' taq'uin yu'un multa te ma'yuc swentail la sc'anic te ya smanic vino a, te ya yuch'ic ta bay templo yu'un te bila sdiosinejique.

⁹ Yan te jo'on la jambeyex ochel abeic, la jin te amorreoetique; la jlajin ta jc'axel, manchuc me c'ax najt'ic jichuc cedroetic soc tulanic jichuc c'antulanetic.

¹⁰ “Ja'uc me to, la jloq'uesex tel ta Egipto, soc la quiq'uex ta beel cha'winic (40) ja'wil ta jochol taquin q'uinal swenta yu'un ja' ya cac'beyex te sq'uinal amorreoetique.

¹¹ Ja'ex israeletic, ma xju' ya amuc ta awo'tanic te ay la cac'bey yich' yat'elic ta j'alwanejetic soc ta nazareo te awal-anich'anique —xi' ta tulan te Cajwaltique.

¹² “Ja'uc me to, te ja'ex la asujic ta yuch'el vino te nazareo, soc la acomic te j'alwanejetic te c'opojic ta jwenta.

¹³ Lec ay jiche, jo'on ya jnet'at c'oel ta lum jich bit'il ya xnet'awan yacan carreta buen nojel te yijc'atse.

¹⁴ Manchuc me bayal ya x'animajex, ma nix yu'unuc ya xcolex a; te mach'a tulane ya me xlaj yip, soc ma xcol te mach'a tulan yo'tane.

¹⁵ Te jt'imuywanej ma me xcujch' yu'un; ma me xcolic ni te mach'a tulan ya x'animaje, ni ja'uc te mach'a ya x'an bael soc caballo.

¹⁶ Te bi c'aalil ya xc'ot ta pasele, asta te mach'a mero tulan yu'un guerra ya xch'oj jilel te yat'ejib, swenta yu'un ya xju' ya x'an bael a —xi' ta tulan te Cajwaltique.